Mafumbo Ghakufumira ku Ŵaŵazgi

Kasi nchivici ico cikwiziska “vyuma vya mitundu yose” mu “nyumba” ya kusopa kwa unenesko?—Hagai 2:7.

Kwizira mwa nchimi Hagai, Yehova wakayowoyerathu kuti: “Ndisunkhunyeso mitundu yose ntheura kuti vyuma vyose vya mitundu yose vizengemo, ndipo nditizuzge nyumba iyi na nchindi.” (Hagai 2:7) Kasi kusunkhunya “mitundu yose” ndiko kucitiska “vyuma” vya ŵamitundu, awo ni ŵanthu ŵa mitima yiwemi kwiza ku kusopa kwaunenesko? Zgoro ndakuti cara.

Ghanaghanirani za ico cikusunkhunya mitundu na ico cikucitika cifukwa ca kusunkhunyika uku. Baibolo likuti ‘mitundu yikuthirimuka na kuwawata, na mafuko ghakulokota cawaka.’ (Salmo 2:1) “Cawaka” ico ‘ŵakulokota’ panji kulangurukapo ndico kulutizga muwuso wawo. Palije cinthu cilicose ico cikuŵasunkhunya kujumpha pa ico cikwimikana na muwuso wawo.

Nchito ya kupharazga za Ufumu wa Ciuta iyo yikucitika na Ŵakaboni ŵa Yehova pa caru cose capasi ndiyo yikupangiska kuti mitundu yiŵe na wofi. Nakwenenako, Ufumu wa Ciuta wakuwusika na Yesu Khristu, “wamkuteketa mauthemba ghose [gha ŵanthu] agha na kughamara.” (Daniel 2:44) Uthenga wa ceruzgo, uwo nchigaŵa ca nchito yithu ya kupharazga ndiwo ukupangiska kuti mitundu yitentheme comene. (Yesaya 61:2) Yikusunkhunyika comene peneapo nchito ya kupharazga yikuluta panthazi. Mwantheura, kasi kusunkhunya uko kukayowoyeka pa Hagai 2:7 kukung’anamuraci?

Pa Hagai 2:6 tikuŵazga kuti: “Wakuti ntheura Yehova wa mipingo: ‘kwakhala kanyengo kacoko waka ndipo tindisunkhunye kamozaso mtambo, na caru capasi, na nyanja, na mtunda.’” Pakuzunura mazgu gha mu vesi ili, Paulosi wakalemba kuti: ‘Kweni sono walayizgana wati kamozaso pera nditi ndisunkhunyenge caru pera cara, kweni na kucanya wuwo. Ndipo mazgu agha, kamozaso pera, ghakulongora kusezgeka kwa vinthu ivyo vikusunkhunyika, uko ndiko kuti ivyo vikalengeka, mwakuti [Ufumu] ukhalilire uwo ulive kumanya kusunkhunyika.’ (Ŵahebere 12:26, 27) Enya, kaŵiro ka vinthu ako kalipo sono kamarenge ndipo kazamuhalirika na caru ciphya ca Ciuta.

Ŵanthu ŵawemi mtima ŵakwiza ku kusopa kwaunenesko kweni cifukwa ca kusunkhunyika kwa mitundu cara. Nchito ya kupharazga za Ufumu wa Ciuta iyo yikupangiska kuti ŵize kwa Yehova, ndiyoso yikupangiska mitundu kusunkhunyika. Ŵanthu ŵa mitima yiwemi ŵakwiza mu cisopo caunenesko cifukwa ca kupharazgika kwa “ivangeli landanda.”—Civumbuzi 14:6, 7.

Uthenga wa Ufumu ni uthenga wa ceruzgo na ciponosko. (Yesaya 61:1, 2) Uthenga wa Ufumu uwo tikupharazga ukucita vigaŵa viŵiri: kusunkhunyika kwa mitundu na kwiza kwa vyuma vya ŵamitundu ku ucindami wa Yehova.