Para Mwasangana na Suzgo

Nanga mungayezgayezga kuti muŵe ŵakukondwa mu mbumba yinu, mungasangana na vinthu vyamabuci ivyo vingamupokani cimwemwe. (Mupharazgi 9:11) Ciuta wakutovwira pasuzgo. Usange mulondezgenge fundo za mu Baibolo izo zili pasi apa, imwe na mbumba yinu muzizipizgenge suzgo lililose, nanga lingaŵa likuru.

1 GOMEZGANI YEHOVA

BAIBOLO LIKUTI: ‘Muthulirani vyenjezgo vinu vyose, cifukwa wakumupwelelerani.’ (1 Petrosi 5:7) Kumbukani kuti ni Ciuta yayi uyo wakumuyezgani. (Yakobe 1:13) Para mukuŵa nayo pafupi, wamovwiraninge. (Yesaya 41:10) “Pungulirani pamaso pake mitima yinu.”—Salmo 62:8.

Kweniso, mungapembuzgika usange mukuŵazga na kusambira Baibolo zuŵa lililose. Para mucitenge nthena, muzamuwona umo Yehova ‘wakutisanguluskira mu suzgo yithu yose.’ (2 Ŵakorinte 1:3, 4; Ŵaroma 15:4) Ciuta wakulayizga kuti wamupaninge ‘mtende [wake] uwo ukuluska ghanoghano lililose.’—Ŵafilipi 4:6, 7, 13.

IVYO MUNGACITA:

• Lombani Yehova kuti mtima uzike kweniso kuti mughanaghane makora

• Pa ivyo mukukhumba kucita sankhanipo ico nchiwemi comene

2 JIPWELELERANI PAMOZA NA MBUMBA YINU

BAIBOLO LIKUTI: “Mtima wa wavinjeru ukupokelera mahara, ndipo khutu la wamahara likupenja umanyi.” (Zintharika 18:15) Yowoyani na ŵamumbumba yinu kuti mumanye umo vinthu viliri. Manyani ico waliyose mu mbumba yinu wakukhumba. Yowoyani nawo. Tegherezgani para ŵakuyowoya.—Zintharika 20:5.

Wuli usange mubali winu wafwa? Kucita soni yayi kulira panji kuyowoya umo mukujipulikira. Kumbukani kuti nanga ni “Yesu wakathiska masozi.” (Yohane 11:35; Mupharazgi 3:4) Mugonenge na kupumura mwakukwana. (Mupharazgi 4:6, NW) Ivi vingamovwirani kuti muzizipizge.

IVYO MUNGACITA:

• Mudumbiskanenge na mbumba yinu nyengo zose, para kwacitika suzgo pera yayi. Para mucitenge nthena, ŵamumbumba yinu ŵazamufwatuka kuyowoya namwe para mwasangana na suzgo.

• Mungafumba awo ŵali kukumanapo na suzgo lakuyana waka

3 PEMPHANI WOVWIRI

BAIBOLO LIKUTI: “Mwanase wakutemwa nyengo zose, ndipo mwanamunyako wakubabiwira kovwira mu suzgo.” (Zintharika 17:17) Ŵanthu ŵangakhumba kumovwirani, kweni ŵangamanya yayi ivyo ŵangacita. Ŵaphalirani ivyo mukukhumba. (Zintharika 12:25) Kweniso pemphani wovwiri wauzimu ku awo ŵakulimanya makora Baibolo. Ulongozgi wa mu Baibolo uwo ŵamupaninge umovwiraninge.—Yakobe 5:14.

Musangenge wovwiri para mukucezga na ŵanthu awo ŵali na cipulikano mwa Ciuta ndiposo ŵakugomezga ivyo wali kulayizga. Kweniso mupembuzgikenge usange mukukhwimiska awo ŵakusuzgika. Ŵaphaliraniko vya Yehova na ivyo wali kulayizga. Nyengo zose movwirenge awo mbakusoŵerwa, ndipo mungajipaturanga yayi ku ŵanthu awo ŵakumutemwani.—Zintharika 18:1; 1 Ŵakorinte 15:58.

IVYO MUNGACITA:

• Phalirani mubwezi winu wapamtima kuti ŵamovwirani

• Yowoyani ivyo mukukhumba