Kasi Malurombo Ghinu Ghakuvumburaci za Imwe?
“Mwa ŵakupulika malurombo ’mwe ŵamoyo wose tiŵizenge kwa Imwe.”—SAL. 65:2.
1, 2. Cifukwa wuli ŵateŵeti ŵa Yehova ŵakumulomba na cigomezgo cose?
YEHOVA wakuzerezga yayi madando gha ŵateŵeti ŵake ŵakugomezgeka. Tili na cigomezgo cose kuti wakutipulika. Nanga kungaŵa kuti Ŵakaboni ŵa Yehova mamiliyoni ghanandi ŵakulomba panyengo yimoza, wakupulika lurombo lwa waliyose.
2 Pakuti Davide wakaŵa na cigomezgo kuti Ciuta wapulika madando ghake, wakimba kuti: “Mwa ŵakupulika malurombo ’mwe ŵamoyo wose tiŵizenge kwa Imwe.” (Sal. 65:2) Yehova wakazgora malurombo gha Davide cifukwa wakamusopanga mwakugomezgeka. Tingajifumba kuti: ‘Kasi maŵeyelero ghane kwa Yehova ghakulongora kuti nkhumugomezga ndiposo kuzirwiska kusopa kwaunenesko? Kasi malurombo ghane ghakuvumburaci za ine?’
Lombani kwa Yehova na Mtima Wakujiyuyura
3, 4. (a) Kasi para tikulomba kwa Ciuta tikwenera kuŵa na mtima wuli? (b) Kasi tikwenera kucitaci para tikusuzgika “maghanoghano” cifukwa ca kwananga kukuru?
3 Kuti Ciuta wazgore malurombo ghithu, tikwenera kulomba mwakujiyuyura. (Sal. 138:6) Tikwenera kupempha Yehova kuti watisande nga umo Davide wakacitira, apo wakati: “Ndisandani, A Ciuta, na kumanya mtima wane! ndiyezgani na kumanya maghanoghano ghane! Muwone panji kangaŵamo kendero kaheni mwa ine, ndipo mundilongozge mu nthowa yamuyirayira.” (Sal. 139:23, 24) Tikwenera kulomba Ciuta kuti watisande ndiposo kuzomera ulongozgi wake. Yehova wangatilongozga mu “nthowa yamuyirayira,” kutovwira kuti tendenge mu nthowa yakulongozgera ku umoyo wamuyirayira.
4 Wuli usange tikusuzgika “maghanoghano” cifukwa ca kwananga kukuru? (Ŵazgani Salmo 32:1-5.) Usange tikuzerezga njuŵi yithu para yikutisuska cifukwa ca kwananga uko tili kucita, mbwenu tilopwenge nga umo khuni likupulutira mu cihanya cifukwa ca cithukivu. Davide wakaŵavya cimwemwe ndipo wakwenera kuti wakalwara cifukwa ca kwananga uko wakacita. Kweni wati wazomera kwananga kwake panthazi pa Ciuta wakaŵaso wacimwemwe. Aghanaghanirani waka umo wakakondwera wati wamanya kuti Yehova ‘wamugowokera kwananga kwake.’ Munthu wangaŵaso wacimwemwe para wazomera kwananga kwake kwa Ciuta. Kweniso ŵalara ŵa mpingo ŵangamovwira umo wangacitira kuti waŵeso wakukhora mwauzimu.—Zinth. 28:13; Yak. 5:13-16.
Ŵeyelerani Ciuta na Kumuwonga
5. Kasi tikwenera kucitaci para tikusuzgika na vyenjezgo?
5 Tikwenera kulondezga ulongozgi wa Paulosi para tili na vyenjezgo. Iyo wakati: “Mungenjerwanga cara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Ciuta.” (Fil. 4:6) Comenecomene para tili mu suzgo yikuru panji tikutambuzgika, tikwenera kuŵeyelera Yehova kuti watovwire na kutilongozga.
6, 7. Cifukwa wuli tikwenera kuwonga Ciuta mu malurombo ghithu?
6 Usange tikulomba pekha para tikukhumba kanthu, kasi tikulongora kuti ubwezi withu na Yehova uli wuli? Paulosi wakati tikwenera kumanyiska Ciuta madando ghithu “pamoza na kuwonga.” Nase tikwenera kuwonga Ciuta nga umo Davide wakacitira, uyo wakati: “Winu, Yehova, ndi ukuru, na nkhongono, na ucindami, na kuvivya, na ufumunkhuru; pakuti vyose vyamu kucanya na vyamu caru mvinu; winu mbufumu, A Yehova, ndipo mwakwezgeka nga ndi mutu pacanya pa vyose. . . . Ciuta withu, tikumuwongani na kucindika zina linu laucindami.”—1 Mid. 29:11-13.
7 Yesu wakawonga Ciuta cifukwa ca cakurya ndiposo cingwa na vinyo ilo ŵakamwa pa Mugonero wa Fumu. (Mat. 15:36; Mrk. 14:22, 23) Tikweneraso “kumuwonga Yehova” cifukwa ca “milimo yake yakuzizwiska ku ŵana ŵa ŵanthu,” cifukwa ca ‘maweruzgo ghake ghakunyoloka’ ndiposo mazgu ghake agho ghakusangika mu Baibolo.—Sal. 107:15; 119:62, 105.
Lomberani Ŵanji
8, 9. Cifukwa wuli tikwenera kulombera Ŵakhristu ŵanyithu?
8 Padera pa kujilombera taŵene, tikweneraso kulombera ŵanji, nanga ŵangaŵa Ŵakhristu awo mazina ghawo tikughamanya yayi. Nangauli mpositole Paulosi ŵakamanyanga Ŵakhristu wose yayi ŵa ku Kolose, kweni wakaŵalembera kuti: “Nyengo zose para tikumulomberani, tikuwonga Ciuta, Ŵawiske ŵa Fumu yithu Yesu Khristu, pakuti tikapulika za cipulikano cinu mwa Khristu Yesu na citemwa ico muli naco ku ŵatuŵa wose.” (Kol. 1:3, 4) Wakalomberaso Ŵakhristu ŵa ku Tesalonika. (2 Tes. 1:11, 12) Malurombo ghanthena ghakuvumbura vinandi vyakukhwaskana na ise. Ghakuvumburaso umo tikuwonera Ŵakhristu ŵanyithu.
9 Para tikulombera Ŵakhristu ŵakuphakazgika na ŵanyawo ŵa “mberere zinyake,” tikulongora kuti tikulitemwa gulu la Ciuta. (Yoh. 10:16) Paulosi wakapempha Ŵakhristu ŵanyake kuti ŵamulomberenge mwakuti waŵe “na wanangwa wa kuyowoya, kumanyiska camucindindi cakupatulika ca makani ghawemi.” (Efe. 6:17-20) Kasi nase tikulombera Ŵakhristu ŵanyithu?
10. Kasi kulombera ŵanji kungatovwira wuli?
10 Kulombera ŵanyithu kungatovwira kuti tiŵatemwenge. Usange yunji tikumutemwa viŵi yayi, kweni tikumulombera, kasi pali cifukwa cakulekera kumutemwa? (1 Yoh. 4:20, 21) Nchakuzirwa comene kulombera ŵanji cifukwa kukovwira kuti tiŵe ŵakukolerana na ŵabali ŵithu. Nakuti para tikulombera ŵanji, tikulongora kuti tili na citemwa cakuyana na ca Khristu. (Yoh. 13:34, 35) Ndipo citemwa nchigaŵa ca cipambi ca mzimu wa Ciuta. Kasi tikupempha Yehova kuti watipe mzimu wake utuŵa ndiposo kuti watovwire kulongora vigaŵa vya cipambi ca mzimu, vyeneivyo ni citemwa, cimwemwe, mtende, kukhomezga, lusungu, uwemi, cipulikano, kuzika na kujikora? (Luka 11:13; Gal. 5:22, 23) Usange tikumupempha, ivyo tikuyowoya na kucita vilongorenge kuti tikwenda na kukhala mwa mzimu.—Ŵazgani Ŵagalatiya 5:16, 25.
11. Cifukwa wuli tingayowoya kuti nchakwenelera kuphalira ŵanji kuti ŵatilomberenge?
11 Usange tamanya kuti ŵana ŵithu ŵakukhumba kuti ŵabekerenge mayeso ku sukulu, tikwenera kuŵalombera ndiposo kuŵawovwira mwauzimu mwakuti ŵacitenge vinthu mwakugomezgeka na kuŵambara viheni. Paulosi wakaphalira Ŵakhristu ŵa ku Korinte kuti: “Tikulomba Ciuta kuti mungabudanga kanthu cara.” (2 Kor. 13:7) Yehova wakukondwa na malurombo agha cifukwa ghakuvumbura viwemi ivyo vili mu mtima withu. (Ŵazgani Zintharika 15:8.) Tingalomba ŵanji kuti ŵatilomberenge nga umo wakacitira mpositole Paulosi. Iyo wakalemba kuti: “Lutilirani kutilombera, pakugomezga kuti tili na njuŵi yakugomezgeka, uku tikukhumba kucita mwakugomezgeka mu vinthu vyose.”—Heb. 13:18.
Malurombo Ghithu Ghakuvumbura Vinandi
12. Kasi tikwenera kulomba vinthu wuli nyengo zose?
12 Kasi malurombo ghithu ghakuvumbura kuti ndise Kaboni wa Yehova wakukondwa ndiposo wamwamphu? Kasi maŵeyelero ghithu ghakulongora kuti ghali pa kucita khumbo la Ciuta, kupharazga uthenga wa Ufumu, kukhozgera Ufumu wa Yehova na kutuŵiskika kwa zina lake? Ivi ndivyo tikwenera kulomba nyengo zose nga umo tikuwonera mu lurombo lwakuwonerapo ulo Yesu wakalomba, lweneulo lukwamba na mazgu ghakuti: “Ŵadada ŵithu imwe muli kucanya, zina linu lituŵiskike. Ufumu winu wize. Khumbo linu licitike, umo kuliri kucanya, ntheura pera pa caru capasi.”—Mat. 6:9, 10.
13, 14. Kasi malurombo ghithu ghakuvumburaci za ise?
13 Ivyo tikulomba kwa Ciuta vikuvumbura vilato vithu, ivyo tikutemwa na ivyo tikukhumba. Yehova wakumanya wunthu withu. Lemba la Zintharika 17:3 likuti: “Ciŵiya cakusongonolera ncha siliva, na ng’anjo nja golide, ndipo Yehova ndiye wakuyezga mitima.” Ciuta wakuwona ivyo vili mu mitima yithu. (1 Sam. 16:7) Wakumanya umo tikuwonera maungano, uteŵeti withu ndiposo ŵabali na ŵadumbu ŵithu. Wakumanya umo tikuwonera “ŵabali” ŵa Khristu. (Mat. 25:40) Wakumanyaso usange ivyo tikulomba tikuvikhumba nadi panji tikuwerezgawerezga waka mazgu. Yesu wakati: “Para ukulomba, ungayowoyanga vinthu vimoza pera mwakuwerezgawerezga cara, nga ni umo ŵanthu ŵa mitundu ŵakucitira, pakuti [ŵakupuvya] ŵakughanaghana kuti ŵapulikikwenge cifukwa ca kuyowoya mazgu ghanandi.”—Mat. 6:7.
14 Ivyo tikuyowoya mu lurombo navyo vikuvumbura usange tikugomezga Ciuta. Davide wakati: “Imwe [Yehova] ndimwe ciphokwero cane, na cigongwe cakukhora ku mulwani. Zomerani kuti ndikhale mu hema linu muyirayira! Ndiŵe na ciphokwero kusi ku mapapindo ghinu!” (Sal. 61:3, 4) Para Ciuta ‘watandaulira hema lake pa ise,’ tikuŵa ŵakuvikilirika. (Uvu. 7:15) Nchakukondweska kusendelera kwa Yehova kwizira mu lurombo na cigomezgo cakuti ‘wakwimira ise’ para cipulikano cithu cikuyezgeka.—Ŵazgani Salmo 118:5-9.
15, 16. Kasi lurombo lungatovwira kumanya vici za cilato cithu ca kuŵa ŵalara panji ŵateŵeti ŵakovwira mu mpingo?
15 Lurombo lwakufumira pasi pa mtima lwakukhwaskana na vilato vithu lungatovwira kumanya kuzirwa kwa ivyo tikulomba. Mwaciyelezgero, kasi tili na cilato ca kuŵa mulara ŵa mpingo mwakuti tovwirenge ŵanthu ŵa Ciuta pa vinthu vya Ufumu? Panji nchifukwa cakuti tikukhumba kuŵa “pakwamba,” nanga ‘nkhucita ufumu pa’ ŵanji? Ndimo vikwenera kuŵira cara pakati pa ŵanthu ŵa Yehova. (Ŵazgani 3 Yohane 9, 10; Luka 22:24-27.) Lurombo lwakufumira pasi pa mtima lungavumbura vilato viheni ndiposo lungatovwira kusintha pambere vindajinthe misisi mu mtima withu.
16 Ŵawoli awo Mbakhristu ŵangaŵa na khumbo lakuti ŵafumu ŵawo ŵaŵe ŵateŵeti ŵakovwira panji ŵalara mu mpingo. Ŵadumbu aŵa, ŵangaŵa kuti ŵakuphalira Ciuta kwaŵekha ivyo ŵakukhumba na kuyezgayezga kuŵa na mikhaliro yiwemi. Ici nchakuzirwa comene, cifukwa ivyo ŵanthu ŵakughanaghanira mbali vikuthemba pa ivyo ŵa mu mbumba ŵakuyowoya na kucita.
Kulomba pa Wumba
17. Cifukwa wuli nchakukhumbikwa kuti tiŵenge patekha para tikulomba vya taŵene?
17 Kanandi Yesu wakafumangapo pa wumba kuya kwayekha kukalomba kwa Ŵadada ŵake. (Mat. 14:13; Luka 5:16; 6:12) Nase tikukhumbikwira nyengo yakuti tilombenge patekha. Usange tili ku malo ghambura ciwawa tingalomba vinthu vyakwenelera, vyakukondweska Yehova na ivyo vingatovwira pakumusopa. Ndipouli, Yesu wakalombangaso pa wumba, ndipo nchiwemi kughanaghanira umo tingacitira kuti tilombenge mwakwenelera.
18. Ni fundo wuli izo ŵabali ŵakwenera kukumbuka para ŵakwimira mpingo mu lurombo?
18 Pa maungano ghithu, ŵabali ŵakugomezgeka ndiwo ŵakulomba. (1 Tim. 2:8) Pa umaliro wa lurombo ŵabali na ŵadumbu ŵakwenera kuyowoya kuti “ameni” kung’anamura kuti “viŵe ntheura.” Ŵakuyowoya mazgu agha kulongora kuti ŵakuzomerezga ivyo mbali wayowoya. Mu lurombo lwakuwonerapo lwa Yesu mukaŵavya fundo yakuzizika. (Luka 11:2-4) Iyo wakazunura vyose yayi ivyo mutegherezgi wake waliyose wakasoŵerwanga panji kusuzgika. Mu lurombo lwa pa wumba tikwenera cara kuzunuramo vinthu vya taŵene, kweni mu lwa kwatekha. Ndipo para tikulomba pa wumba, tingazunuranga nkhani zacisisi yayi.
19. Kasi tikwenera kucita wuli panyengo ya lurombo lwa pa wumba?
19 Para mbali wakulomba pa wumba, tose tikwenera kulongora kuti ‘tikopa Ciuta.’ (1 Pet. 2:17) Pali vinthu vinyake ivyo tikwenera cara kucita para tili pa maungano Ghacikhristu. (Muph. 3:1) Mwaciyelezgero, yunji wangasacizga kuti wumba wose ukorane mawoko para mbali wakulomba. Ici cingakhuŵazga ŵanji ndiposo ŵalendo awo Mbakaboni ŵa Yehova yayi. Ŵafumu na ŵawoli ŵanji ŵangakorana mawoko mwakucenjera, kweni usange ŵavumbatirana panyengo ya lurombo, awo ŵangawona ŵangakhuŵara. Ŵangawona nga mbali na mudumbu ŵaghanaghaniranga za citemwa cawo ca mu mbumba m’malo mwa kupeleka nchindi kwa Yehova. Ntheura, tiyeni tiŵambare cilicose ico cingakhuŵazga ŵanji. Ticitenge “vinthu vyose kuti Ciuta wapike ucindami.”—1 Kor. 10:31, 32; 2 Kor. 6:3.
Kulomba Vici?
20. Kasi mungalongosora wuli lemba la Ŵaroma 8:26, 27?
20 Nyengo zinyake cakuyowoya cingatisoŵa para tikukhumba kulomba patekha. Paulosi wakalemba kuti: “Suzgo ilo tikwenera kulombera nga ni umo tikwenera kucitira tikulimanya cara, kweni mzimu [utuŵa] iwowene ukuŵeyelera m’malo mwa ise na mitampho yambura kuyowoyeka. Ndipouli, [Ciuta] uyo wakusanda mitima wakumanya ico mzimu ukung’anamura.” (Rom. 8:26, 27) Yehova wali kupangiska kuti malurombo ghanandi ghalembeke mu Baibolo. Wakughawona madando agha nga ni vinthu ivyo tikukhumba kumupempha ndipo wakutipa. Ciuta wakutimanya makora kweniso wakumanya ng’anamuro la vinthu ivyo wakalemba kwizira mwa mzimu wake uwo ukaciska ŵanji kulemba Baibolo. Yehova wakuzgora maŵeyelero ghithu para mzimu “ukuŵeyelera” m’malo mwa ise. Kweni peneapo tikughapulikiska makora Mazgu gha Ciuta, tingaŵa na vinandi mu maghanoghano ivyo tikwenera kulomba.
21. Kasi tizamusanda vici mu nkhani yakulondezgapo?
21 Nga umo tasambilira, malurombo ghithu ghakuvumbura vinandi vya ise. Mwaciyelezgero, ghangavumbura umo ubwezi withu na Yehova uliri ndiposo umo tikumanyira Mazgu ghake. (Yak. 4:8) Mu nkhani yakulondezgapo, tisandenge malurombo na mazgu ghakufumira pasi pa mtima agho ŵanthu ŵakayowoyanga pakulomba, gheneagho ghali kulembeka mu Baibolo. Kasi kusanda Malemba uku kukhwaskenge wuli umo tikucitira para tikulomba?
Kasi Mungazgora Wuli?
• Kasi tikwenera kuŵa na mtima wuli para tikuyowoya na Yehova mu lurombo?
• Cifukwa wuli tikwenera kulombera Ŵakhristu ŵanyithu?
• Kasi malurombo ghithu ghakuvumburaci za ise?
• Kasi tikwenera kucita wuli panyengo ya lurombo?
[Cithuzithuzi pa peji 4]
Kasi nyengo zose mukulumba na kuwonga Yehova?
[Cithuzithuzi pa peji 6]
Ivyo tikucita panyengo ya lurombo vikwenera kucindika Yehova