Nkhani ya Nowa na Ciwowota Njaunenesko, Nchidokoni Yayi
KASI mukudokera caru ciwemi? Caru ico ŵanthu wose mbamtende, cambura nkhondo, kuswa malango, ndiposo kusuzgana. Usange ni nthena, ipo mungakhozgeka na nkhani iyo mukuyimanya kale makora. Ni nkhani ya Nowa, uyo wakaŵa munthu muwemi, mweneuyo wakakhoma cingalaŵa ico cikaponoska iyo ndiposo ŵa mu mbumba yake pa nyengo iyo ciwowota cikaparanya caru ciheni cakale.
Ni nkhani zicoko waka izo zikumanyikwa comene pa caru cose. Nkhani ya Nowa yikusangika mu buku la Genesis vipaturo 6 mpaka 9, ndiposo yikusangika mu Korani, kweniso mu vidokoni vinandi ivyo ŵanthu ŵakuyowoya. Kasi Ciwowota cikacitika nadi, panji nchidokoni waka ico cikuciska ŵanthu kuti ŵacitenge vinthu viwemi? Ŵasambizgi ŵa visopa na ŵasayansi ŵasuskana pa nkhani iyi kwa vilimika vinandi comene. Kweni Baibolo ilo ni Mazgu gha Ciuta, likuyowoya mwakupulikikwa makora za nkhani iyi, kuti nchidokoni yayi. Wonani fundo izi:
Buku la Genesis likutiphalira makora za cilimika, mwezi, zuŵa ilo Ciwowota cikambira, nyengo na malo agho cingalaŵa cikimapo, ndiposo nyengo iyo maji ghakakamukira pa caru. Likuyowoyaso vinandi vyakukhwaskana na cingalaŵa, umo cikaŵira, ukuru wake, ndiposo vinthu ivyo ŵakagwiliskira nchito pa kucipanga. Kweni vidokoni kuti vikulongosora mwakupulikikwa yayi.
Nkhani ziŵiri za mu Baibolo izo zikulongosora mukoka, zikukhozgera kuti Nowa wakaŵako nadi. (1 Midauko 1:4; Luka 3:36) Ezra na Luka awo ŵali kulemba mikoka iyi, ŵakasandanga vinthu mwakupwelelera comene. Luka wakasanda mukoka wa Yesu Khristu mpaka pa Nowa.
Mprofeti Yesaya na Ezekiyeli ndiposo mpositole Paulosi na Petrosi, nawo ŵakayowoyapo za Nowa panji Ciwowota.—Yesaya 54:9; Ezekiel 14:14, 20; Ŵahebere 11:7; 1 Petros 3:19, 20; 2 Petros 2:5.
Yesu Khristu pakuyowoya za Ciwowota, wakati: “Ntheura umo kukaŵira mu mazuŵa gha Nowa, ntheura ndimo kuti kuŵirengeso mu mazuŵa gha Mwana wa Munthu. Ŵakaryanga, ŵakamwanga, ŵakatenganga, ŵakatengwanga, likasuka likiza zuŵa ilo Nowa wakanjira mu Cingalaŵa, ndipo Ciwowota cikiza cikaŵaparanya wose.” (Luka 17:26, 27) Usange Ciwowota cikacitika yayi, mbwenu fundo ya Yesu yakuyowoya za “mazuŵa gha Mwana wa Munthu” yikaŵa yambura candulo.
Mpositole Petrosi wakayowoyerathu kuti “ŵagoski” ŵati ŵizenge, ŵeneawo ŵasuskenge ivyo Baibolo likuyowoya. Petrosi wakalemba kuti “ŵakuluwira nchene ceneici, kuti . . . caru [ca mu nyengo ya Nowa cikaparanyika] na maji.” Kasi tikutondeka kupulikiska fundo iyi? Napacoko pose. Petrosi wakatiso: “Macanya agha ghaliko sono, na caru, vili kulimbikira moto, pa kusungikira zuŵa la njeruzgo na pharaniko la ŵanthu ŵacikana Ciuta.”—2 Petros 3:3-7.
Ciuta wazamuparanyaso caru ciheni ici, kweni pazamuŵaso ŵanthu awo ŵazamupona. Para tikulondezga ciyelezgero ca Nowa, nase tingazakaŵa ŵamoza mwa ŵakunyoroka awo ŵazamunjira mu caru ciwemi.