Mafumbo Ghakufumira ku Ŵaŵazgi
Cifukwa cakuti Yehova ngwakukhumbisiska kugowokera zakwananga kwizira mu sembe yakuwombora, kasi ncifukwa wuli ncakwenelera kuti Ŵakristu ŵavumbure cakwananga cawo kwa ŵarara mu mpingo?
Nga ni umo cakucitika ca Davide na Beth-sheba cikurongolera, Yehova wakagowokera kwananga kwa Davide, nangauli kukaŵa kukuru, cifukwa cakuti wakarapa kufumira pasi pamtima. Peneapo ncimi Natan yikamufikira, Davide wakazomera pakweru kuti: “Ndanangira Yehova.”—2 Samuel 12:13.
Ndipouli, Yehova kuti wakuzomera na kugowokera muntu uyo wazomera pakweru zakwananga zake pera cara, kweniso wakupereka manozgero ghakovwira muntu wakwananga uyo kuti wacire mwauzimu. Pa cakucitika ca Davide, covwiro ici cikizira mwa ncimi Natan. Lero, mu mpingo Wacikristu, muli ŵanarumi ŵakukhoma mwauzimu, panji ŵarara. Mpostole Yakobe wakulongosora kuti: “Kasi munyinu yumoza warwara [mwauzimu]? Waceme ŵarara ŵa Ekleziya: ndipo ŵamurombere, ŵamuphakazge na mafuta mu zina la Fumu: Ndipo rombo la cipulikano liti limuponoske murwari, ndipo Fumu yiti yimuwuske; ndipo usange wananga, zakwananga zake ziti zigowokereke.”—Yakobe 5:14, 15.
Ŵarara ŵaluso ŵangawovwira comene kuti ŵacepeske kupweteka mtima uko muntu wakwananga wakuŵa nako. Iwo ŵakuyezgayezga kurondezga Yehova mu vyakucita vyawo na muntu wakwananga. Nangauli kucenya kwankongono kungaŵa kwakwenelera, kweni iwo ŵakwenera cara kuŵa ŵankaza. Mu malo mwake, mwalusungu wakughanaghanira covwiro ca mwaluŵiro ico muntu uyo wakukhumbikwira. Mwakuzizipizga iwo ŵakuyezgayezga kusinta kaghanaghaniro ka muntu wakwananga mwakugwiriskira ncito Mazgu gha Ciuta. (Ŵagalatiya 6:1) Nanga kungaŵa kwakuti muntu uyo wangatondeka kuzomera zakwananga zake pa iye yekha, kweni wangakhuŵirizgika kurapa para ŵarara ŵamufikira, nga ni umo Davide wakacitira peneapo Natan wakamufikira. Anteura covwiro ico ŵarara ŵakupereka cikovwira muntu uyo wananga kuti watceŵe ngozi ya kuwerezga cakwananga ico ndiposo na vyakufumapo vyakofya vya kuleka kufipa mtima usange wananga.—Ŵahebere 10:26-31.
Ncipusu cara kuvumburira ŵanji vintu ivyo yunji wakucita navyo soni na kupempa cigowokero. Cikukhumbikwira kuŵa na cikanga. Kweni ndipouli, khalani danka cete kwakanyengo kacoko waka na kughanaghanira ici. Mwanarumi munyake uyo wakatondeka kuvumbura cakwananga cake cikuru ku ŵarara mu mpingo wakati: “Nkapulika kupweteka mu mtima mwane ndipo kupweteka uko kukaŵa kwakuti kungamara cara. Nkayezga kukuzgirako mulimo wakupharazga, kweni kujipulika nga muntu wambura kwenelera kukamara cara.” Iye wakaghanaghananga kuti kuvumbura kwa Ciuta mu pempero kukaŵa kwakukwanira, kweni mwambura kukayika kukaŵa kwambura kukwanira, cifukwa wakajipulika nga ni umo Themba Davide wakacitira. (Salmo 51: 8, 11) Mwee, nako nkuweme kuzomera covwiro ico Yehova wakupereka kwizira mu ŵarara!