Ŵani Ŵakugomezgeka kwa Munyinu

Yehova wakukhumba kuti tiŵe ‘ŵakugomezgeka.’ (Salmo 18:25) Kugomezgeka nkhwakukhumbikwa comene mu nthengwa, cifukwa para mfumu na muwoli ŵakuleka kugomezgana, citemwa cikumara.

Mazuŵa ghano, ŵanthu ŵanandi ŵakugomezgeka yayi mu nthengwa. Kuti muvikilire nthengwa yinu pali vinthu viŵiri ivyo mukwenera kucita.

1 MANYANI KUTI NTHENGWA YINU NJAKUZIRWA COMENE

IVYO BAIBOLO LIKUYOWOYA: “Musande ivyo ni vinthu vyakuzirwa comene.” (Ŵafilipi 1:10) Nthengwa yinu nchimoza mwa vinthu vyakuzirwa comene pa umoyo winu. Ntheura mukwenera kuyipwelelera.

Yehova wakukhumba kuti mumutemwenge comene mfumu panji muwoli winu na kukondwera lumoza. (Mupharazgi 9:9) Wakukhumba yayi kumusula munyinu. Kweni wakukhumba kuti mupenjenge nthowa za kumukondweskera. (1 Ŵakorinte 10:24) Mucitirani vinthu ivyo vingalongora kuti ngwakukhumbikwa.

IVYO MUNGACITA:

• Mucezgenge na munyinu na kutegherezga para wakuyowoya

• Mughanaghaniranenge

2 VIKILIRANI MTIMA WINU

IVYO BAIBOLO LIKUYOWOYA: “Waliyose uyo wakulutilira kulaŵiska mwanakazi na kuŵa nayo na khumbiro, wacita nayo kale uleŵi mu mtima wake.” (Mateyu 5:28) Usange munthu wakughanaghanira vya uzaghali, ndikuti ngwakugomezgeka yayi kwa mfumu panji muwoli wake.

Yehova wakuti ‘muvikilire mtima winu.’ (Zintharika 4:23; Yeremiya 17:9) Kuti mucite nthena, mukwenera kuvikilira maso ghinu. (Mateyu 5:29, 30) Yezgani Yobu, uyo wakacita phangano na maso ghake kuti waleke kulaŵiska mwali na khumbo liheni. (Job 31:1) Ŵikanipo mtima kuti muleke kuwonelera vyamuziro. Lekani kuphotokerana panji kucita myati yambura kwenelera na munthu uyo ni mfumu panji muwoli winu yayi.

IVYO MUNGACITA:

• Ŵanthu ŵakwenera kumanya kuti mukumutemwa comene mfumu panji muwoli winu

• Ghanaghanirani munyinu, ndipo usange wakukondwa yayi na munthu munyake uyo mukucezga nayo, mazgani ubwezi uwo