Kasi Tikwenera Kuchitako Vikondwelero?

VIKONDWELERO na maholide agho ŵanthu ŵanandi ŵakuchita, ni vyakufuma mu Baibolo yayi. Kasi vikondwelero ivi vikayamba wuli? Para mungafufuza mu mabuku ghakulongosora za vikondwelero, muzizwenge chomene kuwona umo vikondwelero ivi vikambira. Wonani viyelezgero vichoko waka.

Isitara. Buku la The Encyclopædia Britannica likuti: “Mu Testamente la Sono mulije apo pali kulembeka kuti tikondwelerenge Isitara.” Kasi Isitara yikamba wuli? Ŵanthu ŵambura kusopa Chiuta ndiwo ŵakambiska Isitara. Nangauli ŵanthu ŵakuti pa chikondwelero ichi ŵakukumbukira kuwuka kwa Yesu, kweni vinthu ivyo ŵakuchita pa Isitara vikukolerana yayi na Chikhristu.

Nyuyere. Madeti gha Nyuyere ndiposo umo ŵanthu ŵakuchitira pakukondwelera Nyuyere vikupambana mu vyaru na vyaru. Pakuyowoya za umo chikondwelero ichi chikambira, buku la The World Book Encyclopedia likuti: “Julius Caesar, uyo wakalamuliranga Ŵaroma ndiyo wakambiska kuti ŵanthu ŵakondwelerenge Nyuyere pa Janyuwale 1. Wakachita ivi mu chaka cha 46 B.C. Ŵaroma ŵakaŵika zuŵa ili kuti ŵakumbukirenge Janus, chiuta wa mageti, vijaro, na kwamba kwa vinthu. Zina la mwezi wa Janyuwale lili kufuma ku zina lakuti Janus. Janus wakaŵa na visko viŵiri. Chisko chinyake chikalaŵiskanga kunthazi, chinyake kumanyuma.” Ntheura ŵanthu ŵambura kusopa Chiuta waunenesko ndiwo ŵakambiska vyakuti ŵanthu ŵakondwelerenge Nyuyere.

Vikondwelero Vinyake. Tingakwaniska yayi kulongosora vikondwelero vyose ivyo vikuchitika pa charu chose chapasi. Kweni chakuti timanye ntchakuti Yehova wakuzomerezga yayi vikondwelero ivyo vikulumba ŵanthu panji mawupu. (Yeremiya 17:5-7; Milimo 10:25, 26) Kumbukiraniso kuti vikondwelero vya chisopa vingamukondweska Chiuta panji kumukwiyiska chifukwa cha umo vikayambira. (Yesaya 52:11; Chivumbuzi 18:4) Fundo za mu Baibolo izo zili mu Mutu 16 mu buku lino, zimovwiraninge kumanya umo Chiuta wakuwonera vikondwelero na maholide agho ghakambika na ŵanthu ŵambura kusopa Chiuta wanunenesko.