KWAMBA KUYOWOYA NA ŴANTHU
SAMBIRO 6
Kuleka Kopa
Fundo: “Tikachita chikanga mwa Chiuta withu kumuphalirani makani ghawemi.”—1 Tes. 2:2.
Ivyo Yesu Wakachita
1. Wonelerani VIDIYO, panji ŵazgani Luka 19:1-7. Kufuma apo zgorani mafumbo ghakulondezgapo agha:
Chifukwa wuli ŵanthu ŵanyake ŵakwenera kuti ŵakamugeganga Zakeyu?
Ntchivichi chikapangiska Yesu kuti wamupharazgire makani ghawemi?
Kasi Tikusambirako Vichi kwa Yesu?
2. Kuti tipharazgire waliyose uthenga wa Ufumu tingopanga yayi.
Yezgani Yesu
3. Gomezgani Yehova. Mzimu wa Chiuta ukamupa nkhongono Yesu kuti wapharazge makani ghawemi ndipo nase ungatovwira. (Mat. 10:19, 20; Luka 4:18) Lombani Yehova kuti wamovwirani kuti muleke kopa kupharazgira ŵanthu awo mukuchita nawo wofi.—Mil. 4:29.
4. Lekani kweruzga ŵanthu. Nyengo zinyake tingazerezga kupharazgira ŵanthu ŵanyake chifukwa cha umo ŵakuwonekera, ivyo ŵali navyo, umoyo wawo panji ivyo ŵakugomezga. Kweni kumbukani kuti:
Yehova na Yesu ndiwo ŵakuwona ivyo vili mu mitima ya ŵanthu, ise yayi.
Yehova wangalongora lusungu munthu waliyose.
5. Lekani kopa kweni muŵenge maso na kuchita vinthu mwantchindi. (Mat. 10:16) Lekani kugazgana na ŵanthu. Para munthu wakukhumba yayi kutegherezga panji mukuwona kuti wangamuchitirani chiheni, mazgani chidumbirano.—Zinth. 17:14.