Kumanya Udindo wa Khristu

“PAKWAMBA, Chiuta wakalenga kuchanya na charu chapasi” ndipo vyose ivyo wakapanga “vikaŵa viwemi chomene.” (Gen. 1:1, 31) Yehova wakalenga ŵanthu kuti ŵaŵe ŵakukondwa muyirayira. Kweni ŵanthu ŵakalutilira yayi kukondwa chifukwa cha kugaluka uko kukachitika mu Edeni. Kweni khumbo la Yehova likasintha yayi. Chiuta wakalongora kuti mphapu yakupulikira ya Adamu yizamuwomboleka. Ŵanthu ŵazamusopangaso mwaunenesko ndipo Chiuta wazamuparanya Satana Dyabulosi pamoza na ntchito zake zose ziheni. (Gen. 3:15) Vinthu vizamuŵaso “viwemi chomene.” Yehova wazamutuma Mwana wake, Yesu Khristu kuti wafiske vyose ivi. (1 Yoh. 3:8) Ntheura tikukhumbikwira kumanya udindo wa Khristu na kuwuzomerezga.—Mil. 4:12; Fil. 2:9, 11.

UDINDO WA KHRISTU

² Khristu wali na maudindo ghanandi. Ni Muwomboli, Wasembe Mukuru, Mutu wa mpingo wa Ŵakhristu ŵaunenesko, ndipo sono ni Themba la Ufumu wa Chiuta. Para tikughanaghanira maudindo agha, tikumuwonga chomene Chiuta kweniso tikwamba kumutemwa chomene Khristu Yesu. Baibolo likulongosoraso maudindo ghanyake gha Yesu.

³ Apo Yesu wakaŵa pa charu chapasi, wakalongora kuti ŵanthu ŵakupulikira ŵaphemanenge na Chiuta kwizira mwa iyo. (Yoh. 14:6) Pakuŵa Muwomboli, Yesu wakajipeleka kuŵa sembe yakuwombora ŵanthu ŵanandi. (Mat. 20:28) Yesu wakupulikira Chiuta, ndipo wali na udindo ukuru chomene pakufiska ivyo Yehova wakukhumba kuchitira ŵanthu. Tiliso paubwezi na Chiuta chifukwa cha Yesu. (Mil. 5:31; 2 Kor. 5:18, 19) Nyifwa ya Yesu na chiwuka chake, vikajura nthowa yakuti ŵanthu ŵakupulikira ŵazakasange vitumbiko vyamuyirayira ivyo vizenge na Ufumu wa Chiuta.

⁴ Pakuŵa Wasembe Mukuru, Yesu ‘wakutichitira chitima’ chifukwa wakumanya kuti tili ŵakulopwa, ndipo wakutiphepiskira kwa Chiuta kuti watigowokere zakwananga zithu. Mpositole Paulosi wakati: “Wasembe mukuru uyo tili nayo wangaleka yayi kutichitira chitima pa kulopwa kwithu, chifukwa nayo wakayezgeka mu vyose nga ndise, kweni wakanangapo yayi.” Ndipo Paulosi wakachiska awo ŵakupulikana mwa Yesu Khristu kuti ŵaphemane na Chiuta. Wakati: “Na wanangwa wa kuyowoya, tiyeni tisendelere ku chitengo cha uyo wali na lusungu lukuru mwakuti tipokere lusungu na kusanga lusungu lukuru kuti vitovwire pa nyengo yakwenelera.”—Heb. 4:14-16; 1 Yoh. 2:2.

⁵ Kweniso Yesu ni Mutu wa mpingo Wachikhristu. Nga umo vikaŵira na ŵalondezgi ŵake ŵakwambilira, nase mulongozgi withu ni Yesu. Yesu wakulongozga kwizira mu mzimu utuŵa ndiposo kwizira mu ŵalara. Ŵalara ŵazamupatawura pamaso pake na pamaso pa Awiske ŵakuchanya umo ŵakuliskira mskambo wa Chiuta. (Heb. 13:17; 1 Pet. 5:2, 3) Pakuyowoya vya Yesu, Yehova wakati: “Wonani! Namuŵika kuŵa kaboni ku mitundu, mudangiliri na mulongozgi ku ŵamitundu.” (Yes. 55:4) Mazgu agha ghakafiskika apo Yesu wakaphalira ŵasambiri ŵake kuti: “Mungachemekanga ŵalongozgi chara, pakuti Mulongozgi winu njumoza, Khristu.”—Mat. 23:10.

⁶ Yesu wakalongora kuti wakukhumbisiska kutovwira. Iyo wakati: “Zani kwa ine, imwe mose mukuphyoka na kunyekezgeka, ndipo nimupumuzganinge. Yeghani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamupumuzgika. Chifukwa joko lane ndipusu na katundu wane ngwakupepuka.” (Mat. 11:28-30) Yesu Khristu wakuzikira pakulongozga mpingo wa Ŵakhristu ŵaunenesko ndipo malango ghake ngakuvuska chara. Walongora kuti ni “muliska muwemi,” chifukwa wakuchita nga ni Yehova, Awiske ŵakuchanya.—Yoh. 10:11; Yes. 40:11.

⁷ Mu kalata yakwamba iyo Paulosi wakalembera Ŵakorinte, wakalongosora udindo unyake wa Yesu Khristu. Wakati: “Wakwenera kuwusa nga ni themba m’paka Chiuta waŵike ŵalwani wose ku malundi ghake. . . . Kweni para vinthu vyose vyazakaŵa pasi pake, Mwana nayo wazamuŵa pasi pa Uyo wakaŵika vinthu vyose pasi pa iyo, mwakuti Chiuta waŵe vinthu vyose kwa waliyose.” (1 Kor. 15:25, 28) Pambere wandize pa charu chapasi, Yesu wakaŵa “misiri” wa Chiuta, pakuti iyo ndiyo wakamba kulengeka. (Zinth. 8:22-31) Apo Yesu wakaŵa pa charu chapasi, nyengo zose wakachitanga khumbo la Chiuta. Yesu wakazizipizga chiyezgo chikuru chomene ndipo wakalutilira kugomezgeka kwa Awiske m’paka apo wakafwira. (Yoh. 4:34; 15:10) Pakuti Yesu wakagomezgeka m’paka nyifwa, Chiuta wakamuwuska na kumuŵika kuŵa Themba la Ufumu wakuchanya. (Mil. 2:32-36) Chiuta wali kupa Khristu ntchito yikuru chomene yakuti walongozge ŵangelo apo ŵazamuwuskapo muwuso wa ŵanthu na uheni wose pa charu chapasi. (Zinth. 2:21, 22; 2 Tes. 1:6-9; Chivu. 19:11-21; 20:1-3) Charu chose chapasi chizamuŵa pasi pa Ufumu wa Chiuta, uwo themba lake ni Khristu.—Chivu. 11:15.

KASI TINGALONGORA WULI KUTI TIKUMANYA UDINDO WA KHRISTU?

⁸ Mulongozgi withu Yesu Khristu ni murunji. Wali kupika udindo wakuti watipwelelere. Kuti Yesu watipwelelere, tikwenera kuŵa ŵakugomezgeka kwa Yehova na kwendera lumoza na gulu lake.

⁹ Ŵalondezgi ŵa Yesu ŵakwambilira ŵakamanyanga makora udindo wa Khristu. Iwo ŵakateŵeteranga mwakukolerana ndipo Khristu ndiyo wakaŵalongozganga. Kweniso ŵakapulikiranga ulongozgi wake uwo wakapelekanga kwizira mu mzimu utuŵa. (Mil. 15:12-21; Chivu. 1:1) Mpositole Paulosi wakayowoya kuti mpingo wa Ŵakhristu ŵakuphakazgika ukaŵa wakukolerana. Wakati: “Uku tikuyowoya unenesko, tiyeni tikurenge mu vinthu vyose mu chitemwa mwakuyana na uyo ni mutu, Khristu. Kwizira mwa iyo, viŵaro vyose vya thupi vikukumana makora pamoza ndipo chilichose chikovwirana na chinyake kuti vipeleke ivyo thupi likukhumba. Para chiŵaro chilichose chikugwira ntchito mwakwenelera, thupi likukura na kujizenga mu chitemwa.”—Efe. 4:15, 16.

¹⁰ Para waliyose mu mpingo wakukolerana na ŵanyake na kupulikira ulongozgi wa Khristu, mpingo ukukura ndipo pakuŵa chitemwa, icho “chikukakilira ŵanthu pamoza.”—Yoh. 10:16; Kol. 3:14; 1 Kor. 12:14-26.

¹¹ Vinthu ivyo vikuchitika mu charu vikufiska uchimi wa mu Baibolo ndipo vikulongora kuti kwambira mu 1914, Yesu Khristu wali kupika mazaza gha Uthemba. Pa nyengo yasono iyo wakulamulira pakati pa ŵalwani ŵake. (Sal. 2:1-12; 110:1, 2) Kasi fundo iyi yikung’anamurachi kwa awo sono ŵali pa charu chapasi? Sonosono apa Yesu walongorenge udindo wake nga ni Themba la mathemba na Fumu ya mafumu, apo wapelekenge cheruzgo cha Chiuta pa ŵalwani ŵake. (Chivu. 11:15; 12:10; 19:16) Ŵanthu ŵakati ŵagaluka waka, Yehova wakalayizga kuti wazamuponoska awo ŵali ku woko lamalyero la Khristu. Layizgo ili lifiskikenge. (Mat. 25:34) Tili ŵakukondwa chomene kumanya udindo wa Khristu. Apo Khristu wakutilongozga mu mazuŵa gha umaliro agha, tiyeni tilutilire kukolerana kuti tichite makora ntchito ya kupharazga pa charu chose!