SAMBIRO 80
Yesu Wakasora Ŵapositole 12
Yesu wakati wapharazga kwa chaka chimoza na hafu, wakakhumba kuchita chinthu chinyake chakuzirwa. Wakakhumbanga kusankha ŵanthu ŵakuti ŵendenge nayo, kweniso ŵanthu ŵakuti waŵasambizge kuti ŵalongozgenge mu mpingo. Yesu wakawona kuti payekha wangachita yayi ivi, ntheura wakakhumbanga kuti Yehova wamovwire. Yesu wakaluta ku Phiri kwayekha, ndipo wakapemphera usiku wose. Mlenji, wakachema ŵasambiri ŵake wose na kusorapo ŵapositole 12. Kasi ukukumbukapo ŵalinga? Mazina ghawo ghakaŵa Petrosi, Andireya, Yakobe, Yohane, Filipu, Baratulumeyu, Tomasi, Mateyu, Yakobe mwana wa Alifeyu, Tadeyu, Simoni, na Yuda Isikariyoti.
Andireya , Petrosi, Filipu, Yakobe
Ŵanthu aŵa ŵakendanga na Yesu na kupharazgira lumoza. Wakati waŵasambizga, wakaŵatuma kuti ŵakapharazgenge ŵekha. Yehova wakaŵapa nkhongono za kufumiskira viŵanda na kuchizga ŵalwari.
Yohane, Mateyu, Baratulumeyu,Tomasi
Ŵapositole aŵa, Yesu wakaŵachemanga kuti ŵabwezi ŵake ndipo wakaŵagomezganga. Ŵafarisi ŵakaghanaghananga kuti ŵapositole ŵakaŵa ŵambura kusambira na ŵanthu bweka. Kweni Yesu wakaŵasambizga umo ŵangachitira ntchito yawo. Ŵakaŵanga lumoza na Yesu pa nyengo zakuzirwa chomene, nga ni apo wakaŵa pafupi kufwa kweniso wakati wawuka ku ŵakufwa. Yesu wakafuma ku Galileya, ndipo ŵanandi mwa ŵapositole ŵake nawo ndiko ŵakafuma. Ŵapositole ŵanyake ŵakaŵa ŵakutora.
Yakobe mwana wa Alifeyu, Yuda Isikariyoti, Tadeyu, Simoni
Ŵapositole ŵakaŵa ŵakwananga ndipo nawo ŵakabudanga. Nyengo zinyake ŵakayowoyanga vinthu kwambura kughanaghanirapo kweniso ŵakasankhanga uheni vinthu. Nyengo zinyakeso ŵakatondekanga kujikora. Nyengo zinyake ŵakalimbananga pa nkhani ya uyo ni mulara pakati pawo. Kweni ŵakamutemwanga Yehova. Ŵapositole aŵa ndiwo ŵakambiska mpingo Wachikhristu, Yesu wakati waluta.
“Namuchemani ŵabwezi, chifukwa namumanyiskani vinthu vyose ivyo napulika kwa Adada.”—Yohane 15:15.