Mafumbo Ghakufumira ku Ŵaŵazgi

Kasi vyose ivyo tikurapa kwa Ciuta vikukhumbikwira kufiskika?

Mu Malemba, kurapa nipara muntu walayizga kwa Ciuta kufumira pasi pa mtima kuti wamucitirenge cintu, kumupa, panji kwamba uteŵeti, panyake pangano la kuziŵizga vintu vinyake, nangauli vingaŵa vyambura kukanizgika. Baibolo liri na nkani za virapo ivyo vikafiskikanga para Ciuta wacita danka cintu ico muntu waromba. Mwaciyerezgero, Hana, nyina wa ncimi Samuel, “Wakarapa cirapo, wakati, ‘A Yehova wa mawumba, usange nadi mulaŵiske muwone kusuzgika kwa muzga winu na kundikumbuka, kuruwa muzga winu cara, na kundipa muzga winu mwanamwanarumi, ine nditindimupereke kwa Yehova mazuŵa ghake ghose ndipo cimeto nta cimukwaske ku mutu.’” (1 Samuel 1:11) Baibolo likurongosora kuti muntu wakucita kukhumba yekha kurapa. Kasi tikwenera kusunga virapo kwa Ciuta kufikira mphani?

“Para ukurapa cirapo kwa Ciuta,” likuti nteura Themba Solomon la mu Israyeli wakale, “ungaziulikanga kucifiska.” Likuyowoyaso kuti: “Fiska kwakuyana na cirapo cako. Nkuweme kureka kurapa kwakuruska kurapa na kureka kufiska.” (Mupharazgi 5:4, 5) Dango ilo likapika kwa Ŵaisrayeli kwizira mwa Moses likuti: “Para mwarapa cirapo kwa Yehova Ciuta winu, mungadondanga kucilipa, pakuti nadi Yehova Ciuta winu tiwacikhumbe kucifumba kwa imwe ndipo kuŵenge kwananga kwa imwe.” (Duteronome 23:21) Ncakuwonekerathu kuti kucita cirapo kwa Ciuta ni nkani yikuru. Pakwenera kuŵa cifukwa ceneko cakucitira cirapo, ndipo uyo wakurapa wawoneseske kuti wafiskenge nadi vyose ivyo walayizga. Usange yayi, nciweme kulekerathu kurapa. Kweni kasi ni virapo vyose ivyo vikukhumbikwira kufiskika?

Wuli usange muntu wawona kuti cirapo ico wakacita cingamupangiska kucita vintu vyakupambana na khumbo la Ciuta? Tiyerezgere kuti cikaŵa cirapo ico mu ntowa yinyake cingacitiska muntu kunjira mu ukhaliro uheni na kunangiska kusopa kwaunenesko? (Duteronome 23:18) Inya, cirapo canteura ncakuti mupaka cifiskike yayi. Mwakusazgirapo, mu Dango la Moses, vikacitikanga kuti wiske panji mfumu wafwature mwanakazi ku cirapo.—Maŵazgo 30:3-15.

Ghanaghaniraniso za muntu uyo warapa kwa Ciuta kuti watorenge yayi, kweni wasanga kuti wangafiska yayi kucita ntena. Wasangika mu kaŵiro kakuti usange warutilirenge naco cirapo ici, wangaŵa pa ngozi ya kuswa vipimo vya Ciuta vya mikhaliro yiweme. Kasi wakwenera kulimbalimba kufiska cirapo cake? Kasi cingaŵa ciweme yayi kuti wajivikirire ku mrandu wa kucita mikhaliro yiheni mwa kuleka kufiska cirapo cake, m’malo mwake waŵeyerere lusungu lwa Ciuta na kuromba cigowokero? Iye mweneko wangasanka cakucita pa nkani iyi. Palije muntu waliyose uyo wangamuphalira cakucita.

Wuli usange muntu wasanga kuti wakacita cirapo kwambura kughanaghanira makora? Kasi wakwenera kucifiska nipera? Kukaŵa kupusu yayi kwa Yefita kufiska cirapo ico wakapangana na Ciuta, kweni cifukwa ca njuŵi wakafiska. (Ŵeruzgi 11:30-40) Usange muntu wakutondeka kufiska cirapo cake wangacitiska Ciuta ‘kukwiya’ na kuparanya vyose ivyo wacita. (Mupharazgi 5:6) Kucita maseŵera pa nkani ya kufiska cirapo kungamazga ubwezi withu na Ciuta.

Yesu wakati: “Kayowoyero kinu kaŵenge, Inya, Inya; Cara, cara; ndipo ako kose kakuruska agha kakufuma ku muheni.” (Mateyu 5:37) Mkristu wakwenera kupwererera pa nkani za kufiska virapo kwa Ciuta pera cara, kweniso kuŵa wakugomezgeka mu mazgu ghake ghose—kwa Ciuta na ŵantu. Wuli usange wakacita pangano na muntu uyo pakwamba wakaŵa nga ni muweme kweni wati wamusanda wakuwoneka kuti ngwawakawaka? Wakwenera kupepuska yayi nkani iyi. Kweni cifukwa ca kudumbirana vyakusingo, munyake uyo wangasanka kumufwatura ku pangano ilo.—Salmo 15:4; Zintharika 6:2,3.

Pakuyowoya za virapo na nkani zinyake, kasi tikwenera kupwererera vici? Tiyeni nyengo zose tivikirire ubwezi uweme na Yehova Ciuta.

[Cithuzithuzi pa peji 30, 31]

Hana wakaziulika yayi kufiska cirapo cake

[Vithuzithuzi pa peji 30, 31]

Nangauli cikaŵa cinonono, Yefita wakafiska cirapo cake