Ivyo Ŵaŵazgi Ŵithu Ŵakufumba
Kasi Masoka Ghacilengiwa Nchilango Cakufuma kwa Ciuta?
Ciuta wakugwiliskira nchito masoka ghacilengiwa kuti walange ŵanthu ŵambura kwananga yayi. Wandacitepo ndipo wazamucitapo yayi. Cifukwa wuli? Cifukwa Baibolo pa 1 Yohane 4:8 likuti “Ciuta nkhutemwa.”
Citemwa ni jando la vyose ivyo Ciuta wakucita. Citemwa cikucita vinthu ivyo vingapweteka ŵanthu ŵambura kwananga yayi, cifukwa Baibolo likuti “kutemwa kuti kukumucitira uheni mzengezgani wake cara.” (Ŵaroma 13:10) Pa lemba la Job 34:12, Baibolo likuti: “Ndithu, Ciuta kuti tiwanange cara.”
Mbunenesko kuti Baibolo likayowoyerathu za masoka agho ghakucitika mu nyengo yithu nga ni “vindindindi vikuru.” (Luka 21:11) Kweni Yehova ndiyo yayi wakucitiska masoka agha nga ni umo vikuŵira na munthu uyo wakumanya vya nyengo mweneuyo wangayowoyerathu za cimphepo ico cingaŵapo, kweni kuti ndiyo wakucitiska yayi. Usange Ciuta ndiyo wakucitiska masoka ghacilengiwa yayi, ipo nchivici ico cikucitiska?
Baibolo likuvumbura kuti “caru cose cikugona mu nkhongono za muheni,” Satana Dyabulosi. (1 Yohane 5:19) Iyo wakukoma ŵanthu kufuma apo ŵakalengekera mpaka sono. (Yohane 8:44) Satana wakucindika yayi umoyo wa ŵanthu. Wakupwelelera vya iyo yekha, lekani wapangiska ŵanthu pa caru cose kuŵa na maghanoghano gha kupwelelera vyawo pera. Mazuŵa ghano, caru cacitiska ŵanthu ŵanandi kuŵa ŵambura kuvikilirika, kukhala mu malo agho muli masoka ghacilengiwa, panji ghakucitiskika na ŵanthu. (Ŵaefeso 2:2; 1 Yohane 2:16) Ntheura, ŵanthu ŵaryezi ndiwo ŵakucitiska masoka ghanyake. (Mupharazgi 8:9) Mwawuli?
Masoka ghanyake ŵakucitiska mbanthu. Mwaciyelezgero, aghanaghanirani za masuzgo agho ghakaŵapo cifukwa ca cimphepo na civula cikuru ivyo vikacitika mu msumba wa New Orleans, U.S.A, panji nyumba izo zikanangika na mathipa agho ghakafuma ku mapiri gha Venezuela. Mu vyakucitika ivi, panji vinyake, mphepo na vula vikupangiska masoka ghacilengiwa comene nchifukwa cakuti ŵanthu ŵakutondeka kumanya makora malo agho ŵazengapo, kuzenga mwambura kwenelera, kuleka kughanaghanira makora, kuleka kupulikira macenjezgo, ndiposo cifukwa ca ŵalongozgi.
Aghanaghanirani soka la cilengiwa ilo likacitika mu nyengo yakale. Mu nyengo ya Yesu, gongwe ilo likawa mwamabuci likakoma ŵanthu ŵakukwana 18. (Luka 13:4) Soka ili likwenera kuti likacitika cifukwa ca ŵanthu, panji likacitika waka mwamabuci, kweni cikaŵa cilango cakufuma kwa Ciuta yayi.—Mupharazgi 9:11.
Kasi ghalipo masoka agho ghakacitiskika na Ciuta? Enya, kweni ghakupambana na masoka ghacilengiwa panji agho ghakucitiskika na ŵanthu, cifukwa ghakaŵa ghakusankha, ghakaŵa na cilato, ndiposo ghakacitika pafupipafupi yayi. Viyelezgero viŵiri ni Ciwowota ico cikacitika pa caru cose capasi mu nyengo ya Nowa, ndiposo kuparanyika kwa misumba ya Sodomu na Gomora mu nyengo ya Loti. (Genesis 6:7-9, 13; 18:20-32; 19:24) Vyeruzgo vya Ciuta ivi vikaparanya ŵanthu ŵambura kung’anamuka mtima, kweni awo ŵakaŵa ŵakunyoroka, ŵakapona.
Manyani kuti Yehova Ciuta wali na nthowa, khumbo, ndiposo nkhongono za kumazgira masuzgo ghose na kupembuzga awo ŵakusuzgika na masoka ghacilengiwa. Pakuyowoya za Yesu Khristu, Themba lakwimikika na Ciuta, lemba la Salmo 72:12 likuti: “Cifukwa wakuthaska musauci para wacema, na mukavu, na uyo walije movwiri.”