SAMBIRO 6

Kugwiliskira Ntchito Makora Malemba

Yohane 10:33-36

FUNDO YIKURU: Mungaŵazganga waka lemba na kuluta pa fundo yinyake yayi. Woneseskani kuti ŵategherezgi ŵinu ŵakuwona makora kukolerana pakati pa lemba ilo mwaŵazga na fundo iyo mukuyowoya.

UMO MUNGACHITIRA:

Patulani mazgu ghakukhumbikwa. Para mwaŵazga lemba, didimizgani mazgu agho ghakukolerana na fundo yinu yikuru. Kuti muchite ivi, mungaghawerezga mazgu agho panji kufumba fumbo ilo lingawovwira ŵategherezgi kusanga mazgu ghakukhumbikwa.

Para mwagwiliskira ntchito mazgu ghanyake kuti mulongosore lemba, woneseskani kuti ŵategherezgi ŵinu ŵakuwona umo mazgu gha mu Baibolo ghakukolerana na fundo yinu yikuru.
Didimizgani fundo yikuru. Para mwanguzunura lemba kweniso chifukwa icho muliŵazgirenge, longosorani umo mazgu gha mu vesi ilo ghakukolerana na chifukwa icho.

Para mukulongosora lemba, Baibolo linu likwenera kuŵa lakujura. Ichi chikovwira ŵategherezgi ŵinu kuyaniska mazgu ghinu na vesi ilo mwanguŵazga.
Longosorani munthowa yipusu. Tcheŵani kulongosora vinthu vyambura kukhumbikwa ivyo vikukolerana yayi na fundo yinu yikuru. Kuyana na ivyo ŵategherezgi ŵinu ŵakuvimanya kale, wonani unandi wa fundo izo zingakhumbikwa kuti mulongosore mwakupulikikwa makora fundo yinu.