Malo Ghakusoperapo

AWO ŵakusopa Yehova ŵakuwungana pamoza kuti ŵasambire na kukhwimiskana. (Heb. 10:23-25) Malo ghakwamba agho Ŵaisrayeli ŵakasoperangapo ghakachemekanga kuti “chihema chakupatulika” panji kuti “chihema chakukumanamo.” (Eks. 39:32, 40) Pamanyuma, Solomoni mwana wa Davide wakazenga nyumba, panji kuti tempile kuti Chiuta wapike uchindami. (1 Mathe. 9:3) Tempile likati labwangandulika mu 607 B.C.E., Ŵayuda ŵakamba kusopera mu masunagoge. Tempile likati lazengekaso, Ŵayuda ŵakambaso kusoperamo Chiuta waunenesko. Yesu wakasambizganga ŵanthu mu masunagoge na mu tempile. (Luka 4:16; Yoh. 18:20) Zuŵa linyake Yesu wakachitiska ungano pa phiri.—Mat. 5:1–7:29.

² Yesu wakati wafwa, Ŵakhristu ŵakawungananga mu nyumba zawo, na malo ghanyake kuti ŵasambizge ŵanthu Malemba, ndiposo kuchezga na Ŵakhristu ŵanyawo. (Mil. 19:8, 9; Rom. 16:3, 5; Kol. 4:15; Filim. 2) Nyengo zinyake Ŵakhristu ŵakakumananga mu malo ghakubisika kuti ŵanthu awo ŵakaŵayuzganga ŵaleke kumanya. Kale, ŵateŵeti ŵa Chiuta ŵakugomezgeka ŵakawungananga pa malo ghakusoperapo kuti ‘ŵasambizgike na Yehova.’—Yes. 54:13.

³ Lero napo, Ŵakhristu ŵakuwungana mu nyumba za ŵabali na malo ghanyake. Kanandi ŵakuwungana mu nyumba za ŵabali kuti ŵanozgekere upharazgi. Awo ŵakuzomera kuti nyumba zawo ŵabali ŵawunganengemo, ŵakuwona kuti uwu ni mwaŵi ukuru. Ŵanandi ŵawona kuti ŵatumbikika mwauzimu chifukwa cha kuchita nthena.

NYUMBA YA UFUMU

⁴ Nyumba ya Ufumu ni malo agho Ŵakaboni ŵa Yehova ŵakuwunganamo. Kanandi ŵakugura malo na kuzengapo Nyumba ya Ufumu, ndipo nyengo zinyake ŵakugura nyumba na kuyinozga. Usange ntchakwenelera, mipingo yinandi yikuwungana mu Nyumba ya Ufumu yimoza kuti gulu lileke kunanga ndalama zinandi. Ku malo ghanyake, ŵakupanga waka renti holo. Para Nyumba ya Ufumu yazengeka waka panji ŵanozga vinthu vinandi chomene, ntchiwemi kuti payowoyeke nkhani yakupatulira nyumba iyo. Kweni para Nyumba ya Ufumu yakale ŵanozga vinthu vichoko waka, palije chifukwa chakuŵira na nkhani yakupatuliraso nyumba iyo.

⁵ Nyumba ya Ufumu yingaŵanga yakutowa mwakujumphizga yayi. Chilato chithu ntchakuti ŵanthu ŵatiwone yayi. Nangauli Nyumba za Ufumu zikuyana yayi kazengero, kweni ntchito yake yikuyana waka. (Mil. 17:24) Kuyana na umo vinthu viliri uko mukukhala, Nyumba ya Ufumu yikwenera kuŵa yiwemi, yakwenelera kusoperamo Yehova.

⁶ Ŵakaboni ŵa Yehova ndiwo ŵakupeleka ndalama zakunozgera Nyumba ya Ufumu yawo. Pakuŵavya kwendeska mbale kuti ŵanthu ŵaŵikemo ndalama, nesi kupempheska. Pa Nyumba ya Ufumu pakuŵa bokosi la vyakupeleka ilo awo ŵiza pa maungano ŵangaŵikamo ndalama kuti zovwire kulipilira vinthu ivyo ŵakugwiliskira ntchito pa nyumba iyi. Ŵakupeleka ndalama mwambura kuchichizgika, kufumira pasi pamtima.—2 Kor. 9:7.

⁷ Waliyose mu mpingo wakwenera kumanya kuti ni udindo wake kupeleka ndalama panji kujipeleka kunozga Nyumba ya Ufumu kuti yiwonekenge makora nyengo zose. Mulara panji muteŵeti wakovwira wakusankhika kuti walembe ndondomeko yakupwelelera Nyumba ya Ufumu. Kanandi, magulu gha uteŵeti ndigho ghakutozga malo, ndipo mulaŵiliri wa gulu panji movwiri wake ndiwo ŵakulongozga. Nyumba ya Ufumu yikwenera kuŵa yakutowa mukati na kuwaro. Para njakutowa, yingalongora kuti tikusopa nadi Yehova uyo ni mutuŵa kweniso ŵanthu ŵakuchindika gulu lake.

⁸ Para mipingo yinandi yikuwungana mu Nyumba ya Ufumu yimoza, ŵalara ŵa mipingo iyi ŵakusankha Komiti Yakulaŵilira Nyumba ya Ufumu. Komiti iyi yikulemba ndondomeko yakuti mipingo iyi yipwelelerenge Nyumba ya Ufumu. Mawupu gha ŵalara ghakusankha mubali yumoza kuti waŵe mulaŵiliri wa komiti iyi. Komiti iyi yikugwira ntchito mwakulongozgeka na mawupu gha ŵalara. Yikuwona usange Nyumba ya Ufumu yikupwelelereka, ndiposo kuti vyakugwilira ntchito vilipo vyakukwana. Mipingo yose yikwenera kuŵa yakukolerana.

⁹ Para mipingo yinandi yikuwungana mu Nyumba ya Ufumu yimoza, ŵalara ŵakupangana nyengo ya maungano. Para ŵalara ŵakhumba, ŵangasinthana nyengo yakwambira maungano para chaka chamara. Panyengo iyo ŵalara ŵakudumbiskana vya kusinthana nyengo ya maungano, ŵakwenera kughanaghanirana na kulongora kuti ŵakutemwana. (Fil. 2:2-4; 1 Pet. 3:8) Paŵavye mpingo wakuti usankhirenge vyakuchita mipingo yinyake. Para mulaŵiliri wa dera wakuchezgera mpingo, mipingo yinyake iyo yikukumana mu Nyumba ya Ufumu iyi, yikwenera kusintha nyengo ya maungano mu sabata iyi.

¹⁰ Komiti ya Uteŵeti ya Mpingo yingazomerezga kuti mu Nyumba ya Ufumu muyowoyekere nkhani ya ukwati panji ya nyifwa. Pakukaka fundo, ŵalara aŵa ŵakwenera kulondezga ulongozgi uwo ofesi yili kuŵapa.

¹¹ Awo ŵazomerezgeka kugwiliskira ntchito Nyumba ya Ufumu pa vinthu nga ni ivi, ŵakwenera kulongora nkharo yiwemi. Pa Nyumba ya Ufumu paleke kuchitika vinthu ivyo vingakhuŵazga mpingo panji kuyuyura Yehova na kunanga mbiri yiwemi ya mpingo. (Fil. 2:14, 15) Nyengo zinyake, ofesi yingazomerezga kuti pa Nyumba ya Ufumu pachitikire vinthu vinyake vyauzimu, nga ni Sukulu ya Uteŵeti wa Ufumu na Sukulu ya Ŵapayiniya.

¹² Nyengo zose mpingo ukwenera kuchindika malo gha maungano. Kavwaliro na kawonekero kithu, kakwenera kupeleka ntchindi kwa Yehova. (Muph. 5:1; 1 Tim. 2:9, 10) Para tikulondezga ulongozgi uwu, tikulongora kuti tikuchindika maungano ghithu.

¹³ Ntchakuzirwa chomene kuti pa nyengo ya maungano paleke kuŵa nthimbanizgo. Ntchiwemi kuti ŵana ŵakhalenge lumoza na ŵapapi ŵawo. Ŵapapi awo ŵali na ŵana ŵakwenera kukhala pa malo agho ŵangafumira luŵiro kuwaro para ŵana ŵamba kusuzga kuti ŵakaŵavwire kweniso kuti ŵaleke kutimbanizga ŵanyawo.

¹⁴ Ŵabali ŵakwenelera ndiwo ŵakusankhika kuŵa ŵalinda pa Nyumba ya Ufumu. Ŵakwenera kuŵa maso, ŵaubwezi na ŵamahara. Ŵakwenera kupokelera ŵalendo, kuŵatawuzga, kuŵalongora malo ghakukhala awo ŵiza mwakuchedwa, kupenda awo ŵiza pa maungano, kujura na kujara mawindo. Ŵalinda ŵakwenera kukumbuska ŵapapi kuti ŵapwelelerenge ŵana ŵawo. Ŵangakumbuska ŵapapi kuti ŵawovwire ŵana ŵawo kuti ŵaleke kuchimbirachimbira panji kuseŵera pa pulatifomu pambere maungano ghandayambe panji para ghamara waka. Para mwana wakusuzga, ntchiwemi kuti mulinda wapemphe mupapi mwantchindi kuti wafumire kuwaro na mwana wake kuti ŵanyake ŵaleke kutimbanizgika. Ntchito iyo ŵalinda ŵakugwira yikovwira kuti waliyose wakondwenge pa maungano. Ntchiwemi kuti ŵalara na ŵateŵeti ŵakovwira ndiwo ŵaŵenge ŵalinda.

KUZENGA NYUMBA ZA UFUMU

¹⁵ Mu nyengo ya Ŵakhristu ŵakwambilira, Ŵakhristu ŵanyake ŵakaŵa ŵakusanga makora kuluska ŵanyawo. Lekani mpositole Paulosi wakalemba kuti: “Ivyo vyakhalapo kwa imwe visazgike pa kupeleŵera kwawo, mwakuti ivyo vyakhalapo kwa iwo visazgikeso pa kupeleŵera kwinu, mwakuti kuyana kuŵepo.” (2 Kor. 8:14) Lero napo “kuyana” kulipo. Ndalama izo mipingo yikupeleka pa charu chose zikovwira kuzenga na kunozga Nyumba za Ufumu. Gulu la Chiuta na mipingo iyo yikovwirika na ndalama izi, yikuwonga chomene wovwiri uwo ŵabali ŵakupeleka.

¹⁶ Ofesi ndiyo yikugaŵira mipingo Nyumba za Ufumu izo yikwenera kuwunganamo. Ofesi ndiyo yikusankha malo na nyengo yakuzengera Nyumba ya Ufumu yiphya kweniso kunozga nyumba iyo ŵagura kuti yiŵe Nyumba ya Ufumu. Para kwachitika masoka ghachilengiwa ndipo Nyumba za Ufumu na nyumba za ŵabali zanangika, ofesi yikunozga Nyumba za Ufumu, ndipo nyengo zinyake nyumba za ŵabali nazo zikunozgeka.

¹⁷ Ofesi yikutuma ŵabali ŵanyake ŵakujipeleka kuti ŵawovwire kusanga malo, kulemba pulani, kupempha boma kuti liŵazomerezge, kuzenga na kunozga Nyumba za Ufumu. Pakuti Nyumba za Ufumu zinandi zikukhumbikwa, pakukhumbikwa ŵanthu ŵanandi kuti ŵajipeleke. Ŵapharazgi wose ŵakubatizika awo mbakwenelera ndipo ŵakukhumba kuchitako ntchito ya kuzenga Nyumba za Ufumu, ŵalembe fomu yakupempha uteŵeti uwu na kupeleka ku Komiti ya Uteŵeti ya Mpingo wawo. Ŵapharazgi ŵambura kubatizika nawo ŵangazengako panji kunozga Nyumba ya Ufumu yawo.

MALO GHAKUCHITIRAPO MAUNGANO

¹⁸ Ŵakhristu ŵakwambilira kanandi ŵakawungananga mu tumagulu tuchokotuchoko. Kweni nyengo zinyake kukizangaso “mzinda ukuru.” (Mil. 11:26) Mazuŵa ghano napo ŵanthu ŵa Yehova ŵanandi ŵakwiza pa maungano gha dera na gha chigaŵa. Nyengo zinyake ŵabali ŵakuchita renti maholo kuti ŵachitiremo maungano agha. Kweni para maholo ghakusangika yayi panji kulije malo ghakwenelera, ŵakuzenga Malo Ghakuchitirapo Maungano.

¹⁹ Nyengo zinyake ŵakugura nyumba yakuzengeka kale, ŵakuyinozga, na kwamba kuwunganamo. Kweni kanandi ŵakugura malo na kughanozga kuti ghaŵe ghakuchitirapo maungano. Malo ghakuchitirapo maungano ghakupambana ukuru, kuyana na ku malo uko. Ofesi ndiyo yikuzomerezga kugura malo agha panji kuzenga para yawona unandi wa ndalama izo zikukhumbikwa, na unandi wa ŵanthu awo ŵawunganenge pa malo agho.

²⁰ Ofesi yikusankha ŵabali kuti ŵapwelelerenge malo agha. Madera ndigho ghali na udindo wa kutozga na kunozga malo gha maungano nyengo zose. Ntchiwemi kuti ŵabali ŵajipelekenge kugwira ntchito iyi. Ntheura mipingo yikwenera kujipeleka na mtima wose.—Sal. 110:3; Mal. 1:10.

²¹ Nyengo zinyake pa malo gha ungano pangachitikira vinthu vinyake vyauzimu, nga ni masukulu na maungano ghapadera gha ŵalaŵiliri ŵa dera. Nga ni Nyumba ya Ufumu, Malo Ghakuchitirapo Ungano nagho ni malo ghakusoperapo Chiuta. Para tili pa malo gha ungano kuti tisope, nkharo yithu, kavwaliro na umo tajitozgera vikwenera kuchindika Yehova uyo tikumusopa nga umo vikuŵira para tikuwungana pa Nyumba ya Ufumu.

²² Ŵanthu ŵanandi ŵakuthilimukira ku gulu la Chiuta mu mazuŵa ghaumaliro agha. Uwu mbukaboni wakuti Yehova wakutumbika gulu lake. (Yes. 60:8, 10, 11, 22) Ntheura tikwenera kuŵa na malo ghawemi ghakusoperapo, na kughapwelelera na mtima wose. Para tikuchita nthena, tikulongora kuti malo agho tikuwunganapo ngakuzirwa. Ndipo para tili pa malo agha tikukhwimiskana, chomenechomene apo tikuwona zuŵa la Yehova likuneng’enera.