BOKOSI 19A
Milonga ya Vitumbiko Kufuma kwa Yehova
Wonani nkhani zinyake mu Baibolo izo zikuzunura “mlonga” na “maji” kwimira vitumbiko vyakufuma kwa Yehova. Para tikuŵazga nkhani zose izi, tikukhozgeka chomene kumanya umo Yehova wakutitumbikira. Munthowa wuli?
JOYELI 3:18 Uchimi uwu ukulongora kuti mbwiwi ya maji yikufuma mu malo ghakupatulika gha tempile. Ukufuma na kuthilira “Dambo la Makuni gha Akasiya,” ilo ndakomira. Ntheura Joyeli na Ezekiyeli, wose ŵakawona mlonga uwo ukapelekanga umoyo mu malo ghakomira. Mu mauchimi ghose ghaŵiri, mlonga ukufuma mu nyumba ya Yehova, panji kuti tempile.
ZEKARIYA 14:8 Ntchimi Zekariya yikawona “maji ghamoyo” ghakufuma mu msumba wa Yerusalemu. Hafu ya maji agha yikalazganga ku nyanja yakumafumiro gha dazi, panji kuti Nyanja Yakufwa, ndipo hafu yinyake yikalazganga ku nyanja yakumanjiliro gha dazi, panji kuti Nyanja ya Meditereniyani. Yerusalemu ukaŵa “msumba wa Themba likuru,” Yehova Chiuta. (Mat. 5:35) Pakuzunura msumba uwu, Zekariya wakutikumbuska muwuso wa Yehova uwo uzamuŵa pa charu chose chapasi. Kwamba kale tikumanya kuti maji agho ghakuzunulika mu uchimi uwu ghakulongora kuti Yehova wazamutumbika magulu ghaŵiri gha ŵanthu ŵakugomezgeka mu Paradiso, awo ŵazamujumpha ŵamoyo pa suzgo yikuru na awo ŵazamuwuskika mu charu chiphya.
CHIVUMBUZI 22:1, 2 Mpositole Yohane wakawona mlonga wakukozgana na uwo Ezekiyeli wakawona mu mboniwoni. Kweni mlonga uwo Yohane wakawona ukufuma mu tempile yayi, kweni ku chitengo cha Yehova. Ntheura mboniwoni iyi, nga nja Zekariya, yikuwoneka kuti yikuyowoya za vitumbiko vya Chiuta ivyo vizamuŵa mu Muwuso wa Vyaka 1,000.
Kweni pali mphambano yichoko waka pakati pa vitumbiko ivyo vikufuma ku muwuso wa Yehova na ivyo mlonga uwo Ezekiyeli wakawona mu mboniwoni ukwimira. Vitumbiko vyose ivi vikufuma kwa Yehova ndipo vikuluta ku ŵanthu wose ŵakugomezgeka.
SALIMO 46:4 Wonani umo vesi limoza ili likulongosolera vigaŵa vyose viŵiri, kusopa na muwuso. Mlonga uwo ukuyowoyeka apa ukukondweska “msumba wa Chiuta,” kung’anamura Ufumu na muwuso, kweniso ukukondweska “chihema chituŵa na chauchindami cha Wapachanya Nkhanira,” kung’anamura kusopa kutuŵa.
Para nkhani izi zose taziwonera pamoza zikutisimikizgira kuti Yehova wazamutumbika ŵanthu ŵakugomezgeka munthowa ziŵiri. Tizamusanga vitumbiko ivi kwamuyirayira, kakwamba kufuma ku muwuso wake, ndipo kachiŵiri, kufuma ku ndondomeko yake ya kusopa kutuŵa. Ipo tiyeni tiŵikepo mtima sono kupenja “maji gha umoyo” kufuma kwa Yehova Chiuta na Mwana wake. Maji agha ni vinthu ivyo vingatovwira kuzakasanga umoyo wamuyirayira!—Yer. 2:13; Yoh. 4:10.