Wakachita Munthondwe Wakwamba Pa Ukwati

Ili likaŵa zuŵa lachitatu kufuma apo Nataniyeli wakaŵira msambiri wa Yesu. Yesu pamoza na ŵasambiri ŵake ŵanyake ŵakalazga kumpoto ku chigaŵa cha Galileya, uko kukaŵa kukwawo. Iwo ŵakaluta ku tawuni ya Kana. Tawuni iyi ndiko kukaŵa kukwake kwa Nataniyeli. Tawuni iyi yili mu chigaŵa cha mapiri cha Nazarete. Yesu nayo wakakulira mu chigaŵa ichi. Ŵanthu aŵa ŵakachemeka ku chiphikiro cha ukwati.

Anyina Yesu nawo ŵakaluta ku ukwati uwu. Pakuti Mariya wakaŵa mubwezi wa awo ŵakatorananga, wakaŵawovwiranga kupokelera ŵalendo awo ŵakiza ku ukwati uwu chifukwa ŵakaŵa ŵanandi chomene. Mariya wakamanya luŵiro kuti vinyo lapeleŵera ndipo wakaphalira Yesu kuti: “Ŵalije vinyo.”—Yohane 2:3.

Apa Mariya wakapemphanga kuti Yesu wachitepo kanthu mwakuti vinyo liŵepo. Yesu wakayowoya mazgu ghakulongora kuti wakakhumbanga yayi kwendera vya anyina, wakati: “Wamwanakazi, kasi iwe na ine vikutikhwaska wuli?” (Yohane 2:4) Pakuti Chiuta ndiyo wakamuŵika kuŵa Themba, Yesu wakakhumbanga kuti Awiske ŵakuchanya ndiwo ŵamuphalirenge chakuchita, ŵamunyumba yake yayi, nesi ŵabwezi ŵake. Pakuti Mariya wakaŵa wamahara, wakaleka nkhani iyi mu mawoko gha Yesu. Kweni wakaphalira waka awo ŵakatokatokanga pa ukwati kuti: “Chitani chilichose icho wamuphaliraninge.”—Yohane 2:5.

Pakaŵa viŵiya vya maji 6. Chilichose mukanjiranga malita 40. Yesu wakatuma ŵalinda kuti: “Mu viŵiya zuzganimo maji.” Kufuma apo, Yesu wakati: “Sono neghanimo na kuluta nalo kwa mulara wa chiphikiro.”—Yohane 2:7, 8.

Mulara wa chiphikiro wakakondwa nalo chomene vinyo lira, chifukwa likaŵa liwemi chomene kweni wakamanya yayi uyo wakapanga. Iyo wakachema mweneko wa nthengwa na kumuphalira kuti: “Munthu waliyose wakudankha kufumiska vinyo liwemi, ndipo para ŵanthu ŵaloŵera wakufumiska liheni. Iwe wasunga vinyo liwemi m’paka sono.”—Yohane 2:10.

Uwu ukaŵa munthondwe wakwamba uwo Yesu wakachita. Ŵasambiri ŵake ŵakati ŵawona munthondwe uwu, ŵakaŵa na chipulikano chikuru mwa iyo. Penepapo Yesu, anyina, na ŵanung’una ŵake ŵakaluta ku msumba wa Kaperenaumu, mumphepete mwa Nyanja ya Galileya.