Mafumbo Ghakufumira ku Ŵaŵazgi

Kasi Yesu wakang’anamurangaci apo wakati muzga wake wa magomezgeko wazamuŵa “wa vinjeru”?

Yesu wakafumba kuti: “Ndi njani muzga wa magomezgeko na wa vinjeru, uyo fumu yake yamwimika pa ŵa mu nyumba yake, kuŵapa vyakurya mu nyengo yakwenelera?” (Mateyu 24:45) “Muzga” uyo wakupeleka “vyakurya” ni gulu la Ŵakhristu ŵakuphakazgika na mzimu. Cifukwa wuli Yesu wakati muzga uyu ngwavinjeru?a

Tingapulikiska makora ng’anamuro la lizgu lakuti “vinjeru” para tingawona visambizgo ivyo Yesu iyomwene wakasambizga. Mwaciyelezgero, Yesu wakati wayowoya za “muzga wa magomezgeko na wa vinjeru,” wakayowoyaso ntharika ya ŵamwali khumi awo ŵakalindiliranga kwiza kwa mwenenthengwa. Ŵamwali aŵa ŵakutikumbuska za Ŵakhristu ŵakuphakazgika pambere cilimika ca 1914 cindafike, awo ŵakalindiliranga mwakunweka kwiza kwa Mwenenthengwa mulara, Yesu Khristu. Pa ŵamwali khumi, ŵankhondi mafuta ghakaŵamalira apo mwenenthengwa wakizanga, ndipo ciphikiro ca nthengwa cikaŵapamba. Kweni ŵanyake ŵankhondi ŵakaŵa ŵakucenjera ndiposo ŵavinjeru. Ŵakasungirathu mafuta ghakukwana kuti nyali zawo zilutilire kuŵala para mwenenthengwa wafika. Mwantheura, ŵakazomerezgeka kunjira mu nyumba ya ciphikiro.—Mateyu 25:10-12.

Apo Yesu wakapika mazaza gha kuwusa mu 1914, ŵanandi mwa Ŵakhristu ŵakuphakazgika ŵakalindiliranga kuti mu cilimika ici nawo ŵazamuluta kucanya kukamba kuwusa nayo lumoza. Kweni pa caru pakaŵa kuti pacali nchito yakuti ŵacite, ndipo ŵanji ŵakaŵa ŵambura kunozgeka kucita nchito iyi. Nga mbamwali ŵambura vinjeru, iwo ŵakaŵa ŵambura kunozgeka mwauzimu, ntheura ŵakatondeka kulutilira kuŵaliska ungweru wauzimu. Kweni ŵanyake ŵakaŵa ŵavinjeru na ŵakunozgeka, ndipo ŵakakhozgeka mwauzimu. Ŵakati ŵamanya kuti pacali nchito yinandi yakuti ŵacite, ŵakaŵa ŵakunweka kuyicita mwacimwemwe. Mwantheura, ŵakalongora kuti mbakukwana nadi kuŵa “muzga wa magomezgeko na wa vinjeru.”

Kweniso wonani umo Yesu wakagwiliskira nchito lizgu lakuti “wakucenjera” panji wavinjeru pa Mateyu 7:24. Wakati: “Yose uyo wakupulika mazgu ghane gheneagha, na kughacita, wati walingane na munthu wakucenjera, uyo wakazenga nyumba yake pa jarawe.” Munthu wavinjeru ndiposo wakucenjera wakuzenga nyumba pamalo ghakukhora cifukwa ca kumanya kuti nyengo zinyake kukuŵa cimphepo cikuru. Kweni wakupusa wakuzenga pa mcenga ndipo nyumba yake yikuwa. Mwantheura, mulondezgi wa Yesu uyo wali na vinjeru wakuwonerathu uheni wa kulondezga vinjeru vya ŵanthu. Vinjeru na umanyi wake vikumovwira kuti wajinthe cipulikano na milimo, na visambizgo vyake pa ivyo Yesu wakasambizga. Umo ndimo wakucitira “muzga wa magomezgeko na wa vinjeru.”

Wonaniso umo lizgu lakuti “vinjeru” liri kugwiliskikira nchito mu Malemba gha Cihebere. Mwaciyelezgero, Faro wakimika Yosefe kuti walaŵilirenge mulimo wa kupwelelera cakurya mu Eguputo. Iyi yikaŵa nthowa yimoza iyo Yehova wakakhumba kupelekera cakurya ku ŵanthu ŵake. Cifukwa wuli Yosefe wakasankhika? Faro wakaphalira Yosefe kuti: “Kulije yumoza wa vinjeru vyakumanyiska na wa mahara umo uliri iwe.” (Genesis 41:33-39; 45:5) Kweniso, Baibolo likuti Abigelu wakaŵa “wamahara.” Wakapeleka cakurya kwa Davide, uyo wakaŵa wakuphakazgika wa Yehova, ndiposo ŵanalume ŵake. (1 Samuel 25:3, 11, 18) Yosefe na Abigelu ŵangayowoyeka kuti ŵakaŵa ŵavinjeru cifukwa ŵakamanya khumbo la Ciuta na kucita vinthu mwamahara ndiposo mwaumanyi.

Mwantheura, apo Yesu wakati muzga wa magomezgeko ngwavinjeru, wakalongora kuti Ŵakhristu ŵa mu gulu la muzga ŵakeneranga kuŵa ŵavinjeru, ŵakucenjera ndiposo ŵaumanyi cifukwa ŵakujintha cipulikano, milimo, na visambizgo vyawo pa Mazgu gha Ciuta.

[Mazgu ghamusi]