Sendelerani kwa Ciuta
Yehova Wakuzirwiska Ŵakuzika
ŴANTHU ŵanandi awo ŵakukhumba kuluska ŵanyawo mu caru ici mbakujitemwa, mbasanji, ndiposo mbadokezi. Kasi mikhaliro iyi yingatovwira kusendelera kwa Yehova Ciuta? Yayi. Yehova wakuzirwiska ŵanthu ŵakuzika awo ŵakumusopa. Nkhani iyo yili pa Maŵazgo cipaturo 12 yikulongora kuti fundo iyi njaunenesko. Mukaŵa mu mapopa gha Sinayi, ndipo Ŵaisrayeli ŵakaŵa kuti ŵawombokwa waka ku Eguputo.
Miriyamu na Aroni, awo ŵakaŵa ŵalara kwa Mozesi, ‘ŵakayowoya mwakwimikana’ na mwana wakwawo. (Vesi 1) M’malo mwakuti ŵayowoye waka na Mozesi, ŵakwenera kuti ŵakayowoyanga mwakwimikana nayo ku ŵanji mu msasa. Miriyamu uyo wakwamba kuzunurika wakwenera kuti ndiyo wakadangiliranga. Cifukwa cakwamba ico wakanyunyutiranga cikaŵa cakuti Mozesi wakatora mwanakazi wa ku Etiyopiya. Kasi Miriyamu wakaŵa na sanji kuti ŵanthu ŵalekenge kumucindika na kwamba kucindika muwoli wa Mozesi uyo wakaŵaso Muisrayeli yayi?
Pakaŵaso vifukwa vinyake ivyo Miriyamu na Aroni ŵakanyunyutiranga. Iwo ŵakatenge: “Kasi Yehova wakayowoya na Mozesi pera? Kasi walije kuyowoyaso mwa ise?” (Vesi 2) Kasi ŵakanyunyutanga cifukwa ca kukhumba mazaza ghanandi na kumanyikwa?
Pa nkhani iyi, Mozesi wakazgora yekha yayi. Vikuwoneka kuti wakazizipizga waka ivyo ŵakamuyowoyeranga. Pakuti wakazika na kukhala waka cete, ipo Baibolo likuneneska para likuti wakaŵa “wakuzika comene kwakuluska wose awo ŵakaŵa pa caru.”a (Vesi 3) Mozesi wakeneranga kuzgora yekha yayi. Yehova wakapulikanga ndipo wakaŵa ku cigaŵa ca Mozesi.
Yehova wakawona kuti ŵakamunyunyutiranga iyo. Nakuti ndiyo wakasora Mozesi. Pakususka awo ŵakanyunyutanga, Ciuta wakaŵakumbuska kuti iyo wakaŵa paubwezi wapadera na Mozesi, wakati: ‘Nkhuyowoya nayo mulomo na mulomo.’ Yehova wakafumbaso Miriyamu na Aroni kuti: “Kasi nchifukwa wuli ico mukawura kopa kwimikana naye . . . Mozesi?” (Vesi 8) Kwimikana na Mozesi kukaŵa kwimikana na Ciuta. Muyuyuro uwu, ukapangiska kuti Miriyamu na Aroni ŵawone kutukutwa kwa Yehova.
Miriyamu, uyo wakwenera kuti ndiyo wakamba kunyunyuta wakatimbika na vyoni. Mwaluŵiro, Aroni wakaŵeyelera Mozesi kuti wamulombere Miriyamu. Ghanaghanirani waka, kuti Miriyamu waŵe makora vikathembanga pa munthu uyo ŵakamunyunyutiranga. Mozesi wakamulombera Miriyamu. Mazgu ghekha agho Mozesi wakayowoyapo pa nkhani iyi, ni agho wakayowoya pakuŵeyelera Yehova kuti wacizge mudumbu wake. Miriyamu wakacizgika, kweni wakayuyurika pakuti kwa mazuŵa ghankhondi na ghaŵiri wakakhala kwayekha.
Nkhani iyi yikutovwira kumanya mikhaliro iyo Yehova wakuzirwiska na iyo wakutinkha. Usange tikukhumba kusendelera kwa Ciuta, tikwenera kuyezgayezga kuti tileke kuŵa na mikhaliro nga nkhujikuzga, sanji, na udokezi. Yehova wakutemwa ŵakuzika. Wakulayizga kuti: “Ŵakuzika ndiwo tiŵaharenge caru, tiŵakondwenge na kusakata comene.”—Salmo 37:11; Yakobe 4:6.
[Mazgu ghamusi]
a Kuzika ni mukhaliro wakuzirwa comene uwo ukupangiska munthu kuti wazizipizgenge mwakuzikira vinthu vyambura urunji kwambura kuwezgera.