Kasi Mukujiwona Kuti Muli Ŵambura Kwenelera?
LENA wakajiwonanga kuŵa wambura kukhumbikwa nyengo yitali. Iyo wakuti: “Apo nkhaŵa mwana, kanandi ŵakanicicizganga kugona nane, ntheura wunthu wane ukanangika. Nkhajiwonanga kuti nili wambura kwenelera.” Simone nayo wakukumbuka uwukirano wake ndipo wakuti, “Nkhasoŵanga kanthu kanyake mu mtima wane ndipo nkhajiwonanga kuti ndine munthu wambura kwenelera.” Ŵanthu ŵanandi lero mbakukondwa yayi cifukwa ca maghanoghano ghanthena. Ku caru cinyake, awo ŵakupeleka ulongozgi pa telefoni kwa ŵawukirano, ŵakayowoya kuti hafu ya awo ŵakupempha wovwiri ni awo “nyengo zose ŵakujiwona kuti mbawakawaka.”
Umo madokotala ghanyake ghakuyowoyera, munthu wakwamba kujiwona kuŵa wakupeleŵera para wakughanaghana kuti ŵanyake ŵakumuwona kuŵa wambura kwenelera. Munthu wangamba kughanaghana nthena usange nyengo zose ŵanyake ŵakumukalipira, ŵakumususka na kumunyoza, panji kumulyera. Nakuti kacitiro aka kangaŵa kakugulura nkhongono kweniso kakupwetekeska. Lipoti linyake likulongora kuti ŵanthu awo ŵakujikayikira kanandi ŵakujigomezga yayi kweniso ŵakukayikira ŵanyawo. Mwantheura, ubwezi wawo na ŵanyawo ukwamba kumara pacokopacoko. Lipoti ili likuyowoya kuti: “Para ŵacita nthena ‘wakwambiska’ suzgo ilo iwo ŵakopa comene.”
Ŵanthu awo ŵakujipulika nthena kanandi ‘mbakukweŵeka mu mtima’ umo Baibolo likuyowoyera. (Salmo 94:19) Ŵakuwona ngati palije kawemi ako iwo ŵangacita. Para cinthu cabudika, mbwenu ŵakujipa murandu. Nangauli ŵanyawo ŵangaŵalumba pa ivyo ŵacita, kweni iwo mu mtima wawo wakuwona nga mbutesi pera. Cifukwa ca kughanaghana kuti mbambura kwenelera kukondwa, ŵanandi ŵakwamba nkharo iyo yikuŵapwetekeska yeneiyo ŵakutondeka kuleka. Lena, uyo wazunurika pakwamba, wakaryanga viŵi yayi cifukwa cakuti wakajiwonanga kuŵa wambura kwenelera, ndipo mweneco wakuti, “Nkhatondeka kusintha.”
Kasi ŵanthu awo ‘ŵakukweŵeka mu mtima’ ŵakhalilirenge nthena umoyo wawo wose? Kasi cilipo ico ŵangacita kuti suzgo ili limare? Baibolo liri na fundo na ulongozgi uwo wawovwira ŵanandi kumazga suzgo ili. Kasi zinyake mwa fundo izi ni zini, ndipo zawovwira wuli ŵanthu awo ŵakujikayikira kuti ŵasange cimwemwe? Nkhani ya panthazi apa yizamulongosora.