KWAMBA KUYOWOYA NA ŴANTHU
SAMBIRO 4
Kujiyuyura
Fundo: “Muŵe ŵakujiyuyura na kuwona ŵanyinu kuti ŵakumuluskani.”—Fil. 2:3.
Ivyo Paulosi Wakachita
1. Wonelerani VIDIYO, panji ŵazgani Milimo 26:2, 3. Kufuma apo zgorani mafumbo ghakulondezgapo agha:
Kasi Paulosi wakalongora wuli kujiyuyura apo wakayowoyanga na Themba Agripa?
Kasi Paulosi wakalongora wuli kuti wakuchindika Yehova kweniso Malemba m’malo mwa kujichindika yekha? —Wonani Milimo 26:22.
Kasi Tikusambirako Vichi kwa Paulosi?
2. Ŵanthu ŵanganweka na uthenga withu usange tikuyowoya mwakujiyuyura ndiposo mwantchindi.
Yezgani Paulosi
3. Muyowoyenge mwantchindi. Lekani kuchita vinthu nga kuti imwe pera ndimwe mukumanya chilichose na kupangiska munthu kujipulika kuti palije icho wakumanya. Yowoyani nayo mwantchindi.
4. Longorani kuti ivyo mukusambizga vikufuma mu Baibolo. Mu Baibolo muli fundo izo zikuchontha mitima ya ŵanthu. Para tikugwiliskira ntchito Baibolo, tikuzenga chipulikano chawo pa malufura ghakukhora.
5. Muzikirenge. Lekani kungangamira pa fundo zinu. Tikukhumba yayi kugazgana na ŵanthu. Longorani kuti ndimwe ŵakujiyuyura. Mungachita nthena usange mukuzikira na kumanya nyengo iyo mungalekera kudumbiskana na munthu. (Zinth. 17:14; Tito 3:2) Para mukuzgora mwakuzika, vingawovwira kuti kunthazi muzakadumbiskaneso makora.