Kasi Kusopa Chikung’anamurachi?

Mazgu ghakuti kusopa ghangang’anamura “kulongora ntchindi na chitemwa kwa chiuta.” Mu Baibolo, mazgu gheneko agho ghang’anamulika kuti “kusopa” ghangayowoya vya munthu uyo wakuchindika chomene vilengiwa, panji kujilambika. (Mat. 28:9) Mazgu agha ghangang’anamuraso kuchindika Chiuta panji ngoza. (Yoh. 4:23, 24) Ng’anamuro leneko likumanyikwa kuyana na nkhani iyo yikuyowoyeka.

Yehova yekha, uyo ni Mlengi na Fumu ya Vyose, ndiyo ngwakwenelera kuti ŵanthu ŵamusopenge. (Chivu. 4:10, 11) Tikusopa Yehova para tikuchindika muwuso wake na kukwezga zina lake. (Sal. 86:9; Mat. 6:9, 10) Fundo ziŵiri izi—muwuso wa Yehova na zina lake—zikuyowoyeka chomene mu buku la Ezekiyeli. Mazgu ghakuti “Fumu Yikuru Yehova” ghakuzunulika mu malo ghakukwana 217 mu buku la Ezekiyeli pera, kweniso ghakuti ‘mumanye kuti ine ndine Yehova,’ ghakuzunulika mu malo 55.—Ezek. 2:4; 6:7.

Kweni kusopa ni umo tikujipulikira waka mu mtima yayi. M’malo mwake, kusopa kwenecho ni milimo panji vyakuchita. (Yak. 2:26) Para tikupeleka umoyo withu kwa Yehova, tikulayizga kuti pa vyose tidankhenge kupulikira iyo pakuŵa Fumu yithu yikuru na kuchindika chomene zina lake. Kumbukani kuti pakuzgora Satana mu chiyezgo chachitatu, Yesu wakalongora kuti pali kukolerana pakati pa kusopa na “uteŵeti wakupatulika.” (Mat. 4:10) Pakuŵa ŵasopi ŵa Yehova, tili ŵakunozgeka kumuteŵetera.a (Doto. 10:12) Tikuchita uteŵeti wakupatulika kwa Chiuta para tikuchita milimo iyo yikuyana na kusopa kwithu kweniso iyo yikukhumbikwira kujipata. Kasi ni milimo wuli?

Tikuchita uteŵeti wakupatulika munthowa zinandi, ndipo zose ni zakuzirwa kwa Yehova. Tikuchita uteŵeti wakupatulika para tikupharazgira ŵanyithu, tikuzgorapo pa maungano gha pa Nyumba ya Ufumu, kweniso para tikuzengako na kupwelelera malo ghakuwunganapo. Tikuchitaso uteŵeti wakupatulika para tikusopa pa mbumba yithu, tikovwirako Ŵakhristu ŵanyithu awo ŵali mu suzgo, tikujipeleka kuteŵetera pa ungano wa chigaŵa, panji kuteŵetera pa Beteli. (Heb. 13:16; Yak. 1:27) Usange tikuŵika pakwamba kusopa kutuŵa mu mtima na maghanoghano ghithu, tichitenge “uteŵeti wakupatulika muhanya na usiku.” Tikukondwa kusopa Yehova, Chiuta withu!—Chivu. 7:15.