Kuzirwa kwa Ivyo Yehova Wakutisambizga
“Nadi, nkhupima vinthu vyose kuŵa vyambura nchito cifukwa ca candulo cikuru ca kumumanya Khristu Yesu.”—FIL. 3:8.
1, 2. Kasi Ŵakhristu ŵanyake ŵasankha kucita vici, ndipo cifukwa wuli?
ROBERT wakaŵa na mahara comene mu kilasi kufuma apo wakambira sukulu. Peneapo wakaŵa na vilimika vinkhondi na vitatu, yumoza wa ŵasambizgi ŵake wakaluta ku nyumba kwa Robert ndipo wakamuphalira kuti wangasambira cilicose. Wakamuphalira kuti zuŵa linyake wangazakaŵa dokotala. Cifukwa cakuti wakaŵa na mahara, wakaŵa wakwenelera kusambira ku yunivesite yiliyose yapacanya mu caru cake. Uwu ukaŵa mwaŵi wapadera comene, uwo ŵanandi ŵakaudokeranga, cifukwa ukusangika bweka yayi, kweni Robert wakasankha kucita upayiniya wanyengozose.
2 Nga ni Robert, Ŵakhristu ŵanandi ŵalara na ŵana wuwo ŵali na mwaŵi wa kusambira comene. Kweni ŵanji ŵakusankha kuteŵetera Yehova m’malo mwa kusambira comene. (1 Kor. 7:29-31) Nchivici cikuŵaciska Ŵakhristu kuti ŵalimbikirenge comene mu mulimo wa kupharazga nga ni Robert? Padera pa kutemwa Yehova, ico nchifukwa cakwamba, ŵakumanya kuzirwa kwa kusambizgika na iyo. Kasi muli kughanaghanirapo umo umoyo winu watenge uŵirenge muŵenge kuti mundasambire unenesko? Kughanaghanira za vitumbiko ivyo tasanga cifukwa ca kusambizgika na Yehova kutovwirenge kuti tizirwiskenge makani ghawemi na kuŵa ŵamwamphu kupharazgira ŵanji.
Ni Mwaŵi Ukuru Kusambizgika na Ciuta
3. Kasi tikumanya wuli kuti Yehova ngwakunweka comene kusambizga ŵanthu?
3 Pakuti ni muwemi, Yehova ngwakunweka comene kusambizga ŵanthu. Pakuyowoya za Ŵakhristu ŵakuphakazgika, lemba la Yesaya 54:13 likuti: “Wose ŵana ŵako tiŵasambizgike na Yehova, kusakata kwa ŵanaŵanalume tikuŵenge kukuru.” Mazgu agha ghakukhwaskaso “mberere zinyake” za Khristu. (Yoh. 10:16) Ucimi wakupulikikwa makora uwu, ukufiskika mu nyengo yithu yino. Mu mboniwoni Yesaya wakawona ŵanthu kufuma mu mitundu yose ŵakuya ku cisopa caunenesko. Wakalongosora kuti ŵanthu aŵa ŵakayowoyeskananga yumoza na munyake, ŵakati: “Tiyeni tikwelere ku lupiri lwa Yehova, ku nyumba ya Ciuta wa Jacob; kuti watisambizge nthowa zake ndipo tamkwenda mu mendero ghake.” (Yes. 2:1-3) Ni mwaŵi ukuru kusambizgika na Ciuta.
4. Kasi tikwenera kucitaci kuti tisambizgike na Yehova
4 Kasi tikwenera kucitaci kuti tisambizgike na Yehova? Cakwamba, munthu wakwenera kuŵa wakuzika ndiposo wakukhumbisiska kusambizgika. Davide wakalemba kuti: “Yehova ni muwemi na wakunyoloka; . . . Wakulongozga ŵakuzika mu ivyo ni vyakunyoloka, na kuŵasambizga nthowa yake.” (Sal. 25:8, 9) Ndipo Yesu wakati: “Nkhumulumbani pakweru Ŵadada, Fumu ya kucanya na caru capasi, cifukwa mwabisa vinthu ivi ku ŵavinjeru na ŵamahara ndipo mwavivumbura ku ŵanici.” (Luka 10:21) Kasi kumanya kuti Yehova “wakupeleka lusungu lukuru ku ŵakujiyuyura” kukumupangiskani yayi kuti musendelere kwa iyo?—1 Pet. 5:5.
5. Nchivici cikawovwira kuti ise timanye unenesko wakukhwaskana na Ciuta?
5 Pakuti ndise ŵateŵeti ŵa Yehova, kasi tikwenera kujilumba kuti tili na mahara cifukwa cakuti tamanya unenesko? Cara. Fundo njakuti, pa ise tekha mphanyi tikamanya yayi unenesko wakukhwaskana na Ciuta. Yesu wakati: “Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.” (Yoh. 6:44) Kwizira mu mulimo wa kupharazga ndiposo mzimu utuŵa, Yehova wakuguzira kwa iyomwene ŵanthu awo ŵali nga ni mberere, “vyuma vyose vya mitundu yose.” (Hag. 2:7) Kasi mukuwonga yayi pakuŵa yumoza wa ŵanthu awo Yehova waŵaguzira kwa mwana wake?—Ŵazgani Yeremiya 9:23, 24.
Nkhongono Iyo Yikusintha Umoyo
6. Kasi ŵanthu ŵakukhwaskika wuli cifukwa ca kumanya unenesko wakukhwaskana na Yehova?
6 Ucimi wa Yesaya ukupeleka cithuzithuzi ciwemi kulongora umo ŵanthu ŵakusinthira mazuŵa ghano kuleka nkharo zawo ziheni. Ŵanthu awo kale ŵakaŵa ŵankhaza, sono mbamtende. (Ŵazgani Yesaya 11:6-9.) Awo ŵakatinkhananga cifukwa ca kupambana mtundu, caru, fuko panji mitheto ŵasambira kukhalira pamoza mwakukolerana. Mwauzimu ŵazgora ‘malupanga ghawo [kuŵa] vyakulimira.’ (Yes. 2:4) Cifukwa wuli waleka nkharo yiheni? Ŵasambira unenesko wakukhwaskana na Yehova ndipo ŵakulondezga unenesko uwu mu umoyo wawo. Nangauli ŵateŵeti ŵa Yehova mbarunji yayi, iwo mbakukolerana pa caru cose. Vipambi viwemi ivyo vyaŵapo cifukwa ca kupharazgika kwa makani ghawemi pa caru cose capasi mbukaboni wakuti masambiro gha Ciuta ngakuzirwa.—Mat. 11:19.
7, 8. (a) Kasi ni ‘vinthu wuli vyakukhomelera’ ivyo tikugadabura cifukwa ca kusambizgika na Yehova? (b) Nchivici cikulongora kuti Yehova wakulumbika cifukwa ca ivyo wakutisambizga?
7 Mpositole Paulosi wakati uteŵeti uwo ŵanthu ŵa Ciuta ŵakucita ni nkhondo yauzimu. Wakalemba kuti: “Vilwero vya nkhondo yithu kuti ni vyathupi cara, kweni vyankhongono mwa Ciuta kugadabulira vinthu vyakukhomelera. Pakuti tikugadabura maghanoghano na cinthu cilicose cakukwezgeka ico catumphuskika kwimikana na kumanya Ciuta.” (2 Kor. 10:4, 5) Kasi ivyo ŵanthu ŵakusambizgika na Yehova vikuŵafwatura ku ‘vinthu wuli vyakukhomelera’? Vikuŵafwatura ku visambizgo vyautesi, kugomezga mizimu, kugomezga vinjeru vya ŵanthu na vinyake vyantheura. (Kol. 2:8) Ivyo Yehova wakusambizga ŵanthu vikovwira kuti ŵaleke nkharo ziheni na kuŵa na mikhaliro iyo Ciuta wakukondwa nayo. (1 Kor. 6:9-11) Vikovwira kuti mbumba zikhalenge makora. Vikupeleka cigomezgo ku awo ŵalije ndipo ŵakumanya cilato ceneko ca umoyo. Masambiro agha ndigho ghakukhumbikwa nadi mazuŵa ghano.
8 Yehova wakusambizga ŵanthu kuti ŵaŵenge ŵakugomezgeka, nga umo tiwonerenge mu ciyelezgero cakulondezgapo. (Heb. 13:18) Mwanakazi munyake ku India wakasambizgikanga Baibolo ndipo nyengo yikati yajumpha, wakaŵa mupharazgi wambura kubapatizika. Zuŵa linyake apo wakafumanga ku mulimo wa kuzenga Nyumba ya Ufumu, wakasora majuda ghagolide pafupi na malo ghakukwelera basi. Majuda agha ghakaŵa ghakudura comene, gha ndalama zakukwana madola 800 za ku United States. Nangauli mwanakazi uyu wakaŵa mukavu, wakatora majuda ghara na kukapeleka ku polisi. Wapolisi wakazizikika comene. Wapolisi munyake wakamufumba kuti: “Mwangulekeraci kutora waka majuda agha?” Iyo wakalongosora kuti: “Umoyo wane uli kusintha cifukwa ca ivyo nkhusambira mu Baibolo, sono ndine wakugomezgeka.” Cifukwa ca kutoreka mtima, wapolisi wakaphalira mulara uyo wakaluta na mwanakazi uyu ku polisi kura kuti: “Mu cigaŵa cithu ici, muli ŵanthu ŵakujumpha 38 miliyoni. Usange mungawovwira ŵanthu ŵakukwana 10 kuti ŵaŵe nga mwanakazi uyu, cingaŵa cakuzirwa comene.” Apo nase tikughanaghanira za ŵanthu mamiliyoni ghanandi awo umoyo wawo wasintha cifukwa ca kusambizgika na Ciuta, kasi tili na vifukwa vyakukwana yayi vyakulumbira Yehova?
9. Nchivici cikovwira ŵanthu kuti ŵasinthe nkharo ziheni?
9 Mazgu gha Ciuta pamoza na wovwiri uwo Yehova wakupeleka kwizira mwa mzimu wake vikovwira ŵanthu kuti ŵasinthe nkharo ziheni. (Rom. 12:2; Gal. 5:22, 23) Lemba la Ŵakolose 3:10 likuti: “Mujivwalike wunthu uphya, weneuwo kwizira mu kumanya makora, ukuzgoka uphya mwakuyana na cikozgo ca Uyo wakawulenga.” Uthenga uwo ukusangika mu Mazgu gha Ciuta, Baibolo, uli na nkhongono za kuvumbura nkharo ya munthu, ndipo ungasintha umo wakughanaghanira ndiposo umo wakuwonera vinthu. (Ŵazgani Ŵahebere 4:12.) Munthu wangaŵa mubwezi wa Yehova na kuŵa na cigomezgo ca kuzakaŵa wamoyo kwamuyirayira para wamanya makora Malemba na kulondezga fundo zaurunji za Yehova.
Kunozgekera Vyamunthazi
10. (a) Cifukwa wuli ni Yehova yekha uyo wangatovwira kunozgekera ivyo vicitikenge munthazi? (b) Kasi ni vici ivyo vicitikenge sonosono, vyeneivyo vikhwaskenge caru cose capasi?
10 Ni Yehova yekha uyo wangatovwira kunozgekera cifukwa ndiyo wakumanya vyamunthazi. Wakumanya ivyo vicitikirenge ŵanthu kunthazi. (Yes. 46:9, 10) Ucimi wa mu Baibolo ukulongora kuti “zuŵa likuru la Yehova lili pafupi.” (Zef. 1:14) Pakuyowoya za zuŵa la Yehova, mazgu agho ghakusangika pa Zintharika 11:4 ghazamufiskika, gheneagho ghakuti: “Usambazi kuti ukupindula cara mu zuŵa la ukali, kweni urunji ukuthaska ku nyifwa.” Kuŵa paubwezi na Yehova nkhwakuzirwa comene kuti tizakapone apo wazamweruzga caru ca Satana. Ndalama zizamuŵa zambura nchito. Nakuti lemba la Ezekiel 7:19 likuti: ‘Ŵazamutaya siliva yawo mu ŵagurwe, ndipo golide lawo lizamuŵa ngati cinthu cakufipirwa.’ Kumanyirathu ivyo vizamucitika kungatovwira kuti ticitenge vinthu mwamahara sono.
11. Kasi ivyo Yehova wakutisambizga vikutovwira wuli kunozgekera vyamunthazi?
11 Kuti tizakapone pa zuŵa la Yehova ilo likwiza, tikusambizgika na iyo umo tingacitira vinthu vyakuzirwa. Mpositole Paulosi wakalembera Timote kuti: “Uŵalangure awo mbasambazi mu mgonezi uno kuti ŵangaŵanga ŵakujikwezga cara, ndiposo ŵangaŵikanga cigomezgo cawo mu usambazi wambura kuchintha cara, kweni mwa Ciuta.” Nangauli tingaŵa kuti ndise ŵasambazi yayi, ulongozgi wakufuma kwa Yehova uwu ungatovwira. Ungatovwira wuli? M’malo mwa kujilundikira usambazi wakuthupi tikwenera kuyezgayezga ‘kucita ico nchiwemi’ na kuŵa “ŵasambazi mu milimo yiwemi.” Para tikuzirwiska comene vinthu vyauzimu ndikuti ‘tikujisungira taŵene lufura luwemi lwa munthazi.’ (1 Tim. 6:17-19) Tikulongora kuti ndise ŵamahara para tikuŵika vinthu vyauzimu pakwamba. Lekani Yesu wakafumba kuti: “Kuŵenge candulo wuli kwa munthu usange wakwandula caru cose, kweni wakutaya umoyo wake?” (Mat. 16:26, 27) Pakuti zuŵa la Yehova laneng’enera, waliyose wakwenera kujifumba kuti: ‘Kasi nkhulundika nkhu usambazi? Kasi nkhuteŵetera nga muzga wa Ciuta panji wa Usambazi?’—Mat. 6:19, 20, 24.
12. Cifukwa wuli tikwenera yayi kugongowa para ŵanji ŵakuyuyura uteŵeti withu?
12 Pa “milimo yiwemi” iyo yili kulembeka mu Baibolo, mulimo wa kupharazga na kuzgora ŵanthu kuŵa ŵasambiri ndiwo ngwakuzirwa comene. (Mat. 24:14; 28:19, 20) Nga ni umo vikaŵira mu nyengo ya ŵapositole, ŵanji ŵangayuyura uteŵeti withu. (Ŵazgani 1 Ŵakorinte 1:18-21.) Nangauli ŵakuyuyura uteŵeti withu, uthenga withu ucali wakuzirwa, ndipo tikulutilira kupeleka mwaŵi ku ŵanthu kuti ŵaŵe na cipulikano mu uthenga uwu peneapo nyengo yicalipo. (Rom. 10:13, 14) Titumbikikenge comene peneapo tikovwira ŵanji kwandula na vinthu ivyo Yehova wakutisambizga.
Kutumbikika Cifukwa ca Kujipeleka
13. Kasi mpositole Paulosi wakaleka vici mwakuti wapharazgenge makani ghawemi?
13 Pambere wandazgoke Mkhristu, mpositole Paulosi wakasambizgikanga masambiro ghapacanya mwakuti wazakaŵe munthu wakuzirwa pakati pa Ŵayuda. Apo wakaŵa na vilimika vyambura kujumpha 13, wakafumamo mu msumba wa kwake wa Taraso na kuluta ku Yerusalemu kukasambizgika na Gamaliyeli, uyo wakaŵa msambizgi wakumanyikwa comene wa Dango. (Mil. 22:3) Wakacitanga makora kuluska ŵa nthanga yake, ndipo walutilirenge kusambira, mphanyi wakaŵa wakumanyikwa comene. (Gal. 1:13, 14) Wakati wazomera makani ghawemi na kwamba kupharazga, wakaleka masambiro ghapacanya agho wakasambiranga. Kasi wakadandaurapo? Yayi. Nakuti wakalemba kuti: “Nadi, nkhupima vinthu vyose kuŵa vyambura nchito cifukwa ca candulo cikuru ca kumumanya Khristu Yesu Fumu yane. Cifukwa ca iyo, vyose nkhuviwona kuŵa vyambura nchito ndipo nkhuvipima kuti ni viswaswa.”—Fil. 3:8.
14, 15. Kasi tikutumbikika wuli pakuŵa “ŵalimi ŵamoza na Ciuta”?
14 Nga ni Paulosi, lero napo Ŵakhristu ŵakuleka kucita vinthu vinyake mwakuti ŵapharazgenge makani ghawemi. (Mrk. 10:29, 30) Kasi pali vinthu vinyake ivyo tikusoŵerwa cifukwa ca kucita nthena? Ŵanandi ŵangakolerana na ivyo Robert uyo wazunulika ku uyambiro wa nkhani iyi wakayowoya, wakati: “Nkhudandaura yayi. Nkhusangwa comene ndipo nili wakukhorwa na uteŵeti wanyengozose. Uli kunipa mwaŵi wa ‘kuceta na kuwona kuti Yehova ni muwemi.’ Nyengo zose Yehova wakanitumbikanga para napatura nyengo mwakuti nicite vinthu vyauzimu. Palije ico nkhuluza, nkhwandula pera.”—Sal. 34:8; Zinth. 10:22.
15 Usange mwaŵa mukucita mulimo wa kupharazga na kusambizga kwa nyengo yitali, kwambura kukayika namwe muli kuceta na kuwona kuti Yehova ni muwemi. Kasi yikaŵapo nyengo yinyake apo mukamanya kuti mzimu wa Yehova wamovwirani peneapo mukapharazganga makani ghawemi? Kasi muli kuwonapo ŵanji ŵakumwemwetera cifukwa cakuti Yehova wajura mtima wawo kuti ŵategherezge uthenga withu? (Mil. 16:14) Kasi Yehova wali kumovwiranipo kutonda vyakujandizga, mutepanji kumujulirani nthowa yakuti musazgireko uteŵeti winu? Kasi wali kumukhozganipo mu nyengo zamasuzgo, kumovwirani kuti mulutilire kuteŵetera peneapo mukajipulikanga kuŵa ŵakulopwa? (Fil. 4:13) Usange tikuwona umo Yehova wakutovwilira para tikupharazga makani ghawemi, iyo wakuŵa wanadi kwa ise, ndipo ubwezi withu na iyo ukuŵa wakukhora. (Yes. 41:10) Mu mulimo wa kusambizga ŵanthu unenesko, kasi ni thumbiko yayi kuŵa “ŵalimi ŵamoza na Ciuta”?—1 Kor. 3:9.
16. Kasi mukujipulika wuli cifukwa ca kuyezgayezga ndiposo kujipeleka mu mulimo wa kusambizga ŵanthu vya Yehova?
16 Ŵanthu ŵanandi ŵakukhumba kuti ŵacite cinthu ico ŵazamuluwa yayi mu umoyo wawo. Kweni tawona kuti vinthu vyakuzirwa ivyo ŵacita, para mazuŵa ghajumphapo vikuluwika. Ndipouli, milimo iyo Yehova wakufiska mazuŵa ghano yakukhwaskana na kutuŵiska zina lake yikhalilirenge muyirayira mu mdauko wa ŵanthu ŵa Yehova. Milimo iyi yiluwikenge yayi. (Zinth. 10:7; Heb. 6:10) Mphanyi tasungilira mwaŵi ŵa kusambizga ŵanji za Yehova, mulimo uwo uzamuluwika yayi.
Kasi Mungazgora Wuli?
• Kasi tikwenera kucitaci kuti tisambizgike na Yehova?
• Kasi ivyo Yehova wakusambizga vikusintha wuli umoyo wa ŵanthu?
• Kasi tikutumbikika wuli cifukwa ca kovwira ŵanji kwandula na ivyo Yehova wakusambizga?
[Cithuzithuzi pa peji 23]
Awo ŵasambizgika na Yehova mbakukolerana pa caru cose capasi
[Cithuzithuzi pa peji 24]
Kasi ni thumbiko yayi kuŵa “ŵalimi ŵamoza na Ciuta”?