Baibolo Likusintha Umoyo wa Ŵanthu
Cifukwa wuli mwanakazi uyo wakaleka kugomezga cisopa sono wakumalira nyengo yinandi pakovwira ŵanji kusambira vya Ciuta? Nchivici cikacitiska mwanalume munyake uyo wakatemwanga maseŵera ghankhaza kuti wambe kutemwa mtende? Nchivici cikapangiska mwanalume uyo wakamwanga comene minkhwala, phere, na kucita mbembe kuti wasinthe umoyo wake? Ŵazgani ivyo ŵakayowoya.
VYA MUNTHU UYU
ZINA: PENELOPE TOPLICESCU
VILIMIKA: 40
UKO WAKABABIKIRA: AUSTRALIA
IVYO VIKAMUCITIKIRA: WAKAKHUŴAZGIKA NA CISOPA
UMO NKHAŴIRA KALE: Nkhababikira mu msumba wa Sydney ku Australia, kweni apo nkhaŵa na vilimika viŵiri, mbumba yakwithu yikasamira ku New Guinea. Tikakhala ku Rabaul kwa vilimika pafupifupi viŵiri ndipo kwa vilimika vinkhondi na vitatu tikakhala ku Baougainville. Mu nyengo iyo, ku New Guinea kukaŵavya TV, ntheura nkhatemwanga waka kuseŵera na mudumbu wane. Tikaseŵeranga mu maji, ndiposo kuluta ku malo ghanyake.
Apo nkhaŵa na vilimika khumi, nkhamba kunweka na cisopa. Amama ŵakaŵa Mukatolika, ntheura ŵakaniphalira kuti nisambirenge Baibolo na ŵasisitere awo ŵakaŵa mu cigaŵa cithu. Nkhazomera, ndipo nkhabapatizika.
Ndipouli, tikaweleraso ku Australia, pa nyengo iyi nkhaŵa muwukirano, ndipo nkhamba kukayikira ivyo nkhasambira vyakukhwaskana na cisopa. Apo nkhaŵa ku sekondare, nkhasambira mdauko wakale, ndipo ine na adada tikadumbiskananga kwa nyengo yitali za umo cisopa cikambira, ndipo tikawonanga kuti nkhani izo zili mu Baibolo ni zakwata waka. Mukuluta kwa nyengo, nkhaleka kusopa ku Katolika.
Ŵapapi ŵane ŵakapatana apo nkhaŵa na vilimika 16. Panyengo iyi, amama ŵakasuzgika comene maghanoghano, ndipo ine nkhamba kukhala na adada na muwoli wawo muphya. Mudumbu wane wakakhala na amama, ndipo ŵakasamira ku cigaŵa cinyake. Panyengo iyi, nkhaŵa na phukwa comene. Pakatora vilimika viŵiri kuti nambe kukoleranaso na amama. Nkhamba kumwa comene phere, minkhwala yakuzweteska wongo, ndiposo kusangwa. Nkhaleka sukulu na kwamba nchito, ndipo vilimika vyane vyakwambilira vya m’ma 20 vikamalira pa kucita mikhaliro yiheni.
Apo nkhaŵa na vilimika 25, nkhambaso kughanaghanira vya Baibolo. Nkhamba kugwira nchito yinyake ndipo nkhakumana na Liene uyo wakaŵa msungwana wa nkharo yiwemi nangauli abwana ŵake ŵakamuyowoyeranga makora yayi. Nkhati namufumba cifukwa ico wakalekeranga kuŵawezgera, wakaniphalira kuti wakasambiranga Baibolo na Ŵakaboni ŵa Yehova, ndipo wakayezgayezganga kulondezga ivyo Baibolo likuyowoya. Liene wakanipempha kuti tisambirenge Baibolo. Cifukwa cakuti nkhapulikiska yayi ivyo wakang’anamuranga, nkhaghanaghananga kuti nisambirenge mu ora limoza vyose ivyo Liene wakamanyanga. Kwa maora ghatatu, Liene wakazgora mafumbo ghane ghakukhwaskana na Baibolo. Nkhakondwa comene kuti wakanizgora mafumbo ghane ghose kufumira mu Baibolo.
Nkhukumbuka kuti apo nkhaweranga ku nyumba mu usiku uwo nkhadumbiskana na Liene, nkhakwiyira Ciuta cifukwa ca kuleka kunisambizga luŵiro unenesko wakukhwaskana na iyo. Nkhamanyanga kuti Ŵakaboni ŵa Yehova ŵali na mikhaliro yiwemi, kweni nkhawona kuti nacedwa ndipo ningasintha yayi nkharo yane. Nkhaghanaghanangaso kuti ningapharazga yayi ku nyumba na nyumba nga umo Ŵakaboni ŵakucitira. Nkhalutilira kusambira Baibolo na Ŵakaboni ŵa Yehova, kweni nkhakhumbanga waka kuŵasanga vifukwa pa ivyo ŵakusambizga mwakuti njuŵi yane yileke kunisuzga para naleka kusambira nawo. Zuŵa linyake nkhawona kuti vifukwa nivisangenge yayi.
UMO BAIBOLO LASINTHIRA UMOYO WANE: Apo nkhamba kumanya vinandi ivyo Baibolo likusambizga pa nkhani ya mikhaliro yiwemi, njuŵi yane yikanisuzganga comene. Kuti yileke kunisuzga, nkhaleka kumwa minkhwala. Kweni kanyengo kanyake, nkhaluta ku caru cinyake ndipo nkhambaso kumwa comene na kusangwa. Vikawonekanga kuti para nkhuyezga kuŵa na umoyo uwo ukukolerana na ivyo Baibolo likusambizga, nkhambangaso kucita mikhaliro yiheni. Soni zikanikoranga apo nkhalombanga kwa Yehova, kweniso nkhaŵanga na citima comene.
Nkhawovwirika comene nkhati nasambira ivyo Themba Davide likacita na Batisheba ndiposo umo Yehova wakaŵalengera lusungu. Davide wakaŵa na cikanga kuti wazomere ubudi wake apo wakacenyeka, ndipo wakasanga pakugwenthera yayi. Mwakujiyuyura wakazomera nchenyo iyo wakapika. (2 Samuel 12:1-13) Nyengo yiliyose para natondeka kucita makora, nkhaghanaghaniranga nkhani iyi ndipo cikaniŵiranga cipusu kupempha Yehova kuti wanigowokere. Nkhawona kuti nchiwemi kuti nilombenge pambere nindacite cinthu ciheni kuluska kulomba para nacita, ndipo vikanovwira comene.
UMO NASANGIRA CANDULO: Nkhaŵa na mtima wa ku njoŵe. Kweni lemba la Ŵaefeso 4:29-31 likanovwira kuti nileke “kuŵinya mtima kose na ukali na kutukutwa.” Apo nkhayezgayezganga kumazga ukali, nkhasambiraso kukora lulimi lwane. Kweniso ulongozgi wa Yesu wakuti, “mazgu ghinu ghaŵe waka Enya kung’anamura Enya” ukanovwira comene kuti nicitenge vinthu makora.—Mateyu 5:37.
Nangauli pakwamba amama ŵakanisuskanga apo nkhacezganga na Ŵakaboni ŵa Yehova, kweni pamanyuma ŵakazakaniphalira kuti nkhuŵanothiska. Ŵakayowoyaso kuti, “Nkhumanya kuti sono uli nthena cifukwa ca umo ukalelekera yayi kweni cifukwa ca ivyo wasambira vyakukhwaskana na Yehova.” Nkhakondwa comene kupulika mazgu agha.
Sono nkhuwona kuti umoyo wane ngwacandulo. Kwa vilimika vinkhondi na vinayi ivyo vyajumpha, ine na mfumu wane tikusambizga ŵanthu Baibolo nyengo zose. Nkhupharazga ku nyumba na nyumba ndipo nkhuwona kuti mulimo uwu ngwacandulo comene kuluska uliwose uwo nili kucitapo.
VYA MUNTHU UYU
ZINA: DENIS BUSIGIN
VILIMIKA: 30
UKO WAKABABIKIRA: RUSSIA
IVYO WAKACITANGA: WAKATEMWANGA KARATI
UMO NKHAŴIRA KALE: Nkhababikira mu msumba wa Perm’ ndipo nkhakulira mu Furmanov, msumba uwo uli na ŵanthu pafupifupi 40, 000 mu cigaŵa ca Ivanovo, ku Russia. Msumba wa Furmanov ngwakutowa comene ndipo uli na makuni agho mu nyengo yakuzizima ghakuzgoka ghayelo na ghaswesi. Mu vilimika vya m’ma 1980 na 1990, kuswa malango kukazara comene mu msumba uwu. Mbumba yithu yikaŵa na ndalama zinandi yayi. Ine, ŵapapi ŵane, na munung’una wane tikakhalanga mu nyumba ya cipinda cimoza, ndipo yikaŵa yifinyi.
Apo nkhaŵa na vilimika vinkhondi na viŵiri nkhamba kusambira karati. Nkhatemwanga comene maseŵera agha; ndipo mu umoyo wane wose nkhaghanaghananga waka za karati. Nyengo yiliyose para nilije cakucita nkhalutanga uko ŵakusambilira karati, ndipo ŵanyane ŵakaŵa awo ŵakutemwa karati. Apo nkhaŵa na vilimika 15 nkhapokera lamba muswesi pa karati ndipo mu cilimika cakulondezgapo nkhapokera wa burawuni. Nkhaŵa mu timu ya karati iyo yikaluskanga mu Russia ndiposo Eurasia. Nkhawonanga kuti niŵenge na umoyo uwemi, kweni apo nkhaŵa na vilimika 17, vinthu vikasintha.
Ine na ŵanyane tikaswa malango ndipo tikakakika. Nkhapokera cilango cakuti nikhale mu jele vilimika viŵiri. Umoyo ukaŵa wakusuzga comene mu jele. Kweni apo nkhaŵa mu jele ndipo kakaŵa kakwamba kuti niwone Baibolo. Nkhaŵazga Genesis, Masalmo, na Testamente Lasono. Nkhasungaso pa mtima Lurombo lwa Fumu, nkhaliyowoyanga usiku uliwose pambere nindagone, ndipo nkhaghanaghananga kuti kucita nthena kunovwirenge.
Nkhafumiskika mu jele mu cilimika ca 2000, kweni nkhamanyanga yayi ico ningacita. Nkhamba kumwa minkhwala yakuzweteska wongo. Pa nyengo iyi amama ŵakafwa. Nkhaŵatemwanga comene, ndipo nkhatondeka kukhomezga. Ndipouli, nkhaleka kumwa minkhwala, ndipo nkhambaso kusambira karati. Nkhasamira mu msumba wa Ivanovo. Nkhasanga nchito mu sitoro yakuguliska vyakurya. Mulara wa sitoro iyi wakaŵa yumoza wa Ŵakaboni ŵa Yehova. Wakanilongosolera fundo zinyake zakuzirwa za mu Baibolo ndipo wakapempha Kaboni munyake kuti wasambirenge nane Baibolo nyengo zose.
UMO BAIBOLO LASINTHIRA UMOYO WANE: Apo nkhasambiranga Baibolo, nkhakondwa comene kumanya khumbo la Ciuta lakuti caru cose cizamuŵa paradiso, ndipo nane nkhakhumba kuti nizakaŵemo. Mwaluŵiro, nkhamanya kuti Yehova Ciuta wakukhumba kuti ŵanthu ŵalondezgenge fundo zake. Nyengo zose nkhatemwanga kujighanaghanira ndekha. Kweni nkhasambira kuti Yehova wakukhumba kuti nighanaghanirengeso ŵanyane, niŵe walusungu, ndiposo nitemwenge mtende, mikhaliro iyo nkhaŵavya.
Apo nkhamba kughanaghanirapo comene ivyo Yehova wanicitira, nga nkhupeleka Mwana wake kuŵa sembe kuti zakwananga zane zigowokereke, nkhawonga Yehova cifukwa ca citemwa cake ndipo nkhakhuŵilizgika kusintha umoyo wane. Mwaciyelezgero, lemba la Salmo 11:5 likanisambizga kuti Yehova wakutinkha nkhaza. Ntheura, nkhaleka kuwonelera mapulogiramu gha pa TV agho ghakulongora nkhaza panji kutinkhana. Mwakusuzgikira, nkhaleka maseŵera ghankhaza. Fundo iyo yili pa 1 Ŵakorinte 15:33 yikanovwira kuwona kuti awo nkhucezga nawo ŵanganinanga comene. Cifukwa ca mendezgano ghaheni, lekani nkhakamalira mu jele. Ntheura, nkhaleka kwendezgana na ŵanthu awo ŵakutemwa maseŵero ghankhaza.
UMO NASANGIRA CANDULO: Kucezga na Ŵakaboni ŵa Yehova ndiposo kusambira Baibolo kwanovwira kuti niŵe munthu wakugomezgeka. Mwaciyelezgero, pa Ŵahebere 13:5 nkhasambirapo kuti nkhwenera kukhorwa na ivyo nili navyo ndipo nileke kutemwa ndalama. Kulondezga ulongozgi uwu kwanovwira kuti nileke kuteta na kwiba.
Nkhutemwa comene kuŵa na ŵabwezi. Kumanyuma uku, nawonapo ubwezi ukumara cifukwa ca udokezi panji wofi. Ŵakaboni ŵa Yehova nawo mbakwananga, kweni ŵakucindika fundo izo Ciuta wali kupeleka ndipo ŵakuyezgayezga kulondezga ulongozgi wa Ciuta para ŵakucita vinthu na ŵanji. Pa ŵanthu aŵa, nasanga ŵabwezi ŵeneko.
Nkhumanya yayi umo umoyo wane watenge uŵirenge niŵenge kuti nindasambire Baibolo na kulondezga ivyo likuyowoya. Mutepanji mphanyi nkhaweleraso ku jele panji mphanyi nkhupweteka na kusuzga ŵanji. Kweni sono nili na mwanakazi muwemi comene ndiposo ŵana ŵaŵiri, ndipo tose tikusangwa comene kovwira ŵanji kusambira unenesko wakukhwaskana na Ciuta.
VYA MUNTHU UYU
ZINA: JOSÉ CARLOS PEREIRA DA SILVA
VILIMIKA: 31
UKO WAKABABIKIRA: BRAZIL
IVYO WAKACITANGA: MBEMBE
UMO NKHAŴIRA KALE: Nkhakulira ku malo ghaheni gha mu msumba wa São Paulo, ku Americana. Tikaŵavya maji ghakumwa ghawemi ndipo tikakhalanga pa malo ghaukazuzi comene. Msumba uwu ukamanyikwanga na kuswa malango ndiposo nkhaza.
Apo nkhakulanga nkhaŵa wankhaza ndiposo mukali. Kanandi nkhacitanga mbembe, nakuti ŵanthu mu cikaya ŵakanopanga. Ŵanthu ŵakaniwonanga kuti nkhaŵa munthu wakofya comene cifukwa ca umo nkhavwaliranga ndiposo umo nkhacitiranga vinthu. Nkhamwanga comene, ndipo kanandi nkhafikanga na pa kuzemphuka. Nga umo wakacitiranga mukuru wane, nane nkhamwangaso minkhwala. Nakuti mukuru wane munyake wakafwa cifukwa wakamwa munkhwala unandi pa nyengo yimoza.
UMO BAIBOLO LASINTHIRA UMOYO WANE: Apo nkhakumana na Ŵakaboni ŵa Yehova, ŵakanilongora mu Baibolo kuti Ciuta wazamuzgora caru cose kuŵa paradiso. (Luka 23:42, 43; Uvumbuzi 21:3, 4) Nkhasambiraso kuti ŵakufwa ŵakumanya kanthu yayi, nakuti Ciuta wakulanga ŵanthu ŵaheni ku moto yayi. (Mupharazgi 9:5, 6) Mtima wane ukakhira pasi nkhati namanya vinthu ivi. Ivyo nkhasambira vyakukhwaskana na Ciuta vikanipangiska kuti nisinthe nkharo yane. Kweni cikaŵa cipusu yayi kuleka kumwa minkhwala, phere, kucita mbembe, ndiposo kayowoyero kaheni ako nkhazgoŵera.
Ndipouli, nkhakhozgeka comene na mazgu gha Paulosi agho ghali pa 1 Ŵakorinte 6:9-11. Lemba ili likulongora kuti Ŵakhristu ŵanyake ŵakwambilira nawo pakwamba ŵakaŵa na mikhaliro yiheni ya nga njane. Kweni lemba ili likutiso: “Mwaŵanyake ndimo mukaŵira. Kweni mwageziskika mwatowa, kweni mwatuŵiskika, kweni mwapimika ŵarunji mu zina la Fumu yithu Yesu Khristu ndiposo na mzimu wa Ciuta withu.” Mazgu agha ghakanipa cigomezgo cakuti nane ningasintha umoyo wane kuti nikondweske Ciuta.
Apo nkhamba kuwungana na Ŵakaboni ŵa Yehova, nkhakhorwa kuti Mbakhristu ŵaunenesko. Ŵakamanyanga umo nkhaŵira wankhaza ndiposo mukali, kweni ŵakanipokelera makora comene.
UMO NASANGIRA CANDULO: Niŵenge kuti nindasambire Baibolo na kusintha umoyo wane mphanyi sono nili kufwa. M’malo mwake, naŵa na mwaŵi wa kovwirapo mukuru wane munyake kuti wasambire Baibolo na kuleka kumwa minkhwala yakuzweteska wongo. Naciskaso ŵabali ŵane ŵanyake kuti ŵambe kusambira Baibolo. Nkhuwonga comene kuti nkhuteŵetera Ciuta, uyo wakutipwelelera comene.
[Mazgu Ghakukhozgera pa peji 9]
“Nkhawona kuti nchiwemi kuti nilombenge pambere nindacite cinthu ciheni kuluska kulomba para nacita, ndipo vikanovwira comene”