Tingawuka ku Ŵakufwa!

USANGE tafwa, kasi Ciuta wazamukhumba kuti watiwuske ku ŵakufwa, kung’anamura kutiwezgeraso ku umoyo?— Muntu muweme Yobu wakagomezganga kuti Ciuta wakukhumba kucita nteura. Nteura apo Yobu wakaghanaghananga kuti wali pafupi kufwa, wakaphalira Ciuta kuti: ‘Mundicemenge ndipo ine ndimuzgoraninge.’ Yobu wakati Ciuta wakaŵa wakunweka, panji kuti wakukhumbisiska comene, kuti wamuwuske ku ŵakufwa.—Job 14:14, 15.

Yesu wakuyana waka na Yehova Ciuta, Ŵadada ŵake. Yesu wakukhumba kuti watovwire. Apo mwanarumi munyake uyo wakarwaranga vyoni wakaphalira Yesu kuti: ‘Usange mukukhumba mungamanya kunditozga,’ Yesu wakazgora kuti: “Nkukhumba.” Ndipo wakamucizga nadi vyoni vyake.—Marko 1:40-42.

Yesu wakasambira kwa Ŵadada ŵake kutemwa ŵana. Kale, pa vyakucitika viŵiri, Yehova wakagwiriskira ncito ŵateŵeti ŵake kuti ŵawuske ŵana ŵaŵiri awo ŵakafwa. Eliya wakapempa Yehova kuti wawuske musepuka wa mwanakazi uyo wakamucitira viweme. Ndipo Yehova wakamuwuska. Yehova wakagwiriskiraso ncito muteŵeti wake Elisha kuti wawuske mwana musepuka uyo wakafwa.—1 Mathemba 17:17-24; 2 Mathemba 4:32-37.

Kasi ncakukondweska yayi kumanya kuti Yehova wakutitemwa comene?— Iye wakutighanaghanira para tiri ŵamoyo pera yayi. Kweni wakutikumbukiraso nanga tingafwa. Yesu wakati Ŵadada ŵake ŵakuwona awo ŵakuŵatemwa nga mbamoyo nanga ŵangafwa! (Luka 20:38) Baibolo likuyowoya kuti ‘nanga ndi nyifwa, panji umoyo, nesi ivyo viriko, nesi ivyo vikwiza, vimanyenge cara kutipatula ku kutemwa kwa Ciuta.’—Ŵaroma 8:38, 39.

Apo Yesu wakaŵa pa caru capasi, wakarongora kuti Yehova wakufipira mtima ŵana. Ungakumbukira kuti Yesu wakapatulanga nyengo ya kuyowoya na ŵana za Ciuta. Kweni kasi ukumanya kuti Ciuta wakapa Yesu nkongono ya kuwuska ŵana ku ŵakufwa?— Tiye tidumbiskane za apo Yesu wakawuska mwana msungwana wa virimika 12 wa mwanarumi munyake zina lake Yayiro.

Yayiro wakakhalanga na muwoli wake na mwana wawo yumoza pera pafupi na Nyanja ya Galileya. Zuŵa linyake mwana msungwana yura wakarwara comene, ndipo Yayiro wakamanya kuti wafwenge. Wakamba kughanaghana za Yesu, mwanarumi muweme yura, Yayiro, wakapulikapo za muntu uyo wakacizganga ŵantu. Nteura Yayiro wakaruta kukamupenja. Wakamusanga Yesu mumpepete mwa Nyanja ya Galileya, wakusambizga ŵantu ŵanandi.

Yayiro wakaporota mu wumba na kuwa pa marundi gha Yesu. Wakaphalira Yesu kuti: ‘Kana kane kasungwana karwara comene: Kasi mungiza kuti mukamovwire? Nkumurombani mwize.’ Pa nyengo yeneyiyo, Yesu wakaruta na Yayiro. Wumba uwo ukiza kuti uzakamuwone Msambizgi Waluso nawoso ukarondezga. Kweni ŵati ŵendapo mtunda ucoko waka, ŵanarumi ŵanyake ŵakiza kufuma ku nyumba ya Yayiro na kumuphalira kuti: ‘Mwana wako wali kufwa! ukumusuzgiraci msambizgi?’

Yesu wakapulika ivyo ŵanarumi ŵara ŵakayowoya. Wakamanya citima ico Yayiro wakaŵa naco kutaya mwana wake yumoza pera. Nteura wakamuphalira kuti: ‘Ungawopanga yayi, iŵa waka na cipulikano mwa Ciuta, ndipo mwana wako waŵenge makora.’ Ŵakenda mupaka ŵakafika ku nyumba ya Yayiro. Kwenekura mabwezi gha mbumba ya Yayiro ghakaliranga. Ghakaŵa na citima cifukwa mubwezi wawo mucoko wakafwa. Kweni Yesu wakaŵaphalira kuti: ‘Rekani kulira: cifukwa kuti mwanici wali kufwa cara, kweni wali mu tulo.’

Yesu wakati wayowoya ntena, ŵantu ŵakamba kumuseka, cifukwa ŵakamanya kuti msungwana yura wafwa. Kasi ukughanaghana kuti ncifukwa wuli Yesu wakayowoya kuti wali mu tulo?— Kasi ukughanaghana kuti wakakhumbanga kuŵasambizga sambiro wuli ŵantu?— Wakakhumbanga kuti iwo ŵamanye kuti nyifwa yiri nga ni tulo. Wakakhumbanga kuŵasambizga kuti na nkongono ya Ciuta, wangawuska muntu ku ŵakufwa mwambura kusuzga nga ni umo tingawuskira muntu mu tulo.

Yesu wakaŵafumya wose mu nyumba kupatulako ŵapostole ŵake, Petros, Yakobe, na Yohane ndiposo ŵawiske na ŵanyina ŵa msungwana yura. Wakaruta uko kukaŵa mwana yura. Wakamukora pa woko na kuyowoya kuti: “Wa msungwana, wuka!” Pa nyengo yeneyiyo wakawuka na kwamba kwenda! Ŵanyina na ŵawiske ŵakakondwa comene.—Marko 5: 21-24, 35-43; Luka 8:40-42, 49-56.

Sono aghanaghanira ici. Cifukwa cakuti Yesu wakawuska msungwana yura ku ŵakufwa, kasi wangacita mwakuyana waka ku ŵanici ŵanyake?— Kasi ukughanaghana kuti wazamucita nadi ntena?— Enya, wazamucita. Yesu iye mwene wakati: “Ora likwiza mu leneilo wose awo ŵali mu mararo ŵati ŵapulike mazgu ghake, ndipo ŵati ŵafumengemo.”—Yohane 5:28, 29.

Kasi ukughanaghana kuti Yesu wakukhumba kuwuska ŵantu ku ŵakufwa?— Ciyerezgero cinyake mu Baibolo cingatovwira kuzgora fumbo ili. Ico cikacitika zuŵa linyake mu msumba wa Nayini cikurongora umo Yesu wakukhwaskikira na ŵantu awo ŵali na citima pa nyifwa.

Mwanakazi yunji wakaŵa mukati mu wumba uwo ukayegha thupi la mwana wake musepuka peneapo wumba uwu ukafumanga mu msumba wa Nayini. Pakwambilira wakafwa ndi mufumu wake, ndipo sono mwana wake yumoza pera wafwa. Mwee, naco ncitima ico wakaŵa naco! Ŵantu ŵanandi ŵaku Nayini ŵakarondezganga peneapo thupi la mwana wake likafumanga kuwaro kwa msumba. Mwanakazi yura wakaliranga, ndipo ŵantu ŵakaŵavya cakucita kuti ŵamupembuzge.

Pa zuŵa lira, Yesu na ŵasambiri ŵake ŵakendanga kurazga ku msumba wa Nayini. Ŵakati ŵafika pafupi na cipata ca msumba, ŵakakumana na wumba uwo ukarutanga kukasunga mwana wa mwanakazi yura. Yesu wakati wawona mwanakazi wakulira yura, wakamulengera lusungu comene. Yesu wakakhwaskika na citima cikuru ico mwanakazi yura wakaŵa naco. Wakakhumbanga kumovwira.

Nteura mwacitemwa kweni mwamazaza wakati: “Reka kulira.” Nkaro yake na kacitiro kake vikapangiska waliyose kumulaŵiska mwakunweka. Peneapo Yesu wakasendereranga kufupi na thupi, wose ŵakwenera kuti ŵakazizwa kuti wacitenge vici. Yesu wakarangura kuti: ‘Musepuka iwe, nkukuphalira, wuka!’ Penepapo wakakhala ukhalo! Ndipo wakamba kuyowoya.—Luka 7:11-17.

Aghanaghanira waka umo mwanakazi yura wakwenera kuti wakajipulikira! Kasi iwe ukatenge ujipulikenge wuli kupokerera wakutemweka uyo wakafwa?— Kasi ici cikurongora yayi kuti Yesu wakutemwa nadi ŵantu ndipo wakukhumba kuŵawovwira?— Aghanaghanira waka umo kuzamuŵira kwakukondweska mu caru cipya ca Ciuta kupokerera ŵantu awo ŵali kufwa!—2 Petros 3:13, Civumbuzi 21:3, 4.

Pa nyengo iyo, ŵanji awo ŵazamuwuka ŵazamuŵa ŵantu awo tikaŵamanyanga, kusazgapo ŵana. Tizamuŵamanya nga ni umo Yayiro wakamanyira mwana wake msungwana, Yesu wakati wamuwuska. Ŵanyake ŵazamuŵa ŵantu awo ŵakafwa virimika mahandiredi panji masawuzandi ghanandi ivyo vyajumpa. Kweni Ciuta wazamuŵaruwa yayi nangauli ŵakaŵako virimika vinandi ivyo vyajumpa.

Kasi ncakukondweska yayi kumanya kuti Yehova Ciuta na Mwana wake, Yesu, ŵakutitemwa comene?— Iwo ŵakukhumba kuti tikhalenge na umoyo, kwa virimika vicoko waka yayi, kweni kwamuyirayira!