Kasi ni Mwauli umo Ungazakakhalira mu Caru Cipya ca Mtende ca Ciuta?

CIUTA wakaŵika Adamu na Heva mu munda wa Edeni. Nangauli ŵakaŵa ŵambura kupulikira ndipo paumaliro pake ŵakafwa, Ciuta walikulinganizga kuti ŵana ŵawo, kusazgapo ise lero, tizakakhale mu Paradiso kwamuyirayira. Baibolo likulayizga kuti: ‘Ŵakunyoroka ŵazamupokera caru na kukhala mwenemumo kwamuyirayira.’—Salmo 37:29.

Baibolo likutiphalira za ‘macanya ghapya’ na “caru cipya.” (Yesaya 65:17; 2 Petros 3:13) ‘Macanya’ agho ghalipo lero ghapangika na maboma gha ŵantu agho ghalipo sono, kweni Yesu Kristu na awo ŵamuwusira lumoza naye kucanya ŵamupanga ‘macanya ghapya.’ Cizamuŵa cakukondweska comene peneapo macanya ghapya, agho ghakwimira boma liweme la Ciuta ilo lizamwiziska mtende, lizamuwusa caru cose capasi!

Kasi “caru cipya” ncivici?— Caru cipya cizamuŵa ŵantu ŵaweme awo ŵakutemwa Yehova. Kweni manya kuti, para Baibolo likuyowoya za “caru,” nyengo zinyake likung’anamura ŵantu awo ŵakukhala mu caru, kuti dongo yayi. (Genesis 11:1; Salmo 66:4; 96:1) Anteura ŵantu awo ŵakupanga caru cipya ŵazamukhala pa caru capasi penepano.

Caru ca sono ico capangika na ŵantu ŵaheni kuzamuŵavya. Kumbukira kuti, Cigumula ca mu nyengo ya Nowa cikaparanya caru ico cikapangika na ŵantu ŵaheni. Nga ni umo tasambilira, caru ciheni ico cilipo sono cizamuparanyika pa Haramagedoni. Tiye tidumbiskane umo umoyo uzamuŵira mu caru cipya ca Ciuta pamanyuma pa Haramagedoni.

Kasi ukukhumba kuzakakhala kwamuyirayira mu Paradiso mu caru cipya ca mtende ca Ciuta?— Palijirethu dokotala uyo wangatipangiska kuti tikhale na umoyo wamuyirayira. Palije munkhwara uwo ungapangiska kuti tireke kufwa. Ntowa yimoza yekha iyo tingakhalira ŵamoyo kwamuyirayira ndiyo kusenderera kwa Ciuta. Msambizgi Waluso wakutiphalira umo tingasenderera kwa Ciuta.

Tora Baibolo lako ndipo tiŵazgire lumoza lemba la Yohane 17, vesi 3. Pano tiŵazgenge mazgu gha Msambizgi Waluso agho ghakuti: “Ndipo uwu mbumoyo wa muyirayira, kuti ŵamumanyani imwe, Ciuta mweneco yekha, na Yesu Kristu, mweneuyo mukamutuma.”

Kasi Yesu wakayowoya kuti tikwenera kucitaci kuti tikhale na umoyo kwamuyirayira?— Cakudanga, tikwenera kumumanya makora Dada withu wakucanya, Yehova, ndiposo tikwenera kumumanya makora Mwana wake, uyo wakapereka umoyo wake cifukwa ca ise. Ici cikung’anamura kuti tisambire na kulimanya makora Baibolo. Buku lino la Sambirani kwa Msambizgi Waluso, likutovwira kuti tisambire Baibolo.

Kasi ni mwauli umo kusambira za Yehova kungatovwilira kuti tizakakhale na umoyo wamuyirayira?— Nga ni umo zuŵa lirilose tikukhumbikwira cakurya, anteura pera tikukhumbikwiraso kusambira za Yehova zuŵa lirilose. Baibolo likuti: ‘Muntu kuti wakhalenge wamoyo na cingwa pera cara, kweni na mazgu ghose agho ghakufuma mu mlomo wa Yehova.’—Mateyu 4:4.

Tikwenera kumumanya makora Yesu Kristu cifukwa Ciuta wakatuma Mwana wake kuti wazakamazge zakwananga zithu. Baibolo likuti: ‘Kulije ciponosko kwizira mwa muntu munyakeso.’ Baibolo likuyowoyaso kuti: “Uyo wakupulikana na Mwana wali na umoyo wa muyirayira.” (Milimo 4:12; Yohane 3:36) Kasi cikung’anamuraci ‘kupulikana’ na Yesu?— Cikung’anamura kuti tiri na cipulikano nadi mwa Yesu ndiposo tikumanya kuti tingakhala na umoyo wamuyirayira yayi kwambura iye. Kasi ukugomezga fundo iyi?— Usange tiri na cipulikano, tirutirizgenge kusambira kwa Msambizgi Waluso zuŵa lirilose, ndiposo ticitenge ivyo wakutiphalira.

Ntowa yimoza yiweme yakusambira kwa Msambizgi Waluso ndiyo kuŵazga buku lino mwakuwerezga-werezga, kuwona na kughanaghanirapo pa vithuzithuzi. Yezga kuzgora mafumbo agho ghali pa vithuzithuzi ivi. Ndiposo, uŵazge buku lino na amama panji adada ŵako. Usange ukukhala na ŵapapi ŵako yayi, ŵazga na ŵantu ŵarara ŵanyake na ŵana ŵanyako. Kasi ukughanaghana kuti cingaŵa cakukondweska yayi kuti uwovwire ŵanji kuti ŵasambire kwa Msambizgi Waluso vintu ivyo ŵakwenera kucita kuti ŵazakakhale na umoyo wamuyirayira mu caru cipya ca Ciuta?—

Baibolo likutiphalira kuti: “Caru cikuruta na makhumbiro ghake.” Kweniso Baibolo likutiphalira umo tingakhalira na umoyo wamuyirayira mu caru cipya ca Ciuta. Likuti: “Uyo wakucita khumbo la Ciuta, wakukhalirira muyirayira.” (1 Yohane 2:17) Anteura, kasi ni mwauli umo tingazakakhalira kwamuyirayira mu caru cipya ca Ciuta?— Tingazakakhala kwamuyirayira mwa kumumanya makora Yehova na Mwana wake, Yesu. Kweniso tikwenera kucita ivyo tikusambira. Mpanyi buku lino lakovwira kuti umumanye makora Yehova na Yesu ndiposo kucita ivyo ukusambira.