MUTU 35
Kasi Ningachita Wuli Kuti Niŵe Paubwezi na Chiuta?
Jeremy wakati wasangana na suzgo ndipo wakamanya kuzirwa kwakuŵa paubwezi na Chiuta. Iyo wakati: “Apo nkhaŵa na vyaka 12, adada ŵakatichimbira. Zuŵa linyake usiku nkhamba kulomba kwa Yehova kuti adada ŵizeso panyumba.”
Jeremy wakasuzgika chomene maghanoghano, mbwenu wakamba kuŵerenga Baibolo. Lemba la Salimo 10:14 ndilo likamufika pamtima. Pakuyowoya za Yehova lemba ili likuti: “Wa soka wakujipereka mu mawoko ghinu; ndimwe movwiri wa ŵaranda.” Jeremy wakati: “Nkhajipulika nga Yehova wakuniphalira kuti, ndine movwiri wako kweniso dada wako. Nakuti palije dada muwemi kuluska Yehova.”
KWALI namwe mukukumana na masuzgo nga agho wakakumana nagho Jeremy panji yayi, kweni Baibolo likuti Yehova wakukhumba kuti muŵe nayo paubwezi. Nakuti Baibolo likuti: “Sendelerani kwa Chiuta, ndipo iyo wasendelerenge kwa imwe.” (Yakobe 4:8) Kasi mazgu agha ghakung’anamurachi? Nangauli Yehova mungamuwona yayi kweniso ngwapachanya chomene kuluska waliyose, kweni wakumupemphani kuti muŵe nayo paubwezi.
Kweni kuti muŵe paubwezi na Chiuta mukwenera kufwilirapo chomene. Tiyelezgere kuti mwapanda luŵa mu nyumba, kasi lingakura kwambura kulipwelelera? Mukwenera kulithilira maji pafupipafupi kweniso kuliŵika pa malo ghawemi kuti likure makora. Ndimo viliriso na ubwezi withu na Chiuta. Kasi mungachita wuli kuti muŵe paubwezi wakukhora na Yehova?
Uwemi wa Kuŵerenga Baibolo
Ŵanthu awo ŵali paubwezi ŵakwenera kuyowoyeskana kweniso kutegherezgana. Ndivyo tikweneraso kuchita kuti tilutilire kuŵa paubwezi na Chiuta. Para tikuŵerenga na kusambira Baibolo ndikuti tikutegherezga kwa Chiuta.—Salimo 1:2, 3.
Panji mukutemwa yayi kusambira Baibolo. Ŵachinyamata ŵanandi ŵakutemwa waka kuwonelera TV, kuchita maseŵero panji kuchezga na ŵanyawo m’malo mwakuŵerenga Baibolo. Kweni kuti muŵe paubwezi na Chiuta mukwenera kuyezgayezga kuchita ivyo wakukhumba. Kuti mupulike ivyo Yehova wakuyowoya mukwenera kusambira Mazgu ghake.
Kweni kufipa mtima yayi. Lekani kuwona kuti kuŵerenga Baibolo ni mphingo. Namwe vingamunozgerani chomene kuŵerenga Baibolo nangauli panji mukutemwa yayi vyakuŵerenga. Chakwamba mukwenera kupatura nyengo yakuti musambirenge Baibolo. Msungwana munyake zina lake Lais wakati: “Nili na ndondomeko ya kuŵerenga Baibolo. Para nawuka waka mulenji uliwose, nkhuŵazga Baibolo chaputara chimoza.” Maria wa vyaka 15, nayo wali na ndondomeko yake yakuŵazgira Baibolo. Iyo wakati: “Pambere nindagone, nkhuŵerenga Baibolo pachoko waka.”
Kuti muŵe na ndondomeko yinu yakusambilira Baibolo, wonani bokosi ilo lili pa peji 292. Ndipo lembani nyengo iyo mukuwona kuti mungasambilira Mazgu gha Chiuta kwa maminiti 30 panji kujumphirapo.
․․․․․
Kupanga ndondomeko mphakwambira waka. Para mwamba kusambira Baibolo, panji muzamuwona kuti nkhwakusuzga chomene kuchita nthena. Panji namwe muzamukolerana na fundo iyo wakayowoya munyamata munyake wa vyaka 11 zina lake Jezreel, uyo wakati: “Nkhani zinyake mu Baibolo ni zakusuzga chomene kuzipulikiska ndipo zikunozga yayi.” Para namwe ndimo mukuwonera, kugongowa yayi. Nyengo zose mukwenera kuwona kuti para mukusambira Baibolo ndikuti mukutegherezga kwa mubwezi winu Yehova Chiuta. Para mukuŵikapo mtima kusambira Baibolo, muzamuwona kuti nkhwakukondweska kweniso nkhwakovwira chomene.
Lurombo Ndakuzirwa Chomene
Lurombo ntchawanangwa chapadera chomene chifukwa ni nthowa iyo tikuyowoyera na Chiuta. Mungayowoya na Yehova nyengo yiliyose. Iyo ngwakunozgeka kutegherezga kwa imwe nyengo yiliyose. Kweniso ngwakukhumbiskiska kupulika ivyo mukukhumba kuyowoya. Lekani Baibolo likutichiska kuti: “Mu vinthu vyose, mu lurombo na maŵeyelero pamoza na kuwonga, madandawuro ghinu ghamanyikwe kwa Chiuta.”—Ŵafilipi 4:6.
Kuyana na ivyo lemba ili likuyowoya, pali vinthu vinandi ivyo mungamuphalira Yehova. Mungamuphalira masuzgo agho mukukumana nagho kweniso ivyo mukwenjerwa navyo. Kweniso mungawonga pa vinthu viwemi ivyo wakumuchitirani. Asi namwe mukuwonga ŵabwezi ŵinu para ŵamuchitirani vinthu viwemi? Yehova nayo mukwenera kumuwonga chomene chifukwa pali vinandi ivyo wamuchitirani kuluska mubwezi winu waliyose.—Salimo 106:1.
Pasi apa, lembanipo vinthu ivyo mungawonga Yehova.
․․․․․
Tikumanya kuti pali vinthu vinandi ivyo vikumupangiskani kuti mwenjerwenge kweniso kufipa navyo mtima. Lemba la Salimo 55:22 likuti: “Katundu wako umuthwikiske Yehova, ndipo wakovwirenge. Wazomerezgenge chara kuti murunji wawe.”
Pa mizere iyo yili pasi apa, lembani vinthu ivyo mukufipa navyo mtima ivyo mukukhumba kuti muvizunure mu lurombo.
․․․․․
Ivyo Mwakumana Navyo pa Umoyo
Paliso chinthu chinyake icho chingamovwirani kuti mulutilire kuŵa paubwezi na Chiuta. Wamasalimo Davide wakalemba kuti: “Chetani mwe, muwone kuti Yehova ni muwemi.” (Salimo 34:8) Apo Davide wakalembanga Salimo 34, wakaŵa kuti wakumana waka na masuzgo ghakuru. Pa nyengo iyi wakachimbiranga Themba liheni Sauli ndipo ivi vikamutimbanizga chomene maghanoghano. Kufuma apo wakabisama pakati pa Wafilisiti awo ŵakaŵa ŵalwani ŵake. Pakopa kuti ŵangamukoma, Davide wakapusikizgira kuti ngwakufuntha ndipo wakapona.—1 Samuyeli 21:10-15.
Davide wakakajilumba yayi kuti panji wakapona na mahara ghake, m’malo mwake wakalumba Yehova kuti ndiyo wakamovwira. Kukwambilira kwa salimo 34 wakalemba kuti: “Nkhafumba Yehova, ndipo wakanizgora. Wakanithaska ku wofi wane wose.” (Salimo 34:4) Davide wakawona umo Yehova wakamovwilira lekani wakutichiska kuti “chetani mwe, muwone kuti Yehova ni muwemi.”a
Kasi chilipo icho chili kumuchitikiranipo pa umoyo icho chikulongora kuti Yehova kumupwelelerani? Usange chilipo chilembani pasi apa. Nakuti chinthu icho chikwenera kuŵa chakuzukumiska yayi. Ghanaghanirani vinthu viwemi ivyo vikuchitika pa umoyo winu nanga vingawoneka vichoko wuli.
․․․․․
Panji ŵapapi ŵinu ŵali kumusambizganipo vyakukhwaskana na Baibolo. Usange ndimo viliri, mbwenu muli na mwaŵi chomene. Ndipouli, namwe pamwekha mukwenera kuŵikapo mtima kuti muŵe paubwezi na Chiuta. Para mundayambepo kuŵa paubwezi na Chiuta, mungagwiliskira ntchito fundo za nkhani iyi kuti zimovwirani kuŵa nayo paubwezi. Yehova wazamutumbika chomene kuyezgayezga kwinu. Baibolo likuti: “Lutilirani kulomba, ndipo mupikenge. Lutilirani kupenja, ndipo musangenge.”—Mateyu 7:7.
ŴERENGANI VINANDI PA NKHANI IYI MU BUKU LAKWAMBA, MUTU 38 NA 39
Kasi vikumusuzgani kuphalirako ŵanyinu vya Chiuta? Wonani ivyo mungachita kuti muvikilire chipulikano chinu.
[Mazgu Ghamusi]
a Mu Mabaibolo ghanyake mazgu ghakuti “chetani mwe, muwone” ŵali kung’anamura kuti “Jiwonerani mwekha” kweniso kuti “muzamumanya para vyamuchitikirani.”—Today’s English Version, na The Bible in Basic English.
LEMBA ILO LINGAMOVWIRANI
“Mbakukondwa awo ŵakumanya kuti ŵali na njara yauzimu.”—Mateyu 5:3
FUNDO YAKOVWIRA
Ŵerengani Baibolo mapeji ghanayi zuŵa lililose, ndipo mumalizgenge Baibolo lose pambere chaka chindamare.
KASI MUKUMANYA . . .?
Chifukwa chakuti mukuŵerenga buku ili kweniso mukulondezga ulongozgi wa mu Baibolo uwo wuli mu buku lino, mbukaboni wakukwana wakuti Yehova wakumutemwani.—Yohane 6:44.
VYAKUTI NICHITE!
Kuti nisangenge chandulo para nkhusambira Baibolo, nichitenge ivi ․․․․․
Kuti nyengo zose nipempherenge, nichitenge ivi ․․․․․
Ivyo nkhukhumba kufumba ŵapapi pa nkhani iyi ni ivi ․․․․․
KASI MUKUWONA WULI?
● Kasi mungachita wuli kuti mukondwenge para mukusambira Baibolo?
● Chifukwa wuli Yehova wakukhumba chomene kutegherezga malurombo gha ŵanthu ŵakwananga?
● Kasi mungachita wuli kuti mulombenge malurombo ghawemi?
[Mazgu ghakukhozgera]
Eve wakati: Apo nkhaŵa mwana, nkhalombanga malurombo ghakuchita kusunga waka pamtima. Pasono para nkhulomba nkhuyezgeska kuzunura vinthu viwemi na viheni ivyo vyanichitikira pa zuŵa ilo. Pakuti ivyo vikuchitika pa zuŵa vikuŵa vyakupambanapambana, ivi vikunovwira kuti malurombo ghane ghaleke kuŵa ghakusunga waka pamtima.
[Bokosi/Chithuzithuzi]
Limanyani Makora Baibolo
1. Sankhani nkhani iyo mukukhumba kuŵerenga. Lombani Yehova kuti wamupani vinjeru kuti muyipulikiske.
2. Ŵerengani mwakupwelelera chomene. Kuchimbilira yayi. Apo mukuŵerenga, mughanaghanirengepo, ndipo mujitore nga namwe mukaŵapo: Muŵe nga mukuwona ivyo vikuchitika, mukupulika mazgu gha ŵanthu ŵakuyowoya, ka mphepo kakuputa makora, mukucheta kachakurya, na vinyake. Ndipo wonani kuti nkhani iyo mukuŵerenga yikachitika nadi!
3. Ghanaghaniranipo pa ivyo mwaŵerenga. Jifumbani mafumbo nga agho ghali pasi apa:
● Chifukwa wuli Yehova wakalemba nkhani iyi mu Baibolo?
● Kasi pa ŵanthu awo ŵakuzunulika mu nkhani iyi ninjani uyo ningamuyezga, ndipo ninjani uyo nkhwenera yayi kumuyezga?
● Kasi ni fundo wuli iyo nasambira mu nkhani iyi iyo yinganovwira pa umoyo wane?
● Kasi nkhani iyi yikunisambizga vichi vya Yehova na umo wakuchitira vinthu?
4. Lombani lurombo lufupi kwa Yehova. Muphalirani ivyo mwasambira mu Baibolo kweniso umo muchitirenge kuti mulondezge ivyo mwasambira. Nyengo zose muwongenge Yehova chifukwa cha chawanangwa icho wamupani, Mazgu ghake, Baibolo!
[Chithuzithuzi]
“Mazgu ghinu ni nyali ku malundi ghane, na ungweru mu nthowa yane.”—Salimo 119:105.
[Bokosi/Chithuzithuzi]
Muŵikenge pakwamba vinthu vyakuzirwa
Kasi mukutondeka kulomba panji kusambira Baibolo chifukwa chakusoŵa nyengo? Usange ndimo viliri, ndikuti suzgo ni umo mukuwonera vinthu ivyo ni vyakukhumbikwa chomene pa umoyo winu.
Yezgani kuchita ivi: Ŵikani malibwe mu ndowo. Kufuma apo, thiranimo mchenga mpaka muzuzge.
Pasono khuturani mchenga na malibwe ghara pa malo ghawemi. Kufuma apo, yambani kuŵika mchenga mu ndowo na kumalizgira na malibwe. Mwawona kuti pasono mu ndowo mulije malo ghakukwana ghakuti malibwe ghose ghanjire chifukwa mwambira kuŵikamo mchenga.
Kasi tikusambirapo vichi apa? Baibolo likuti: “Musande ivyo ni vinthu vyakuzirwa chomene.” (Ŵafilipi 1:10) Para mukuŵika vinthu vichokovichoko nga, vyakusanguluska pa malo ghakwamba, mungasanga yayi nyengo yakuchitira vinthu vyauzimu ivyo ni vyakuzirwa chomene. Kweni para mukulondezga ulongozgi wa mu Baibolo uwo wuli pa Ŵafilipi 1:10, mungaŵa na nyengo yakwana yakuchitira vinthu vyauzimu kweniso vyakusanguluska. Kweni kuti ivi vichitike, vikuthemba pa vinthu ivyo mwasankha kuŵika pa malo ghakwamba.
[Chithuzithuzi]
Para mwapanda luŵa mu nyumba mukwenera kulipwelelera kuti likure makora, ndimo viliso na ubwezi winu na Chiuta