Mulara wa Ŵasilikari Wakaŵa na Chipulikano Chikuru

Yesu wakati wamara Upharazgi wake pa Phiri, wakaluta ku msumba wa Kaperenaumu. Ŵalara ŵa Ŵayuda ŵakiza kwa iyo kwenekura. Ŵanthu aŵa ŵakatumika na mulara wa ŵasilikari ŵa Romu.

Msilikari uyu wakaŵa na muteŵeti wake uyo wakalwara chomene pafupi kufwa. Nangauli mulara wa ŵasilikari uyu wakaŵa Wamitundu, kweni wakakhumbanga kuti Yesu wamovwire. Ŵayuda ŵakaphalira Yesu kuti muteŵeti wa munthu yura “wagona pasi mu nyumba chifukwa cha nthenda ya kufwa viŵaro, ndipo wakusuzgika chomene.” (Mateyu 8:6) Ŵalara ŵa Ŵayuda ŵakaphalira Yesu kuti msilikari uyu wakaŵa wakwenelera kuti wamovwire. Ŵakati: “Chifukwa wakutemwa mtundu withu ndipo wali kutizengera sunagoge.”—Luka 7:4, 5.

Nyengo yeneyiyo, Yesu wakanyamuka pamoza na ŵalara ŵara kuya ku nyumba ya mulara wa ŵasilikari. Apo ŵakaŵa pafupi kufika pa nyumba, msilikari yura wakatuma ŵabwezi ŵake kukayowoya kuti: “Dada, mungasuzgikanga yayi, pakuti ndine munthu wakwenelera chara kuti imwe munjire mu nyumba yane. Lekani nkhatondeka kwiza ndekha kwa imwe.” (Luka 7:6, 7) Apa msilikari uyu wakajiyuyura chomene, chifukwa kanandi wakaphaliranga waka ŵanthu chakuchita! Ivyo msilikari uyu wakachita vikapambana chomene na Ŵaroma ŵanyake awo ŵakachitiranga nkhaza ŵazga.—Mateyu 8:9.

Tikukayika yayi kuti msilikari uyu wakamanyanga makora kuti Ŵayuda ŵakachezganga bweka yayi na ŵanthu ŵa mitundu yinyake. (Milimo 10:28) Panji lekani msilikari yura wakatuma ŵabwezi ŵake kuti ŵakaphalire Yesu kuti: “Yowoyani waka mazgu, kuti muteŵeti wane wachire.”—Luka 7:7.

Yesu wakati wapulika mazgu agha, wakazizwa chomene, ndipo wakati: “Nkhumuphalirani kuti, mu Israyeli nindasangemo chipulikano chikuru nthena.” (Luka 7:9) Ŵabwezi ŵara ŵakati ŵawelera ku nyumba ya msilikari, ŵakasanga muteŵeti yura wachira.

Yesu wakati wachizga muteŵeti yura, wakasangirapo mwaŵi kuyowoya kuti ŵanthu ŵa mitundu yinyake awo ŵali na chipulikano, nawo ŵatumbikikenge. Wakati: “Ŵanandi ŵa kumafumiro gha dazi na kumanjiliro gha dazi ŵamwiza na kukhala pa thebulu pamoza na Abrahamu na Yisake na Yakhobe mu Ufumu wakuchanya.” Kweni Ŵayuda ŵambura chipulikano ke? Yesu wakati “ŵazamuponyeka kuwaro ku chisi. Kwenekura ndiko ŵamulilira na kuska mino.”—Mateyu 8:11, 12.

Ntheura Ŵayuda awo ŵakakana mwaŵi uwo ukadankha kupika kwa iwo wakuti ŵakaŵe mu Ufumu wa Khristu ŵazamuŵamo yayi. Kweni ŵanthu ŵa mitundu yinyake ŵazamupokelereka. Ŵazamuŵa nga ŵakhala pa thebulu lake “mu Ufumu wakuchanya.”