Yehova Wakuŵapwelelera Ŵacekuru Awo Mbateŵeti Ŵake
“Ciuta kuti ngwambura urunji cara, kuti waluwe mulimo winu na kutemwa uko mukalongora ku zina lake.”—HEB. 6:10.
1, 2. (a) Kasi mukukumbuka za vici para mwawona munthu uyo wali na nyivwi? (b) Kasi Yehova wakuŵawona wuli Ŵakhristu ŵacekuru?
PARA mukuwona ŵacekuru awo ŵali na nyivwi mu mpingo winu, kasi mukukumbuka nkhani ya mu Baibolo iyo yili mu buku la Daniel? Mu mboniwoni iyo wakalongora Daniyeli, Yehova Ciuta wakawoneka nga wali na nyivwi. Daniyeli wakalemba kuti: “Apo nkhalaŵiskanga, vizumbe vyaŵikika ndipo yumoza Mulara wa Mwaka wakakhalapo; vyakuvwara vyake vikaŵa vituŵa nga ndi ciwuvi, na sisi la mutu wake nga ndi weya utuŵa.”—Dan. 7:9.
2 Para weya wa mberere yituŵa undabinkhe ukuŵa utuŵa comene. Ntheura, weya utuŵa na “Mulara wa Mwaka” vikwimira ulara na vinjeru vikuru vya Ciuta, ivyo vikwenera kutipangiska kuti timucindikenge comene. Ipo kasi Yehova, uyo ni Mulara wa Mwaka, wakuŵawona wuli ŵateŵeti ŵake ŵakugomezgeka awo mbacekuru? Mazgu gha Ciuta ghakuti “mbuha ndizo mphumphu ya ucindami, zili nga ndi njombe ya umoyo wa urunji.” (Zinth. 16:31) Enya, usange Mkhristu wakugomezgeka waŵa na mbuha panji kuti nyivwi, wakuwoneka wakutowa comene mu maso gha Ciuta. Kasi namwe mukuwona ŵacekuru nga ni umo Yehova wakuŵawonera?
Cifukwa Wuli Mbakuzirwa Comene?
3. Cifukwa wuli ŵasopi ŵanyithu awo mbacekuru mbakuzirwa comene kwa ise?
3 Pakati pa ŵateŵeti ŵakutemweka ŵa Ciuta aŵa, pali ŵabali awo ŵali mu Wupu Wakulongozga wa Ŵakaboni ŵa Yehova, ŵanthu awo kale panji pa nyengo yasono mbalaŵiliri ŵakwendakwenda, ŵapayiniya ŵamwamphu, ndiposo ŵapharazgi ŵa Ufumu ŵakukhwima. Enya, aŵa mbabali na ŵadumbu awo ŵakuteŵetera mwakugomezgeka mu mipingo yithu. Panji mungamanya ŵacekuru ŵanyake awo ŵapharazga makani ghawemi gha Ufumu mwamwamphu kwa vilimika vinandi, ŵeneawo ciyelezgero cawo ciwemi cawovwira ŵaciwukirano ŵanandi kusintha umoyo wawo. Ŵasopi ŵanyithu ŵanyake awo mbacekuru ŵacita milimo yikuru ndipo ŵazizipizga nthambuzgo cifukwa ca makani ghawemi. Yehova na “muzga wa magomezgeko” ŵakuŵawonga comene cifukwa ca milimo yawo yakale na yasono iyo ŵakucita pa nchito ya Ufumu.—Mat. 24:45.
4. Cifukwa wuli tikwenera kucindika ndiposo kulombera Ŵakhristu awo mbacekuru?
4 Ŵacekuru ŵakugomezgeka aŵa, mbakwenelera viwongo na nchindi zakufuma ku ŵateŵeti ŵanyawo ŵa Yehova Ciuta. Nakuti Dango la Ciuta ilo wakapeleka kwizira mwa Mozesi likulongora kuti pali kukolerana pakati pa kucindika ŵacekuru na kopa Yehova. (Lev. 19:32) Tiyeni nyengo zose tiŵalomberenge ŵanthu ŵakugomezgeka aŵa na kuwonga Ciuta cifukwa ca milimo yawo ya citemwa. Mpositole Paulosi wakalombera ŵanchito ŵanyake, kwali mbana panji ŵalara.—Ŵazgani 1 Ŵatesalonika 1:2, 3.
5. Kasi tingasanga wuli candulo cifukwa ca kucezga na ŵacekuru awo ŵakusopa Yehova?
5 Mwakusazgirapo, waliyose mu mpingo wangasanga candulo cifukwa ca kucezga na Ŵakhristu ŵacekuru. Ŵacekuru ŵakugomezgeka kwa Yehova aŵa ŵamanya vinthu vyakuzirwa comene cifukwa ca kuŵazga, cifukwa ca ivyo ŵawona mu umoyo, ndiposo ivyo vyaŵacitikira. Ŵasambira kuŵa wakuzika na kulongora lusungu ŵanyawo, ndipo ŵakuŵa ŵacimwemwe ndiposo ŵakukhorwa para ŵakusambizga muwiro wakulondezgapo ivyo ŵasambira. (Sal. 71:18) Imwe mundacekure, ŵani na vinjeru na kuneghapo ivyo ŵacekuru ŵakumanya nga ni umo munthu wanganeghera maji pa cisimi citali.—Zinth. 20:5.
6. Kasi mungalongora wuli kuti ŵacekuru mukuŵazirwiska nadi?
6 Kasi mukulongora kuti mukutemwa ŵacekuru nga ni umo Yehova wakuŵatemwera? Nthowa yimoza iyo mungacitira nthena nkhuŵaphalira kuti mukuŵatemwa comene cifukwa ca kugomezgeka kwawo ndiposo kuti mukuzirwiska comene maghanoghano ghawo. Mwakusazgirapo, mukulongora kuti mukuŵacindika nadi para mukulondezga ivyo mukusambira kwa iwo. Ŵacekuru ŵanandi awo Mbakhristu ŵangakumbukira ulongozgi wavinjeru uwo ŵakapokera apo ŵakaŵa ŵanici kufuma ku ŵacekuru ndiposo umo ulongozgi uwo waŵawovwilira pa umoyo wawo wose.a
Muŵapwelelerenge na Kuŵalongora Lusungu
7. Kasi nkhwa anjani uko Yehova wali kupeleka mulimo wa kupwelelera ŵacekuru?
7 Ciuta wali kupeleka mulimo wa kupwelelera ŵacekuru ku ŵa mu mbumba yawo. (Ŵazgani 1 Timote 5:4, 8.) Yehova wakukondwa para mbumba zikufiska mulimo uwu na kulongora kuti zikutemwa ŵacekuru nga ni umo Iyo wakucitira. Ciuta wakovwira mbumba izi ndipo wakuzitumbika cifukwa ca kuyezgayezga uko zikucita ndiposo cifukwa ca vyose ivyo zikuleka cifukwa ca mulimo uwu.b
8. Cifukwa wuli mipingo yikwenera kulongora kuti yikughanaghanira Ŵakhristu ŵacekuru?
8 Mwakuyana waka, Yehova wakukondwa comene para mpingo ukovwira ŵacekuru ŵakugomezgeka awo mbakusoŵerwa kweni ŵalije ŵabali ŵawo ŵauzimu panji ŵakuthupi awo mbakunweka kuŵapwelelera. (1 Tim. 5:3, 5, 9, 10) Mwakucita ntheura, mipingo yikulongora kuti ‘yikulengera lusungu, kutemwa, na kupwelera’ ŵacekuru. (1 Pet. 3:8) Kughanaghanira ŵanthu awo mbacekuru mu mpingo kuli kulongosoreka makora na mpositole Paulosi apo wakayowoya kuti usange ciŵaro cimoza ca thupi cikupwetekeka, “viŵaro vyose vikupwetekeka naco pamoza.” (1 Kor. 12:26) Kupwelelera na kuŵacitira lusungu ŵacekuru ndiyo fundo yikuru iyo Paulosi wakayowoyanga apo wakati: “Pokeleranani vizitu, ndipo ntheura fiskani dango la Khristu.”—Gal. 6:2.
9. Kasi ni vizitu wuli ivyo vikuŵa na ŵanthu ŵacekuru?
9 Kasi ni vizitu wuli ivyo ŵacekuru ŵakuyegha? Ŵanandi ŵakuvuka luŵiro. Iwo ŵangawona kuti nchinonono kucita milimo nga ni kuluta ku cipatala, kukatora makalata ku positi, kukalipira mabilu, kupwelelera mu nyumba, na kuphika. Pakuti khumbo la kurya likuŵa licoko, iwo ŵangamba kughanaghana kuti ŵakukhumbikwira kurya yayi nesi kumwa. Kweni unenesko ngwakuti iwo ŵakukhumbikwira kurya. Ndimo ŵangamba kuwoneraso cakurya cauzimu. Pakuti maso na makutu gha ŵacekuru vikufwa, cikuŵa cakusuzga kuŵazga na kutegherezga maungano Ghacikhristu, ndipo kunozgekera kuluta ku maungano kungaŵa kwakuvuska comene. Ipo kasi ŵanji ŵangacita wuli na ŵanthu ŵacekuru aŵa?
Umo Mungawovwilira
10. Kasi ŵalara ŵangacita wuli kuti ŵawoneseskenge kuti ŵacekuru ŵakovwirika?
10 Mu mipingo yinandi, ŵacekuru ŵakupwelelereka makora comene. Ŵabali na ŵadumbu ŵakuŵawovwira kugura vinthu, kuphika na kutozga vinthu. Ŵakuŵawovwira kuŵazga, kunozgekera maungano, ndiposo kuti ŵacitenge uteŵeti nyengo zose. Ŵakaboni awo mbacekuru yayi ŵakuluta nawo mu uteŵeti na kuŵawovwira mendero. Usange ŵacekuru ŵakutondeka kwenda, ŵabali ŵakujambura maungano ghose kuti ŵakapulikizgirenge pa nyumba. Usange nchamacitiko, ŵalara ŵakuwoneseska kuti ŵacekuru ŵa mu mpingo wawo ŵawovwirika.c
11. Longosorani umo mbumba yinyake yikawovwilira mbali mucekuru.
11 Kweniso, Mkhristu waliyose payekha wangapwelelera ŵacekuru na kuŵalongora lusungu. Muwoli wa mbali munyake mucekuru wakati wafwa, cikaŵa cinonono kuti iyo walipirenge yekha lenti kwambura ndarama za penshoni ya muwoli wake. Pambere muwoli wake wandafwe, iwo ŵakasambiranga Baibolo na mbumba yinyake. Mbumba iyi yikaŵa na dada, mama, na ŵana ŵasungwana ŵaŵiri, ndipo yikaŵa na nyumba yikuru. Yikapa mbali mucekuru uyu vipinda viŵiri kuti wakhalengemo. Kwa vilimika 15, ŵakaryeranga lumoza cakurya, kusekera lumoza, na kucita vinthu mwaubali. Ŵanici ŵakasanga candulo cikuru na cipulikano cake ndiposo vinthu vinandi ivyo wakamanyanga, kweniso nayo wakasanga candulo na nchezgo zakukondweska izo ŵakaŵanga nazo. Mbali mucekuru uyu wakakhala nawo mpaka apo wakafwira, peneapo wakaŵa na vilimika 89. Mbumba iyi yicali kuwonga Ciuta cifukwa ca vitumbiko vinandi ivyo yikasanga cifukwa ca kukhalira lumoza na mbali uyu. Iwo ‘ŵandataye njombe yawo’ cifukwa ca kovwira msambiri munyawo wa Yesu Khristu.—Mat. 10:42.d
12. Kasi mungacitaci kuti mulongore kuti mukucindika ŵabali na ŵadumbu awo mbacekuru?
12 Panji ukhaliro ungamuzomerezgani yayi kuti mupwelelere mbali panji mudumbu mucekuru nga umo mbumba iyi yikacitira, kweni mungawovwira ŵacekuru kuluta ku maungano na mu uteŵeti wa m’munda. Kweniso mungaŵacema kuti muzakacezge nawo ku nyumba kwinu ndiposo kuluta nawo kukatembeya. Mungaluta kukaŵawona, comenecomene para ŵalwara panji para ŵakutondeka kwenda. Mwakusazgirapo, para mukucita nawo vinthu, nyengo zose mulongorenge kuti mbalara. Para nkhwakuti ŵangakwaniska kuyowoyapo, Ŵakhristu ŵacekuru ŵakwenera kuŵapo para mukukaka fundo izo zikuŵakhwaska. Nanga ni awo ŵacekura comene mwakuti ŵakukumbukira yayi vinthu, ŵakumanya usange mukuŵacindika panji yayi.
Yehova Wazamuluwapo Yayi Mulimo Winu
13. Cifukwa wuli nchakuzirwa comene kughanaghanira Ŵakhristu awo mbacekuru?
13 Nchakuzirwa comene kulongora kuti mukughanaghanira ŵacekuru. Kanandi ŵacekuru ŵakukwenyelera comene cifukwa ŵakutondeka kucita vinthu ivyo ŵakacitanga makora apo ŵakaŵa ŵawukirano ndiposo apo ŵakaŵa na umoyo uwemi. Mwaciyelezgero, mudumbu munyake uyo wakateŵetera Yehova mwakugomezgeka kwa vilimika 50, ndiposo uyo wakaŵa mupayiniya wa nyengo zose wakalwara nthenda yakofya comene ndipo vikamusuzganga comene kuluta ku maungano. Apo wakayaniska umo kale wakacitiranga uteŵeti na umo wakucitira sono, wakamba kulira. Wakasindama mutu wake uku wakulira, ndipo wakati: “Palijirethu ico nkhucita.”
14. Kasi ŵateŵeti ŵa Yehova awo mbacekuru ŵangakhozgeka wuli na fundo za mu masalmo?
14 Usange ndimwe mucekuru, kasi namwe muli kuŵapo na maghanoghano agha? Panji kasi yikuŵapo nyengo iyo mukuwona nga Yehova wamutayani? Umu ndimo wamasalmo wakwenera kuti wakajipulikiranga wakati wacekura, cifukwa wakalomba Yehova kuti: “Munganditayanga mu ucekuru wane; mungandisidanga para zalopwa nkhongono zane. Nanga mphakucekura ine na kuŵa na mbuha, A Ciuta, mungandisidanga.” (Sal. 71:9, 18) Yehova wakaŵa pafupi kumuleka yayi uyo wakalemba salmo ili, ndipo namwe wamulekaninge cara. Mu salmo linyake, Davide wakalongora kuti wakugomezga kuti Ciuta wamovwirenge. (Ŵazgani Salmo 68:19.) Namwe simikizgani kuti usange ndimwe Mkhristu wakugomezgeka uyo ni mucekuru, Yehova waŵenge namwe ndipo walutilirenge kumusungilirani zuŵa na zuŵa.
15. Nchivici ico cingawovwira ŵacekuru kuti ŵaŵenge na maghanoghano ghawemi?
15 Yehova wakuluwa yayi vyose ivyo imwe Ŵakaboni ŵake ŵacekuru muli kucita ndiposo ivyo mukucita sono kuti mupeleke ucindami kwa iyo. Baibolo likuti: “Ciuta kuti ngwambura urunji cara, kuti waluwe mulimo winu na kutemwa uko mukalongora ku zina lake.” (Heb. 6:10) Ntheura, kanani maghanoghano ghaheni ghakuti Yehova walije namwe nchito cifukwa cakuti mwacekura. Yezgayezgani kuwuskamo maghanoghano ghakujigongoweska agha, na kwamba kughanaghana vinthu viwemi. Kondwani na vitumbiko ivyo mwasanga ndiposo ivyo mukulindizga munthazi. Tili na ‘umaliro wakugomezgeka,’ uwemi comene, uwo Mlengi withu wali kutisimikizgira. (Yer. 29:11, 12; Mil. 17:31; 1 Tim. 6:19) Ghanaghanirani za cilindizga cinu, ndipo mujiwonenge nga ndimwe muwukirano mu mtima ndiposo maghanoghano ghinu. Mungakayikiranga yayi kuti ndimwe ŵakuzirwa comene mu mpingo.e
16. Cifukwa wuli mbali munyake mucekuru wakaghanaghana kuti waleke kuteŵetera nga ni mulara, kweni wupu wa ŵalara ukamukhozga wuli?
16 Ghanaghanirani za Johan, uyo wali na vilimika 80 ndipo wakupwelelera muwoli wake wakugomezgeka, uyo pa nyengo yasono wakutondeka kwenda, zina lake Sannie.f Ŵadumbu ŵakusinthana kupwelelera Sannie mwakuti Johan walute ku maungano na mu uteŵeti. Sonosono apa, Johan wakawona kuti wali pafupi kutondeka kufiska mulimo wake ndipo wakamba kughanaghana kuti waleke kuteŵetera nga ni mulara pa mpingo. Iyo wakalira kuti: “Palije cifukwa cakuti niŵire mulara wa mpingo. Nkhucitamo na kanthu yayi mu mpingo.” Wupu wa ŵalara ukamuphalira kuti vinthu ivyo wakamanyanga ndiposo kuyowoya vikaŵa vyakuzirwa comene. Ŵakamupempha kuti walutilire kuŵa mulara nangauli wangakwaniska yayi kucita vinthu vinyake. Johan wakakhozgeka comene ndipo wakulutilira kuteŵetera nga ni mulara. Ici capangiska kuti mpingo utumbikike comene.
Yehova Wakumupwelelerani Nadi
17. Kasi Baibolo likuŵasimikizgira vici Ŵakhristu awo mbacekuru?
17 Malemba ghakulongosora makora kuti ŵacekuru ŵangacita makora vinthu vyauzimu nangauli ŵali na masuzgo agho ghakwiza cifukwa ca ucekuru. Wamasalmo wakayowoya kuti: ‘Ŵanthu ŵantheura ŵali kupandika mu nyumba ya Yehova . . . Ŵakupasa vipasi ndipera mu ucekuru, ŵatikita na kupasa.’ (Sal. 92:13, 14) Mpositole Paulosi wakwenera kuti wakalimbananga na suzgo linyake, kweni ‘wakavuka cara; nangauli wunthu wake wa kuwaro ukavukuparanga.’—Ŵazgani 2 Ŵakorinte 4:16-18.
18. Cifukwa wuli Ŵakhristu ŵacekuru ndiposo awo ŵakuŵapwelelera ŵakukhumbikwira wovwiri wa ŵanji?
18 Viyelezgero vinandi vya mazuŵa ghano vikulongora kuti ŵacekuru ‘ŵangapasa vipasi ndipera.’ Kweni masuzgo nga ni ulwari na ucekuru vingaŵa vyakugulura nkhongono nanga kungaŵa ku ŵacekuru awo ŵali na ŵabali ŵawo awo ŵakuŵapwelelera. Awo ŵakuŵapwelelera nawo ŵangavuka. Mpingo uli na mwaŵi ndiposo udindo wa kulongora citemwa cawo ku ŵacekuru na ŵanthu awo ŵakuŵapwelelera. (Gal. 6:10) Wovwiri uwu ukulongora kuti tikuŵaphalira yayi ŵanthu aŵa kuti: “Lutaninge mu mtende, muthukire, mukhute” uku tindaŵawovwire.—Yak. 2:15-17.
19. Cifukwa wuli Ŵakhristu awo mbacekuru ŵangalindilira vinthu vya munthazi na mtima wose?
19 Ucekuru ungapangiska kuti milimo ya Mkhristu yisinthe, kweni unandi wa vilimika ivyo ŵangakhala ungacepeska yayi citemwa ca Yehova kwa ŵateŵeti ŵake ŵakugomezgeka awo mbacekuru. M’malo mwake, Ŵakhristu wose ŵakugomezgeka aŵa, mbakuzirwa comene kwa iyo ndipo waŵatayengepo yayi. (Sal. 37:28; Yes. 46:4) Yehova waŵawovwirenge na kuŵalongozga mu nyengo yose ya ucekuru wawo.—Sal. 48:14.
[Mazgu ghamusi]
a Wonani nkhani yakuti “Ŵacekuru Ni Thumbiko ku Ŵawukirano,” iyo yili mu Gongwe la Mulinda la Juni 1, 2007.
b Wonani Galamukani! ya Febuluwale 8, 1994, mapeji 3 mpaka 10.
c Mu vyaru vinyake, ici cingasazgapo kovwira ŵacekuru kuti ŵapokerenge wovwiri wa boma. Wonani nkhani yakuti “Ciuta Wakupwelelera Ŵacekuru,” mu Gongwe la Mulinda la Juni 1, 2006.
d Wonani nkhani yakuti “Yehova Amatisamalira Nthaŵi Zonse,” mu Gongwe la Mulinda la Ciceŵa la Seputembala 1, 2003.
e Wonani nkhani yakuti “Ulemerero wa Imvi,” mu Gongwe la Mulinda la Ciceŵa la Malici 15, 1993.
f Mazina ghasinthika.
Kasi Mungazgora Wuli?
• Cifukwa wuli Ŵakhristu ŵakugomezgeka awo mbacekuru mukuŵawona kuti mbakuzirwa comene?
• Kasi tingalongora wuli kuti tikughanaghanira ŵasopi ŵanyithu awo mbacekuru?
• Kasi ni vici ivyo vingawovwira ŵateŵeti ŵa Yehova awo mbacekuru kuti ŵaŵenge na maghanoghano ghawemi?
[Cithuzithuzi pa peji 18]
Ŵabali na ŵadumbu mu mpingo ŵakuzirwiska comene ŵacekuru