Mafumbo Ghakufumira ku Ŵaŵazgi

Kasi tikumanya wuli kuti ivyo vikulongosoleka pa Zintharika 8:22-31 vikuyowoya za Yesu Khristu pambere wandaŵe munthu?

Mazgu agho ghakulongosora za vinjeru agho ghali mu buku la Zintharika ghakuŵazgika mwantheura: “Yehova wakandilenga pakwamba milimo yake, wakudanga wa milimo yake ya kale . . . Ghandakhalikike mapiri, tundaŵeko tunthundumwe ndababika kale. . . . Pakunozga makora mtambo ine nkhaŵa papo; . . . penepapo nkhaŵapo pafupi nayo nga ndi fundi, ndipo zuŵa na zuŵa nkhaŵa wakumukondweska, naneso nkhakondwa pamaso pake lutaluta, . . . na kukondweraso mu ŵana ŵa ŵanthu.”

Lemba ili, kuti likuyowoya waka za vinjeru vya Ciuta panji vinjeru bweka yayi. Cifukwa wuli? Cifukwa cakuti vinjeru ivyo vikulongosoreka apa vikacita ‘kulengeka’ nga ni mulimo wakwamba wa Yehova. Yehova Ciuta wali kuŵako kufuma ku muyirayira ndipo nyengo zose waŵa wavinjeru. (Salmo 90:1, 2) Vinjeru vyake vilije jando, vikalengeka cara. Vikacita ‘kubabika’ cara. Kweniso, vinjeru ivyo vikuyowoyeka apa vikwimira munthu, cifukwa vikuyowoya na kucita.—Zintharika 8:1.

Buku la Zintharika likuyowoya kuti kale vinjeru vikaŵa pafupi na Yehova nga ni “fundi” pakulenga. Kwambura kukayika, vinjeru ivi ni Yesu. Pambere wandize pa caru capasi, Yesu wakateŵeteranga pafupi na Yehova mwakuti Mazgu gha Ciuta ghakuti: “Iye ngwakutendekera vyose, ndipo vyose vikulungikana pamoza mwa Iyo.”—Ŵakolose 1:17; Civumbuzi 3:14.

Ntheura nchakwenelera kucema Mwana wa Ciuta kuti vinjeru, cifukwa iyo ndiyo wakavumbura cilato ca Yehova. Pambere Yesu wandaŵe munthu, wakaŵa Mazgu gha Ciuta, panji Muyowoyeri. (Yohane 1:1) Wakulongosoreka kuŵa “nkhongono ya Ciuta, na vinjeru vya Ciuta.” (1 Ŵakorinte 1:24, 30) Nchakukondweska comene umo Mwana wa Ciuta wali kulongosolekera, uyo cifukwa ca kukondwera mu ŵana ŵa ŵanthu wakapeleka umoyo wake kuŵa ciwombolero!—Yohane 3:16.