Vinyake Ivyo Vyalongosorekaso Makora
Mu vyaka vyasonosono, Gongwe la Mulinda latovwira kupulikiska makora vigaŵa vinandi vya uchimi wa Ezekiyeli. Ndipo mu buku ili la Yehova Wawezgerapo Kusopa Kutuŵa!, muliso vinyake ivyo vyalongosorekaso makora. Wonani usange mungazgora mafumbo ghakulondezgapo.
Kasi visko vinayi vya vyamoyo vikwimira vichi?
Umo tikapulikiskiranga kale: Chilichose cha visko vinayi vya vyamoyo, panji kuti ŵakerubi, chikwimira umoza mwa makhaliro ghakurughakuru ghanayi gha Yehova.
Umo vyalongosolekera sono: Nangauli chilichose cha visko vinayi vya vyamoyo chikwimira umoza mwa makhaliro ghakurughakuru ghanayi gha Yehova, kweni para taviwonera pamoza, visko vinayi ivi vikwimira makhaliro ghose agho wali nagho. Nakuti visko vinayi ivi vikutilongora ukuru wa nkhongono zakuluska za Yehova na uchindami wake.
Chifukwa icho tasinthira: Mu Mazgu gha Chiuta, kanandi 4 (vinayi) wakwimira chinthu icho ntchakukwana makora, kwambura kupeleŵera. Ntheura para visko vinayi ivi taviwonera pamoza, vikupanga makhaliro ghanandi kujumpha pa ghanayi. Makhaliro agha ndigho ghakupanga chigaŵa chakuzirwa cha wunthu wakofya wa Yehova. Nakuti chisko chilichose ntcha chilengiwa icho chikwimira uchindami, nkhongono, na ukuru. Chinyake ntchakuti vyamoyo vyose vinayi ivi vili musi mwa chitengo cha Yehova. Ichi chikulongora kuti Yehova ndiyo ni Fumu Yikuru Chomene pa vyose.
Kasi mwanalume wakachikwama ka mulembi wakwimira njani?
Umo tikapulikiskiranga kale: Mwanalume wakachikwama ka mulembi wakwimira ŵakuphakazgika awo ŵachali pa charu. Kwizira mu ntchito ya kupharazga na kuzgora ŵanthu kuŵa ŵasambiri, ŵakuphakazgika ŵakuŵika chimanyikwiro sono nthena pa visko vya awo ŵakupanga “mzinda ukuru.”—Chivu. 7:9.
Umo vyalongosolekera sono: Mwanalume wakachikwama ka mulembi wakwimira Yesu Khristu. Wazamuŵika chimanyikwiro pa ŵamzinda ukuru apo wazamuŵeruzga kuti ni mberere pa “suzgo yikuru.”—Mat. 24:21.
Chifukwa icho tasinthira: Yehova wapeleka mulimo wa kweruzga ŵanthu kwa Mwana wake. (Yoh. 5:22, 23) Kuyana na Mateyu 25:31-33, Yesu wazamupeleka cheruzgo chaumaliro pa awo ni “mberere” kweniso “mbuzi.”
Kasi mahule ghaŵiri, Ohola na Oholiba, ghakwimira Chikhristu chautesi chakugaŵikana pakati pa Chikatolika na Chipulotesitanti?
Umo tikapulikiskiranga kale: Ohola (Samariya, msumba ukuru wa Israyeli), uyo wakaŵa mulara, wakwimira Ŵakatolika; Oholiba (Yerusalemu, msumba ukuru wa Yuda), uyo wakaŵa muchoko, wakwimira Ŵapulotesitanti.
Umo vyalongosolekera sono: Mahule ghaŵiri agha ghakwimira Chikhristu chautesi yayi. Kweni nkhani yawo yikutisambizga umo Yehova wakujipulikira usange ŵanthu awo pakwamba ŵakaŵa ŵakugomezgeka ŵamugalukira. Ndimo wakuwoneraso visopa vyose vyautesi.
Chifukwa icho tasinthira: Malemba ghakulongorapo yayi kuti Ohola na Oholiba ŵakwimira Chikhristu chautesi. Pakwamba, Israyeli na Yuda ŵakaŵa nga mbanakazi ŵakugomezgeka kwa Yehova, kweni Chikhristu chautesi chindaŵepo paubwezi wanthena uwu na Yehova. Nakuti nkhani ya ŵanthu ŵambura kugomezgeka awo ŵakuyowoyeka kuti ni mahule mu chaputara 16 na 23 cha Ezekiyeli, yikulongora kuti pakaŵa chigomezgo chakuti ŵangasintha na kuŵaso ŵakutemweka. Kweni Chikhristu chautesi, pakuŵa chigaŵa cha Babuloni Mukuru, chilije chigomezgo ichi.
Kasi Yerusalemu wakugaluka wakimiranga Chikhristu chautesi?
Umo tikapulikiskiranga kale: Yerusalemu wakugaluka wakwimira Chikhristu chautesi. Ntheura, pharanyiko la Yerusalemu likimiranga kuparanyika kwa Chikhristu chautesi.
Umo vyalongosolekera sono: Vinthu ivyo vikachitikanga mu Yerusalemu wakugaluka, nga kusopa vikozgo na vimbundi, vikutikumbuska ivyo vikuchitika mu Chikhristu chautesi, kweni tili kuleka kuyowoya kuti Yerusalemu wakwimira Chikhristu chautesi.
Chifukwa icho tasinthira: Palije ukaboni wakupulikikwa wa mu Malemba wakulongora kuti ndimo viliri. Mwakupambana na Yerusalemu wakale, Chikhristu chautesi chindasopepo mwaunenesko. Nakuti nyengo yinyake Yehova wakagowokera Yerusalemu, kweni ndimo vizamuŵira yayi na Chikhristu chautesi.
Kasi mboniwoni ya dambo la viwangwa vyakomira yikafiskika wuli?
Umo tikapulikiskiranga kale: Mu 1918, ŵakuphakazgika ŵakatolekera mu wuzga wa Babuloni Mukuru, ndipo ŵakaŵa nga kuti ŵafwa. Wuzga wa nyengo yifupi uwu ukamara mu 1919 apo Yehova wakaŵapaso nkhongono kuti ŵapharazge Ufumu.
Umo vyalongosolekera sono: Wuzga wauzimu ukatora nyengo yitali chomene, ndipo ukamba pambere chaka cha 1918 chindafike. Ukamba m’ma 100 C.E., ndipo ukamara mu 1919 C.E., ndipo ivi vikukolerana chomene na nyengo yitali ya ulimi iyo Yesu wakayowoya mu ntharika ya tirigu na duru.
Chifukwa icho tasinthira: Wuzga wa Israyeli wakale ukatora nyengo yitali chomene, ukamba mu 740 B.C.E. ndipo ukamara mu 537 B.C.E. Uchimi wa Ezekiyeli ukulongosora kuti viwangwa vikaŵa “vyakomira” panji “vyakomira pepetu,” kulongora kuti ŵanthu awo viwangwa ivi vikimiranga ŵakaŵa ŵakufwa nyengo yitali chomene. Uchimi uwu ukalongora kuti patorenge nyengo yitali kuti viwangwa ivi viwelerepo fikepo chifukwa ukulongosora kuti vikuwelerapo pachokopachoko.
Kasi kubamphika tumakuni tuŵiri chikung’anamurachi?
Umo tikapulikiskiranga kale: Ŵakati ŵaleka kukolerana kwa kanyengo pa Nkhondo Yakwamba ya Charu Chose, ŵakuphakazgika ŵakugomezgeka ŵakambaso kukolerana mu 1919.
Umo vyalongosolekera sono: Uchimi uwu ukulongora kuti Yehova wazamuchitiska ŵateŵeti ŵake kuŵa ŵamoza. Nyengo yikati yajumphapo kufuma mu 1919, ŵakuphakazgika ŵakamba kukolerana na ŵanthu ŵanandi awo ŵali na chigomezgo cha kuzakakhala pa charu chapasi. Magulu ghose ghaŵiri ghakusopa Yehova pamoza nga munthu yumoza.
Chifukwa icho tasinthira: Uchimi uwu undayowoyepo kuti kakhuni kamoza kakadankha kuphyoka pakati, ndipo pamanyuma kakabamphikika kuŵa kamoza. Ntheura tingayowoya yayi kuti uchimi uwu ukung’anamura kuti gulu limoza lizamugaŵikana dankha ndipo pamanyuma lizamukolerana. Kweni ukulongosora waka umo magulu ghaŵiri ghazamuŵira ghakukolerana.
Kasi Gogi wa Magogi ni Njani?
Umo tikapulikiskiranga kale: Gogi wa Magogi ni zina linyake ilo likapika kwa Satana, wakati wachimbizgika kuchanya.
Umo vyalongosolekera sono: Gogi wa Magogi wakwimira mitundu ya pa charu chapasi iyo yizamukolerana kuti yiwukire ŵasopi ŵaunenesko pa suzgo yikuru.
Chifukwa icho tasinthira: Umo uchimi uwu ukulongosolera Gogi—kuti wakupelekeka kuŵa chakurya cha viyuni kweniso kuti wakupika malaro pa charu chapasi, vikulongora kuti Gogi ntchilengiwa chauzimu yayi. Chinyake ntchakuti kuwukira kwa Gogi kukuyana waka na ivyo mabuku gha Daniyeli na Chivumbuzi ghakuyowoya pakukhwaskana na mitundu ya charu chapasi iyo yizamuwukira ŵanthu ŵa Chiuta.—Dan. 11:40, 44, 45; Chivu. 17:14; 19:19.
Kasi Ezekiyeli wakawona na kwendera tempile likuru lauzimu ilo mpositole Paulosi wakalilongosora?
Umo tikapulikiskiranga kale: Tempile ilo Ezekiyeli wakawona mu mboniwoni likuyana waka na tempile lauzimu ilo mpositole Paulosi wakalongosora.
Umo vyalongosolekera sono: Ezekiyeli wakawona tempile lauzimu ilo likaŵako mu 29 C.E. yayi, kweni wakawona mboniwoni ya umo kusopa kutuŵa uko kukulongosoreka mu Dango la Mozesi kuzamuwelerapo para ŵazga ŵawerako ku wuzga. Pakulongosora tempile lauzimu, Paulosi wakaŵika mtima pa mulimo uwo Yesu, pakuŵa Wasembe Mukuru Chomene, wakafiska kwambira mu 29 m’paka mu 33 C.E. Mboniwoni ya Ezekiyeli ya tempile, iyo yikuzunurapo yayi wasembe mukuru, yikuyowoya chomene vya kuwezgerapo kwauzimu uko kukamba mu 1919 C.E. Ntheura palije chifukwa chakughanaghanira kuti vigaŵa vyose na vipimo vya tempile ilo Ezekiyeli wakawona mu mboniwoni vikwimira vinthu vinyake. Kweni tikwenera kuŵika mtima pa ivyo mboniwoni ya Ezekiyeli yikutisambizga pa nkhani ya fundo za Yehova za kusopa kutuŵa.
Chifukwa icho tasinthira: Tempile ilo Ezekiyeli wakawona mu mboniwoni likupambana na tempile lauzimu. Mwachiyelezgero, pa tempile la Ezekiyeli pakapelekekanga sembe zinandi za nyama, kweni pa tempile lauzimu pakapelekeka sembe yimoza, “kamoza pera.” (Heb. 9:11, 12) Vyaka vinandi pambere Khristu wandize, nyengo yakuti Yehova wavumbulire unenesko wakukhwaskana na tempile lauzimu yikaŵa kuti yindakwane.