Chigaŵa 1: Ivyo Ŵakhristu Ŵakugomezga

Mwamanya unenesko chifukwa chakuti mwasambira Baibolo na Ŵakaboni ŵa Yehova. Ivyo mwasambira vyamovwirani kuti muŵe ŵabwezi ŵa Chiuta kweniso kuti muzakasange umoyo wamuyirayira mu paradiso para Ufumu wa Chiuta wiza pa charu chapasi. Mwamba kugomezga chomene Mazgu gha Chiuta, ndipo mwatumbikika chomene chifukwa cha kuŵira lumoza na ŵabali na ŵadumbu. Mwamanya umo Yehova wakuchitira na ŵanthu ŵake mazuŵa ghano.—Zek. 8:23.

Apo mukunozgekera kubatizika, muzamupindura chomene apo ŵalara ŵazamuweleramo namwe chigaŵa cha Ivyo Ŵakhristu Ŵakugomezga. (Heb. 6:1-3) Yehova walutilire kumutumbikani apo mukuyezgayezga kuti mumumanye makora. Mphanyi wazakamupani njombe iyo wali kulayizga.—Yoh. 17:3.

1. Chifukwa wuli mukukhumba kubatizika?

2. Kasi Yehova ni njani?

•“Yehova ndiyo ni Chiuta waunenesko mu mtambo kuchanya na charu chapasi kusi. Kulije munyake.”—Doto. 4:39.

• “Mwaŵeneimwe zina linu ni Yehova, ndimwe mwekha Wapachanya Nkhanira pa charu chose chapasi.”—Sal. 83:18.

3. Chifukwa wuli ntchakuzirwa kuti muzunurenge zina la Chiuta?

• “Ntheura, pakulomba mutenge: ‘Adada ŵithu imwe muli kuchanya, zina linu lituŵiskike.’”—Mat. 6:9.

• “Waliyose uyo wakuchema pa zina la Yehova wazamuponoskeka.”—Rom. 10:13.

4. Kasi mazina ghanyake agho ghakulongosora vya Yehova ni nga?

• “Yehova, Mlengi wa vigoti vya charu chapasi ni Chiuta muyirayira swii.”—Yes. 40:28.

• “Adada ŵithu imwe muli kuchanya”—Mat. 6:9.

• “Chiuta ntchitemwa.”—1 Yoh. 4:8.

5. Kasi mungamupa vichi Yehova Chiuta?

• “Utemwenge Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.”—Mrk. 12:30.

• “Yehova Chiuta wako ndiyo ukwenera kumusopa, ndipo ndiyo pera uyo ukwenera kumuchitira uteŵeti wakupatulika”—Luka 4:8.

6. Chifukwa wuli mukwenera kuŵa ŵakugomezgeka kwa Yehova?

• “Mwana wane, uŵe wavinjeru na kukondweska mtima wane, mwakuti nimuzgore uyo wakuninena.”—Zinth. 27:11.

7. Kasi mukwenera kulomba kwa njani, ndipo mu zina la njani?

• “Nadi [ine Yesu] nkhumuphalirani kuti, usange mulombenge kanthu kwa Adada ŵamupaninge mu zina lane.”—Yoh. 16:23.

8. Kasi ni vinthu wuli vinyake ivyo mungavizunura mu lurombo?

• “Pakulomba mutenge: ‘Adada ŵithu imwe muli kuchanya, zina linu lituŵiskike. Ufumu winu wize. Khumbo linu lichitike pano pasi nga nkhuchanya. Mutipe chakurya chithu cha zuŵa ili. Mutigowokere zakwananga zithu, nga umo nase taŵagowokera awo ŵatinangira. Ndipo mungatitoleranga mu kuyezgeka chara, kweni mutiwombore kwa muheni.’”—Mat. 6:9-13.

• “Ichi ntchigomezgo icho tili nacho mwa iyo, chakuti kanthu kalikose ako tingalomba mwakuyana na khumbo lake, wakutipulika.”—1 Yoh. 5:14.

9. Chifukwa wuli nyengo zinyake Yehova wakupulika yayi malurombo gha ŵanthu?

• “Pa nyengo iyo, ŵazamuchema Yehova kuti waŵawovwire, kweni wazamuŵazgora chara. . . . Chifukwa cha milimo yawo yiheni.”—Mika 3:4.

• “Maso gha Yehova ghali pa ŵarunji, ndipo makutu ghake ghakupulikizga maŵeyelero ghawo, kweni chisko cha Yehova chikususkana na awo ŵakuchita viheni.”—1 Pet. 3:12.

10. Kasi Yesu Khristu ni njani?

• “Simoni Petrosi wakazgora kuti: ‘Ndimwe Khristu, Mwana wa Chiuta wamoyo.’”—Mat. 16:16.

11. Chifukwa wuli Yesu wakiza pa charu chapasi?

• “Mwana wa munthu wakizira kuzakateŵetereka chara, kweni kuteŵetera na kupeleka umoyo wake kuŵa chiwombolero cha ŵanandi.”—Mat. 20:28.

• “[Ine Yesu] nkhweneraso kukapharazga makani ghawemi gha Ufumu wa Chiuta ku misumba yinyake, pakuti ndicho nkhatumikira.”—Luka 4:43.

12. Kasi mungalongora wuli kuti mukuwonga sembe yakuwombora iyo Yesu wakapeleka?

• “Wakaŵafwira wose kuti awo mbamoyo ŵaleke kujikhalira ŵekha, kweni ŵakondweskenge uyo wakaŵafwira na kuwuskika.”—2 Kor. 5:15.

13. Kasi Yesu wali na udindo wuli?

• “Mazaza ghose ghapika kwa ine kuchanya na pa charu chapasi.”—Mat. 28:18.

• “Chiuta wakamukwezga pa malo ghapachanya na kumupa zina ilo lili pachanya pa zina linyake lililose.”—Fil. 2:9.

14. Kasi mukugomezga kuti Wupu Wakulongozga wa Ŵakaboni ŵa Yehova ndiyo ni “muzga wakugomezgeka na wavinjeru” uyo Yesu wali kumwimika?

• “Kasi muzga wakugomezgeka na wavinjeru ni njani, uyo fumu yake yamwimika pa ŵateŵeti ŵake ŵa pa nyumba, kuti waŵape chakurya pa nyengo yakwenelera?”—Mat. 24:45.

15. Kasi mzimu utuŵa ni vichi?

• “Mungelo wakamuzgora kuti: ‘Mzimu utuŵa wizenge pa iwe, ndipo nkhongono ya Wapachanya Nkhanira yikubenekelerenge. Ntheura uyo wababikenge wazamuchemeka mutuŵa, Mwana wa Chiuta.’”—Luka 1:35.

• “Ntheura, usange imwe, nangauli muli ŵaheni, mukumanya kupeleka vyawanangwa viwemi ku ŵana ŵinu, ipo kuli wuli Adada ŵakuchanya? Asi ŵapelekenge mzimu utuŵa ku awo ŵakuŵalomba?”—Luka 11:13.

16. Kasi Yehova wakugwiliskira wuli ntchito mzimu wake utuŵa?

• “Machanya ghakapangika na mazgu gha Yehova, mawumba ghake ghose na mzimu wa mulomo wake.”—Sal. 33:6.

• “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane . . . ku vigaŵa vyakutali chomene vya charu chapasi.”—Mil. 1:8.

• “Palije uchimi wa Lemba uwo ukufuma mu maghanoghano gha munthu. Chifukwa nanga nkhamoza, uchimi undizepo na khumbo la munthu, kweni ŵanthu ŵakayowoyanga vyakufuma kwa Chiuta pakulongozgeka na mzimu utuŵa.”—2 Pet. 1:20, 21.

17. Kasi Ufumu wa Chiuta ni vichi?

• “Chiuta wakuchanya wazamwimika ufumu uwo kuti uzamuparanyika chara. Ufumu uwu uzamupelekeka ku ŵanthu ŵanyake chara. Uzamuteketa na kumazga maufumu ghose agha, ndipo iwo wekha ndiwo uzamuŵako kwamuyirayira”—Dan. 2:44.

18. Kasi muzamusanga vitumbiko wuli chifukwa cha Ufumu wa Chiuta?

• “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivu. 21:4.

19. Kasi mukumanya wuli kuti Ufumu wa Chiuta wizenge sonosono?

• “Apo wakakhala pa Phiri la Maolive, ŵasambiri ŵakiza kwa iyo kumphepete, ŵakati: ‘Mutiphalire, vinthu ivi vizamuŵako pawuli, ndipo ntchivichi chizamuŵa chimanyikwiro cha kuŵapo kwinu na cha umaliro wa charu?’ Yesu wakaŵazgora kuti: ‘. . . Mtundu uzamuwukirana na mtundu unyake, ufumu na ufumu unyake. Kweniso kuzamuŵa njara na vindindindi mu malo na malo. Ndipo makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.’”—Mat. 24:3, 4, 7, 14.

• “Kweni umanye ichi, kuti mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura na kunotha, ŵakutemwa vyakusanguluska m’malo mwa kutemwa Chiuta, ŵakuwoneka nga ŵakusopa Chiuta mwakujipeleka kweni ŵakukana nkhongono zake, ndipo upatukeko ku ŵanthu aŵa.”—2 Tim. 3:1-5.

20. Kasi mukulongora wuli kuti Ufumu wa Chiuta ngwakuzirwa chomene kwa imwe?

• “Lutilirani kupenja dankha Ufumu na urunji wake, ndipo vinthu vinyake vyose ivi visazgikirengeko kwa imwe.”—Mat. 6:33.

• “Penepapo Yesu wakati ku ŵasambiri ŵake: ‘Usange munthu wakukhumba kunilondezga, wajipate na kunyamura khuni lake lakusuzgikirapo ndipo walutilire kunilondezga.’”—Mat. 16:24.

21. Kasi Satana na viŵanda mbanjani?

• “Imwe muli kufuma kwa wiskemwe Dyabulosi . . . Kufuma apo wakagalukira iyo wakukoma ŵanthu.”—Yoh. 8:44.

• “Chinjoka chikuru chikaponyeka pasi, njoka ya papo kale, iyo yikuchemeka Dyabulosi na Satana, uyo wakupuluska charu chose. Wakaponyeka pa charu chapasi, ndipo ŵangelo ŵake ŵakaponyeka pasi pamoza nayo.”—Chivu. 12:9.

22. Kasi Satana wakamunena wuli Yehova na wose awo ŵakumusopa?

• “Mwanakazi wakati ku njoka: ‘Vipambi vya makuni gha mu munda wati tiryenge. Kweni vipambi vya khuni la pakatikati pa munda, Chiuta wati: “Mungaryanga yayi, nesi kulikhwaska, chifukwa mungafwa.’” Njoka yikati ku mwanakazi: ‘Kufwa mufwenge yayi. Chiuta wakumanya kuti pa zuŵa ilo muzamulyera vya mu khuni ili, maso ghinu ghazamujulika ndipo muzamuŵa nga ni Chiuta, kumanya uwemi na uheni.’”—Gen. 3:2-5.

• “Satana wakati kwa Yehova: ‘Chikumba kulipa chikumba. Munthu wapelekenge vyose ivyo wali navyo kuti wawombore umoyo wake.’”—Yobu 2:4.

23. Kasi mungalongora wuli kuti Satana ni mutesi?

• ‘Teŵeterani Chiuta na mtima wakufikapo.’—1 Mid. 28:9.

• “Nitayengepo chara kunyoloka kwane m’paka nifwe!”—Yobu 27:5.

24. Chifukwa wuli ŵanthu ŵakufwa?

• “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.”—Rom. 5:12.

25. Kasi ŵakufwa ŵakuŵa wuli?

• “Pakuti ŵamoyo ŵakumanya kuti ŵafwenge, kweni ŵakufwa ŵakumanya kalikose chara.”—Muph. 9:5.

26. Kasi ntchivichi chizamuchitikira awo ŵali kufwa?

• “Kuzamuŵa chiwuka cha ŵarunji na ŵambura urunji.”—Mil. 24:15.

27. Kasi mbalinga awo ŵakuluta kuchanya kuti ŵakawuse na Yesu?

• “Nkhalaŵiska na kuwona Mwana wa mberere wimilira pa Phiri la Ziyoni, ndipo wakaŵa pamoza na ŵanthu 144,000 awo ŵali na zina lake na zina la Awiske lakulembeka pa visko vyawo.”—Chivu. 14:1.