Kanandi Ŵanthu Ŵakucindikana Yayi

“Vyose ivyo vikacitikanga pa msasa vikalongoranga kuti nchindi zayamba kumara.”—MAGDALENA KUSSEROW REUTER, UYO WAKAPONA KU MSASA WA NAZI WAKUSUZGIRAKO ŴANTHU.

MU NYENGO ya Nkhondo Yaciŵiri ya Caru Cose, ku misasa ya Nazi yakusuzgirako ŵanthu kukaŵa nkhaza zakofya comene. Kweni ndilo likaŵa jando panji umaliro wakuti ŵanthu ŵaleke kucindikana yayi. Kwali tikuwona ivyo vikacitikanga kale panji ivyo vikucitika sono, ukaboni ukulongora kuti ŵanthu ŵali kwamba ni kale kuleka kucindikana.

Ndipouli, kuleka kucindikana, nkhucitirana nkhaza pera yayi. Ŵanthu ŵakuleka kucindikika mu nthowa zinandi. Aghanaghanirani mwana uyo wakuhoyeka cifukwa ca umo wali kubabikira. Panji munthu wacilendo uyo wakuhoyeka cifukwa ca mitheto “yacilendo.” Panjiso munthu uyo wakusuzgika cifukwa ca kusankhana mitundu. Awo ŵakuhoya ŵanyawo ŵangawona nga ni maseŵera waka, kweni awo ŵakuhoyeka ndiwo vikuŵaŵinya.—Zintharika 26:18, 19.

Kasi Nchindi ni Vici?

Dikishonare yinyake yikuti nchindi nkhuŵa ‘wakwenelera, wakucindikika, panji wakuzirwa.’ Mwantheura, nchindi, ni umo tikujiwonera tekha na umo ŵanji ŵakucitira nase. Pali vinthu vinandi ivyo vikukhwaska umo tikujiwonera tekha, kweni umo ŵanji ŵakutiwonera na umo ŵakucitira nase ndivyo vikulongora usange tili ŵakuzirwa.

Mitundu yose ya ŵanthu yili na ŵakavu, ŵambura kuvikilirika, na ŵakusuzgika. Ndipouli, kuŵa na masuzgo agha kukung’anamura kuti munthu ngwambura kwenelera nchindi yayi. Ivyo ŵanji ŵakumucitira munyawo ndivyo vikupangiska kuti wajiwone nga ngwambura kwenelera. Nchacitima kuti ŵanthu awo mbakusuzgika ndiwo kanandi ŵakuyuyulika. Kanandi tikupulika mazgu ghakuti “muli na nchito wuli imwe?” “na imwe wuwo?” “kavwiza iwe,” kunena ŵacekuru, ŵakavu, ŵakufuntha na ŵakupendera!

Nchifukwa wuli ŵanthu ŵakuyuyura ŵanyawo? Kasi nchamacitiko kuti ŵanthu ŵazakacindikane? Nkhani yakulondezgapo yipelekenge mazgoro ghakufuma mu Mazgu gha Ciuta, Baibolo.