Kupimika Ŵakwenelera Kulongozgekera ku Mbwiwi za Maji Ghaumoyo
“Mwanamberere . . . wizamkuŵaliska, ndipo wizamkuŵalongozgera ku mbwiwi za maji ghaumoyo.”—CIV. 7:17.
1. Kasi Mazgu gha Ciuta ghakuti Ŵakhristu ŵakuphakazgika mbanjani, ndipo Yesu wali kuŵapa mulimo wuli?
MAZGU gha Ciuta ghakulongora kuti Ŵakhristu ŵakuphakazgika, awo ŵakupwelelera vinthu vya Khristu pa caru capasi ndiwo ni “muzga wa magomezgeko na wa vinjeru.” Apo Khristu wakendera “muzga” uyu mu cilimika ca 1918, wakasanga kuti wakucita mwakugomezgeka mulimo wa kupeleka “vyakurya mu nyengo yakwenelera.” Antheura, Yesu, uyo ni Fumu, wakakondwa, ndipo wakamwimika ‘pa vyose ivyo wali navyo.’ (Ŵazgani Mateyu 24:45-47.) Mwa kupeleka cakurya mu nyengo yakwenelera ndiposo kulaŵilira vinthu vya Yesu pambere ŵandalute kucanya, Ŵakhristu ŵakuphakazgika ŵakuteŵetera ŵasopi ŵanyawo pa caru capasi.
2. Kasi vinthu vya Yesu ni vici?
2 Fumu yili na mazaza pa vinthu vyake, ndipo yingavigwiliskira nchito mu nthowa yiliyose iyo yakhumba. Vinthu vya Yesu Khristu, uyo ni Fumu yakwimikika na Yehova, vikusazgapo vinthu vyose vyakukhwaskana na Ufumu pa caru capasi. Vikusazgaposo “mzinda ukuru” uwo mpositole Yohane wakawona mu mboniwoni. Yohane wakalongosora mzinda uwu wakati: “Ehena, mzinda ukuru, uwo pakaŵavya munthu wakamanya kupenda, kufuma ku mtundu wose, na ku mafuko na ku ŵanthu na ku malulimi, ŵakwimilira panthazi pa cizumbe na pa maso pa Mwanamberere, ŵakuvwarikika minjilira yituŵa, ndipo na mani gha vinchindo mu mawoko ghawo.”—Civ. 7:9.
3, 4. Kasi ŵa mzinda ukuru ŵali na mwaŵi wuli?
3 Ŵa mzinda ukuru mbamoza mwa awo Yesu wakati ni “mberere zinyake.” (Yoh. 10:16) Ŵali na cilindizga ca kuzakakhala mu caru capasi ca paradiso kwamuyirayira. Ŵali na cigomezgo cose kuti Yesu “wizamkuŵalongozgera ku mbwiwi za maji ghaumoyo,” ndipo “Ciuta wizamkufyura nkhanira masozi ghose ku maso ghawo.” Cifukwa ca cilindizga ici, ‘ŵasukutura minjilira yawo, ndipo ŵayituŵiska mu ndopa za Mwanamberere.’ (Civ. 7:14, 17) Ŵali na cipulikano mu sembe ya Yesu, lekani mu maso gha Ciuta ŵali na ‘minjilira yituŵa.’ Ŵapimika ŵarunji nga ni mabwezi gha Ciuta nga umo wakaŵira Abrahamu.
4 Pakuti Ciuta wakuŵawona kuti mbarunji, ŵa mzinda ukuru awo ŵakusazgikirasazgikira, ŵali na cilindizga ca kuzakapona apo caru ici cizamuparanyika pa “cisuzgo cikuru.” (Yak. 2:23-26) Ŵali paubwezi na Yehova, ndipo nga ni gulu, ŵali na cilindizga ca kuzakapona pa Haramagedoni. (Yak. 4:8; Civ. 7:15) Ŵakujiyimira paŵekha yayi, kweni ŵakulongozgeka na Themba lakucanya, ndiposo ŵabali ŵake ŵakuphakazgika awo ŵali pa caru capasi.
5. Kasi ŵa mzinda ukuru ŵakovwira wuli ŵabali ŵa Khristu ŵakuphakazgika?
5 Ŵakhristu ŵakuphakazgika ŵasuskika comene na caru ca Satana, ndipo cilutilirenge kuŵasuska. Ndipouli, ŵali na cigomezgo cakuti ŵabwezi ŵawo ŵa mzinda ukuru ŵaŵawovwirenge. Apo Ŵakhristu ŵakuphakazgika ŵakucepa, ŵa mzinda ukuru ŵakusazgikirasazgikira cilimika cilicose. Ŵakhristu ŵakuphakazgika ŵangakwaniska yayi ŵekha kulaŵilira mipingo Yacikhristu pa caru cose iyo yilipo pafupifupi 100,000. Lekani wovwiri unyake uwo Ŵakhristu ŵakuphakazgika ŵakupokera kufuma ku ŵa mberere zinyake ngwakuti ŵanalume ŵakwenelera ŵakufuma mu mzinda ukuru ŵakuteŵetera nga mbalara mu mipingo. Ŵa mzinda ukuru ŵakovwira “muzga wa magomezgeko na wa vinjeru” kupwelelera mamiliyoni gha Ŵakhristu awo ŵali mu mawoko ghake.
6. Ni mwauli umo wovwiri uwo ŵa mberere zinyake ŵakupeleka ku Ŵakhristu ŵakuphakazgika ukayowoyekerathu?
6 Wovwiri uwo ŵa mzinda ukuru ŵakupeleka ku Ŵakhristu ŵakuphakazgika ukayowoyekerathu na mprofeti Yesaya. Wakalemba kuti: ‘Yehova wakuti: ‘Ŵanchito ŵambura kupokera malipiro ŵa ku Eguputo na ŵamalonda ŵa ku Etiyopiya na Ŵasabi, ŵanthu ŵakuru msinkhu, tiŵizenge kwa imwe, tiŵaŵe ŵinu, ŵamkumulondezgani.’’ (Yes. 45:14, NW) Mwauzimu, Ŵakhristu awo ŵali na cilindizga ca kuzakakhala pa caru capasi ŵakulondezga ŵakuphakazgika na Wupu wawo Wakulongozga ndipo ŵali pasi pa udangiliri wawo. Nga ‘mbanchito ŵambura kupokera malipiro,’ ŵa mberere zinyake ŵakugwiliskira nchito nkhongono ndiposo ndarama zawo kuti ŵalutiske panthazi mulimo wa kupharazga makani ghawemi uwo Khristu wali kupa ŵalondezgi ŵake ŵakuphakazgika awo ŵali pa caru.—Mil. 1:8; Civ. 12:17.
7. Kasi ŵa mzinda ukuru ŵakusambizgika kuti ŵazakaciteci munthazi?
7 Peneapo ŵa mzinda ukuru ŵakovwira ŵakuphakazgika, ŵakusambizgika kuŵa lufura lwa ŵanthu awo ŵazamukhala mu caru ciphya pamasinda pa Haramagedoni. Lufura lwantheura lukwenera kuŵa lwakukhora, ndipo ŵanthu awo ŵakupanga lufura ulu ŵakwenera kuŵa ŵakukhumbisiska kulondezga ulongozgi wa Fumu. Mkhristu waliyose wakupika mwaŵi wa kulongora usange Fumu Khristu Yesu yingamugwiliskira nchito. Usange panyengo yasono munthu wanthena wakugomezgeka ndiposo wali na cipulikano, ndikuti mu caru ciphya cizamumuŵira cipusu kupulikira ulongozgi wa Fumu.
Ŵa Mzinda Ukuru Ŵakulongora Kuti Ŵali na Cipulikano
8, 9. Kasi ŵa mzinda ukuru ŵakulongora wuli kuti ŵali na cipulikano?
8 Pali nthowa zinandi izo ŵa mberere zinyake ŵakulongolera kuti ŵali na cipulikano. Yakwamba njakuti ŵakovwira ŵakuphakazgika kupharazga makani ghawemi gha Ufumu wa Ciuta. (Mat. 24:14; 28:19, 20) Yaciŵiri njakuti ŵakujilambika ku ulongozgi wakufuma ku Wupu Wakulongozga.—Heb. 13:17; ŵazgani Zekariya 8:23.
9 Nthowa yacitatu njakuti ŵa mzinda ukuru ŵakovwira ŵakuphakazgika mwa kulondezga fundo zaurunji za Yehova mu umoyo wawo. Ŵakufwilirapo kulongora ‘citemwa, cimwemwe, mtende, kuzizipizga, wezi, uwemi, magomezgeko, kuzika, kujikora.’ (Gal. 5:22, 23) Mazuŵa ghano, kuŵa na mikhaliro iyi m’malo mwa kucita “milimo ya thupi” kungawoneka kwacilendo. Ndipouli, ŵa mzinda ukuru mbakusimikizga kukana “uzaghali, ukazuzi, ukwakwa, kusopa vikozgo, ufwiti, maulwani, zawe, bina, maukali, zimphindano, zimphatukano, visambizgo vyautesi, sanji, uloŵevu, vilere, na vyose vya ntheura.”—Gal. 5:19-21.
10. Kasi ŵa mzinda ukuru ŵasimikizga kucitaci?
10 Cifukwa cakuti tili ŵambura kufikapo, cingaŵa cipusu yayi kuŵa na vipasi vya mzimu, kukana milimo ya thupi ndiposo kukana kupusikika na caru ca Satana. Ndipouli, tasimikizga mtima kuleka kugongoweskeka na ivyo tikubudiska, panji ulwari kuti vilopweske cipulikano cithu panji kucepeska citemwa cithu pa Yehova. Tikumanya kuti nga umo Yehova walayizgira, wazamuponoska ŵa mzinda ukuru pa suzgo yikuru.
11. Kasi Satana wagwiliskira nchito mauryarya wuli kuti wanange cipulikano ca Ŵakhristu?
11 Ndipouli, nyengo zose tikuŵa maso cifukwa tikumanya kuti mulwani withu mukuru ni Dyabulosi, ndipo wakuthera luŵiro yayi. (Ŵazgani 1 Petros 5:8.) Wayezga kugwiliskira nchito ŵakugaluka ndiposo ŵanthu ŵanyake kuti watipusike kuti tigomezge kuti ivyo tikusambira ni vyautesi. Kweni kanandi uryarya uwu ukutondeka. Nangauli nyengo zinyake nthambuzgo yapangiska mulimo wa kupharazga kuwelera nyuma, kweni kanandi nthambuzgo yakhozgaso cipulikano ca awo ŵatambuzgika. Lekani Satana wagwiliskira nchito comene nthowa iyo wakuwona kuti yingananga cipulikano cithu. Para tayamba kujiwona nga tili ŵakutondeka, wakusangirapo mwaŵi. Ŵakhristu ŵakwambilira ŵakacenjezgeka kuti ŵaleke kuŵa na kaghanaghaniro kanthena. Ŵakaphalirika kuti: “Ghanaghanani na [Khristu] Mweneuyo wakazizipizga para ŵakwananga ŵakapindananga.” Cifukwa wuli? “Mwakuti muleke kuŵa ŵakutomboroka, panji ŵakuwa nkhumbi mu mizimu yinu.”—Heb. 12:3.
12. Kasi ulongozgi wa mu Baibolo ukukhozga wuli awo ŵakujiwona nga mbakutondeka?
12 Kasi muli kughanaghanapo kuti muleke kuteŵetera Yehova? Kasi nyengo zinyake mukughanaghana kuti muli ŵakutondeka? Usange ni nthena, lekani kuzomerezga kuti Satana wasangirepo mwaŵi pa maghanoghano ghanthena na kumutondeskani kuteŵetera Yehova. Kuŵazga Baibolo mwakufwilirapo, lurombo lwakufuma pasi pa mtima, kufika pa maungano nyengo zose ndiposo kucezga na Ŵakhristu ŵanyinu, vimovwiraninge kuti muleke ‘kuwa nkhumbi mu mizimu yinu.’ Yehova walayizga kuti wawovwirenge awo ŵakumuteŵetera kuti ŵaŵeso na nkhongono, ndipo ivyo walayizga vicitikenge nadi. (Ŵazgani Yesaya 40:30, 31.) Ŵikani mtima winu wose pa milimo ya Cikhristu. Lekani kutangwaniskika na vinthu ivyo vingamumalirani waka nyengo, kweni yezgayezgani kovwira ŵanji. Kucita nthena kumupaninge nkhongono zakutondera maghanoghano gha kujiwona nga ndimwe wakutondeka.—Gal. 6:1, 2.
Ŵazamupona Suzgo Yikuru na Kunjira mu Caru Ciphya
13. Kasi awo ŵazamupona pa Haramagedoni ŵazamucita nchito wuli?
13 Para Haramagedoni yajumpha, ŵanthu ŵambura urunji ŵanandi awo ŵazamuwuskika ŵazamukhumba kusambizgika nthowa za Yehova. (Mil. 24:15) Ŵazamukhumbikwira kusambizgika za sembe yakuwombora ya Yesu. Cakuzirwa comene nchakuti ŵakwenera kuzakasambizgika kuŵa na cipulikano mu sembe iyi mwakuti ŵazakasange nayo candulo. Ŵazamukhumbikwira kuleka maghanoghano gha cisopa cautesi agho ŵakaŵa nagho, ndiposo kuleka nthowa zawo zapakwamba. Ŵakwenera kuzakamanya umo ŵangavwalira wunthu wuphya uwo nchimanyikwiro ca Ŵakhristu ŵaunenesko. (Efe. 4:22-24; Kol. 3:9, 10) Ŵa mberere zinyake awo ŵazamupona pa Haramagedoni ŵazamuŵa na nchito yikuru yakuti ŵazakacite. Cizamuŵa cakukondweska nadi kuteŵetera Yehova mu nyengo iyi, apo kuzamuŵavya masuzgo ndiposo nthimbanizgo kufuma ku caru ciheni ici.
14, 15. Longosorani umo awo ŵazamupona pa Haramagedoni ŵazamusambizgira ŵarunji awo ŵazamuwuskika ndiposo ivyo nawo ŵazamusambira ku ŵanthu aŵa.
14 Pa nyengo iyo, ŵateŵeti ŵakugomezgeka ŵa Yehova awo ŵakafwa pambere Yesu wandize, nawo ŵazamukhumbikwira kusambizgika vinandi. Ŵazamusambira vimanyikwiro vya Mesiya, uyo ŵakamulindilira kwa nyengo yitali, kweni ŵakamuwona yayi. Mu umoyo wawo, ŵakalongora kale kuti mbakukhumbisiska kusambizgika na Yehova. Ghanaghanirani mwaŵi na cimwemwe ivyo ŵa mzinda ukuru ŵazamuŵa navyo, mwaciyelezgero, kulongosolera Daniyeli umo maucimi agho wakalemba ghafiskikira nangauli iyo wakaleka kughapulikiska.—Dan. 12:8, 9.
15 Nangauli awo ŵazamuwuskika tizamuŵasambizga vinandi, kweni nase tizamuŵafumbaso vinthu vinandi. Ŵazamutovwira kupulikiska vinandi ivyo vili kulembeka mu Baibolo, ivyo vindalongosoreke vyose. Aghanaghanirani waka umo cizamuŵira cakukondweska apo Yohane Mbapatizi wazamulongosora vinandi vyakukhwaskana na mbali wake Yesu. Ivyo tizamusambira kufuma ku ŵakaboni ŵakugomezgeka aŵa vizamutovwira kupulikiska comene Mazgu gha Ciuta kuluska umo tikughapulikiskira sono. Ŵateŵeti ŵakugomezgeka ŵa Yehova awo ŵali kufwa, kusazgapo ŵa mzinda ukuru awo ŵakufwa mu nyengo yaumaliro yino, ŵazamuwuka pa “kuwuka kuwemi kwakuluska.” Iwo ŵakamba kuteŵetera Yehova mu caru cakuwusika na Satana. Ŵazamuŵa ŵakukondwa comene kulutizga kuteŵetera Yehova mu caru ciphya ico muzamuŵa mikhaliro yiwemi.—Heb. 11:35; 1 Yoh. 5:19.
16. Kasi ucimi ukulongora kuti pa Zuŵa la Ceruzgo vinthu vizamwenda wuli?
16 Panyengo yinyake mukati mwa Zuŵa la Ceruzgo, mabuku ghazamujulika. Wose awo ŵazamuŵa ŵamoyo panyengo iyo, ŵazamweruzgika kwakulingana na ivyo vizamulembeka mu mabuku agha ndiposo mu Baibolo mwakuti ŵapimike usange mbakwenelera umoyo wamuyirayira. (Ŵazgani Civumbuzi 20:12, 13.) Paumaliro wa Zuŵa la Ceruzgo, waliyose wazamuŵa kuti wapika mwaŵi wakukwana wa kulongora cigaŵa ico wali pa nkhani ya muwuso wa Ciuta. Kasi wazamujilambika ku Ufumu wa Ciuta ndiposo kuzomera kuti Mwanamberere wamulongozgere ku “mbwiwi za maji ghaumoyo”? Panji, wazamukana kujilambika ku Ufumu wa Ciuta? (Civ. 7:17; Yes. 65:20) Panyengo iyo, waliyose wazamuŵa kuti wapika mwaŵi wa kusankha, ndipo wazamutimbanizgika yayi na kwananga uko tili kuhara nesi caru ciheni. Palije uyo wazamukayikira usange ceruzgo caumaliro ico Yehova wazamupeleka cizamuŵa caurunji. Ŵaheni ŵekha ndiwo ŵazamuparanyika kwamuyirayira.—Civ. 20:14, 15.
17, 18. Kasi Ŵakhristu ŵakuphakazgika ndiposo ŵa mberere zinyake ŵakulindizga vinthu wuli viwemi pa Zuŵa la Ceruzgo?
17 Ŵakhristu ŵakuphakazgika, awo ŵapimika kuti mbakwenelera kupokera Ufumu mbakunweka kuzakawusa pa Zuŵa la Ceruzgo. Ŵazamuŵa na mwaŵi ukuru comene. Cilindizga cawo cikuŵakhuŵilizga kulondezga ulongozgi uwo Petrosi wakaphalira ŵabali ŵawo ŵakwambilira kuti: “Muŵe na mwamphu kwakuluska kukhozga kucemeka kwinu na kasolekero kinu; cifukwa para mukucita vyeneivi, kuti muti mukhuŵalengepo cara: Cifukwa ntheura ndimo uti uŵikikilengeko comene kwa imwe unjiliro ku ufumu wamuyirayira wa Fumu yithu na Mponoski Yesu Khristu.”—2 Pet. 1:10, 11.
18 Ŵa mberere zinyake mbakukondwa kuti ŵabali ŵawo ŵakuphakazgika ŵali na cilindizga cantheura. Mbakukhumbisiska kuŵawovwira. Pakuŵa mabwezi gha Ciuta, mbakukhumbisiska kuteŵetera Ciuta na mtima wose. Pa Zuŵa la Ceruzgo, ŵazamuŵa ŵakukondwa kukhozgera ivyo Ciuta wazamunozga ndiposo ŵazamuŵa ŵakukondwa apo Yesu wazamuŵalongozgera ku mbwiwi za maji ghaumoyo. Paumaliro, ŵazamupimika ŵakwenelera kuŵa ŵateŵeti ŵa Yehova ŵamuyirayira pa caru capasi.—Rom. 8:20, 21; Civ. 21:1-7.
Kasi Mukukumbuka?
• Kasi vinthu vya Yesu vikusazgapo vici?
• Kasi ŵa mzinda ukuru ŵakovwira wuli ŵabali ŵawo ŵakuphakazgika?
• Kasi ŵa mzinda ukuru ŵali na mwaŵi wuli, ndipo ŵakulindizga vici?
• Kasi Zuŵa la Ceruzgo mukuliwona wuli?
[Cithuzithuzi pa peji 25]
Ŵa mzinda ukuru ŵasukutura minjilira yawo na kuyituŵiska mu ndopa za Mwanamberere
[Cithuzithuzi pa peji 27]
Kasi mukukhumba kuzakasambiraci ku ŵanthu ŵakugomezgeka awo ŵazamuwuskika?