Davide Wakawopanga Yayi

Kasi ukucita wuli para ukopa?— Ukuluta kwa amama panji adada kuti ŵakovwire. Kweni paliso munthu munyake uyo wangakovwira. Ngwankhongono comene kuluska waliyose. Kasi ukumumanya?— Enya, ni Yehova. Tiye tisambire za munthu munyake uyo wali kulembeka mu Baibolo. Zina lake ni Davide. Wakamanya kuti Yehova wakumovwira nyengo zose, ntheura wakawopanga yayi.

Kufuma apo Davide wakaŵa bonda, ŵapapi ŵake ŵakamusambizga kutemwa Yehova. Ici cikawovwira Davide kuti waleke kopa nanga wangakumana na vinthu vyakofya. Wakamanya kuti Yehova ni mubwezi wake ndipo wamovwirenge. Panyengo yinyake, apo Davide wakaliskanga mberere, kukiza nkhalamu iyo yikakora mberere! Kasi ukumanya ico Davide wakacita? Wakayicimbizga na kuyikoma na mawoko ghake. Davide wakakomaso nkhalamira yati yakora mberere! Kasi ukughanaghana kuti ni njani wakawovwira Davide?— Enya, ni Yehova.

Pakaŵaso nyengo yinyake apo Davide wakalongora kuti wakopa yayi. Ŵaisrayeli ŵakatimbananga na Ŵafilisiti. Ŵafilisiti ŵakaŵa na msilikari munyake uyo wakaŵa mutali ndiposo mukuru. Zina lake wakaŵa Goliyati. Msilikari uyu wakanyozanga Ŵaisrayeli na Yehova. Goliyati wakaphalira Ŵaisrayeli kuti ŵalute na kutimbana nayo. Kweni Ŵaisrayeli wose ŵakawopa. Davide wati wapulika, wakaphalira Goliyati kuti: ‘Nitimbanenge nawe! Yehova wanovwirenge, ndipo nikuthereskenge!’ Kasi ukughanaghana kuti Davide wakawopa yayi?— Enya, wakawopa yayi. Kasi ukukhumba kumanya ico cikacitika?

Davide wakatora fyata na malibwe ghankhondi, ndipo wakaluta kukatimbana na Goliyati. Goliyati wati wawona Davide wakamudelera cifukwa wakaŵa mwana mucoko. Kweni Davide wakamuphalira kuti: ‘Iwe ukwiza kwa ine na lupanga, kweni ine nkhwiza kwa iwe mu zina la Yehova.’ Wakaŵika libwe mu fyata, kucimbilira uko kukaŵa Goliyati, na kuponya. Libwe likatimba pa cisko ca Goliyati. Goliyati wakawa pasi, ndipo wakafwira papo. Ŵafilisiti ŵakawopa na kucimbira. Nchivici ico cikawovwira Davide, uyo wakaŵa mucoko, kuti wakome Goliyati?— Yehova ndiyo wakamovwira. Yehova wakaŵa wankhongono kuluska Goliyati!

Kasi ukusambirako vici kwa Davide mu nkhani iyi?— Yehova ngwankhongono kuluska munthu waliyose. Ndipo ni mubwezi wako. Ntheura, para ukopa, kumbuka kuti Yehova wakovwirenge kuti uleke kopa!