Zirwiskani Mulimo Winu mu Mpingo
“Ciuta wali kuŵika viŵaro mu thupi, cilicose ca ivyo, umo wakakhumbira.”—1 KOR. 12:18.
1, 2. (a) Nchivici cikulongora kuti waliyose mu mpingo wali na mulimo wakuzirwa? (b) Kasi mu nkhani iyi tizgorenge mafumbo wuli?
KWAMBIRA mu nyengo ya Ŵaisrayeli, Yehova wakupwelelera ŵanthu ŵake mwauzimu na kuŵalongozga kwizira mu mpingo. Mwaciyelezgero, Ŵaisrayeli ŵakati ŵathereska msumba wa Ai, Joshuwa “wakaŵazga mazgu ghose gha dango, vitumbiko na nthembo, kwakuyana na vyose ivyo vilikusimbika mu buku la dango . . . pamaso pa wumba [mpingo] wose wa Israyeli.”—Josh. 8:34, 35.
2 Mu nyengo yakale, mpositole Paulosi wakaphalira Timote, uyo wakaŵa mulara wa mpingo, kuti mpingo Wacikhristu ni “nyumba ya Ciuta” ndiposo “mzati na cikhozgero ca unenesko.” (1 Tim. 3:15) Lero “nyumba” ya Ciuta mbubali wa pa caru cose wa Ŵakhristu ŵaunenesko. Mu cipaturo 12 ca kalata yake yakuya ku Ŵakorinte, Paulosi wakayaniska mpingo na thupi la munthu. Iyo wakati nangauli ciŵaro cilicose cili na mulimo wake na wake, kweni vyose ni vyakukhumbikwa. Wakalemba kuti: “Ciuta wali kuŵika viŵaro mu thupi, cilicose ca ivyo, umo wakakhumbira.” Kweniso wakalongosora kuti “vigaŵa vya thupi ivyo tikughanaghana kuti ni vyakuzirwa pacoko, ivi ndivyo tikuvipa nchindi zinandi comene.” (1 Kor. 12:18, 23) Ntheura, ivyo Mkhristu yumoza wakucita mu nyumba ya Ciuta vikuluska ivyo munyake wakucita yayi. Kuti waka ni vyakupambana. Ipo tingacita wuli kuti tikondwenge na mulimo withu mu gulu la Ciuta ndiposo kuuzirwiska? Kasi ni vinthu wuli ivyo vingakhwaska mulimo uwo tikucita? Ndipo tingacita wuli kuti ‘ŵanthu wose ŵawone umo tikukulira’ mwauzimu?—1 Tim. 4:15.
Kasi Tingazirwiska Wuli Mulimo Withu?
3. Kasi nthowa yimoza iyo tingalongolera kuti tikukondwa na kuzirwiska mulimo withu mu mpingo njakuti wuli?
3 Nthowa yimoza iyo tingalongolera kuti tikukondwa ndiposo kuzirwiska mulimo withu mu mpingo nkhukolerana na “muzga wakugomezgeka na wakucenjera” ndiposo Wupu Wakulongozga. (Ŵazgani Mateyu 24:45-47.) Tikwenera kujisanda na kuwona umo tikucitira na ulongozgi uwo tikupokera kwa muzga. Mwaciyelezgero, tapokera ulongozgi pa nkhani ya kavwaliro na kujitozga, vyakusanguluska ndiposo kugwiliskira nchito Intaneti. Kasi tikupulikira nadi ulongozgi uwemi uwu mwakuti tivikilirike mwauzimu? Kasi tikucita wuli para tikuciskika kuti tiŵenge na nyengo yakusopera pamoza na mbumba? Kasi tili kupulikira ulongozgi uwu na kutema zuŵa lakusopera na mbumba? Usange ndise ŵambura kutora panji kutengwa, kasi tikuŵa na nyengo yakusambilira Malemba patekha? Para tikupulikira ulongozgi wa muzga, Yehova watitumbikenge waliyose payekha kweniso nga ni mbumba.
4. Kasi tikwenera kughanaghanira vici para tikukhumba kucita vinthu?
4 Ŵanji ŵangaghanaghana kuti nkhani yakukhwaskana na vyakusanguluska, kavwaliro na kujitozga nja munthu waliyose payekha. Kweni Mkhristu wakujipeleka uyo wakuzirwiska mulimo wake mu mpingo, pakucita vinthu wakwenera kudemelera pa ivyo wakutemwa yayi. Wakwenera kughanaghanira umo Yehova wakuwonera nkhani iyo, nga umo Mazgu ghake, Baibolo, ghakulongolera. Uthenga uwo uli mu Mazgu gha Ciuta ukwenera kuŵa ‘nyali ku malundi ghithu na muliko wa mu nthowa yithu.’ (Sal. 119:105) Kweniso tingacita makora kuwona umo ivyo tikucita vikukhwaskira uteŵeti withu ndiposo ŵanji, mukati na kuwaro kwa mpingo.—Ŵazgani 2 Ŵakorinte 6:3, 4.
5. Cifukwa wuli tikwenera kucenjera na mzimu wa ukajilange?
5 “Mzimu uwo sono ukugwira nchito mu ŵana ŵambura kupulikira” wazara mwakuti uli nga ni mphepo iyo tikuthuta. (Efe. 2:2) Mzimu uwu ungatipusika kuti tambe kughanaghana kuti tikukhumbikwira ulongozgi wa gulu la Yehova yayi. Nadi, tikukhumba cara kuŵa nga Diyoterefe, uyo ‘wakapokeranga kanthu mwanchindi cara kufuma kwa mpositole Yohane.’ (3 Yoh. 9, 10) Tikwenera kucenjera na mzimu wa ukajilange. Mu mazgu panji vyakucita, tingasuskanga yayi nthowa iyo Yehova wakuyowoyera nase mazuŵa ghano. (Maŵa. 16:1-3) Kweni tikwenera kukoleska mwaŵi wa kukolerana na muzga. Asi tikwenera kuyezgayezga kupulikira na kujilambika ku awo ŵakulongozga mu mpingo withu?—Ŵazgani Ŵahebere 13:7, 17.
6. Cifukwa wuli tikwenera kusanda umo vinthu viliri kwa ise?
6 Nthowa yinyake iyo tingalongolera kuti tikuzirwiska ivyo tikucita mu mpingo nkhusanda mwakupwelelera umo vinthu viliri kwa ise na kucita ivyo tingafiska kuti ‘ticindike uteŵeti withu’ ndiposo Yehova. (Rom. 11:13) Ŵanji ŵakucita upayiniya wanyengozose. Ŵanji ŵakuteŵetera nga mbamishonale, ŵalaŵiliri ŵakwendakwenda, ndiposo kuteŵetera pa Beteli. Ŵabali na ŵadumbu ŵanandi ŵakovwira pakuzenga Nyumba za Ufumu. Wumba ukuru wa ŵanthu ŵa Yehova ukulimbikira kupwelelera mbumba zawo mwauzimu, ndipo ukutangwanika na uteŵeti sabata yiliyose. (Ŵazgani Ŵakolose 3:23, 24.) Tili na cigomezgo kuti para tikujipeleka mu uteŵeti wa Ciuta na kulimbikira kuti timuteŵetere na umoyo withu wose, nyengo zose tiŵenge ŵakukondwa pakucita mulimo withu.
Vinthu Ivyo Vikukhwaska Mulimo Withu
7. Kasi umo vinthu viliri kwa ise vingakhwaska wuli ivyo tikucita mu mpingo?
7 Nchakuzirwa kusanda umo vinthu viliri kwa ise, cifukwa vikukhwaska mulimo uwo tikucita mu mpingo. Mwaciyelezgero, ivyo mbali wakucita mu mpingo vikupambanako pacoko na ivyo mudumbu wakucita. Msinkhu, nkhongono, na vinthu vinyake navyo vikukhwaska ivyo tikucita pakuteŵetera Yehova. Lemba la Zintharika 20:29 likuti: “Ucindami wa ŵapungwe ndi nkhongono zawo, ndipo utozi wa ŵacekuru ndi mbuha zawo.” Awo mbankhongono mu mpingo ŵangagwira nchito zinandi cifukwa cakuti ŵali na nkhongono, apo ŵacekuru ŵali na candulo ku mpingo cifukwa ca vinjeru vyawo na kumanya tunthu. Kweniso tikwenera kukumbuka kuti cilicose ico tingacita mu gulu la Yehova cikuthemba pa lusungu lwake lukuru.—Mil. 14:26; Rom. 12:6-8.
8. Kasi ivyo tikukhumba vikukhwaska wuli ivyo tikucita mu mpingo?
8 Ciyelezgero ca ŵadumbu ŵaŵiri awo mpha ukuru na unung’una cikutovwira kuwona fundo yinyake iyo yingakhwaska ivyo tikucita mu mpingo. Wose ŵali kumalizga sukulu. Wose ŵakukhala mwakuyana waka. Ŵapapi ŵawo ŵakayezgayezga kuŵakhuŵilizga wose ŵaŵiri kucita upayiniya wanyengozose para ŵamalizga sukulu. Ŵati ŵamalizga sukulu, yumoza wakamba upayiniya, apo munyake wakanjira nchito yakulembeka. Nchivici cikaŵapambaniska? Khumbo. Waliyose wakacita ico wakakhumbanga kuzakacita. Asi ndimo taŵanandi tiliri? Tikwenera kughanaghanira comene ivyo tikukhumba kucita pakuteŵetera Ciuta. Kasi tingasazgirako uteŵeti withu, panji nanga nkhusintha vinthu vinyake mu umoyo withu?—2 Kor. 9:7.
9, 10. Kasi tikwenera kucitaci usange tilije khumbo lakuti ticitenge vinandi pakuteŵetera Yehova?
9 Kasi tingacita wuli usange tilije khumbo lakuti ticitenge vinandi pakuteŵetera Yehova mu mpingo? Mu kalata iyo wakalembera Ŵafilipi, Paulosi wakayowoya kuti: “Ciuta, cifukwa ca kukhumba kwake kuwemi, ndiyo wakucita mwa imwe mwakuti muŵe na khumbo kweniso kuti mucite.” Enya, Yehova wangacita mwa ise kuti tiŵe na khumbo.—Fil. 2:13; 4:13.
10 Asi tikwenera kulomba Yehova kuti tikhumbenge kucita khumbo lake? Ndimo Davide, Themba la Israyeli wakacitira. Wakalomba kuti: “Mundisambizge mendero ghinu, A Yehova; ndilongorani nthowa zinu. Mundilongozge mu unenesko winu na kundisambizga, cifukwa ndimwe Ciuta wa ciponosko cane; nkhumulindizgani muhanya wose.” (Sal. 25:4, 5) Ndimo nase tingacitira, tingalomba Yehova kuti watipe mtima wa kukhumba kucita ivyo vikumukondweska. Tikuwonga comene pakughanaghanira kuti Yehova Ciuta na Mwana wake ŵakukondwa para tikucita ivyo ŵakukhumba. (Mat. 26:6-10; Luka 21:1-4) Para tili na mtima wa kuwonga, tilombenge Yehova kuti watipe khumbo la kucita vinandi mu uteŵeti wake. Tikwenera kuŵa na mtima uwo nchimi Yesaya yikaŵa nawo. Nchimi iyi yikati yapulika mazgu gha Yehova ghakuti: “Kasi nditume njani? Ndi njani tiwalutire ise?” yikati: “Ndine pano; nditumani!”—Yes. 6:8.
Kasi Mungacita Wuli Kuti Mukure Mwauzimu?
11. (a) Cifukwa wuli ŵabali ŵakwenera kulimbikira kuti ŵaŵe na milimo yakusazgikira mu mpingo? (b) Kasi mbali wangacita wuli kuti waŵe wakwenelera milimo yakusazgikira?
11 Mu cilimika ca uteŵeti ca 2008, ŵanthu ŵakukwana 289,678 ŵakabapatizika pa caru cose, ndipo ici cikulongora kuti pakukhumbikwira ŵabali ŵakulongozga. Kasi ŵabali ŵakwenera kucita wuli na nkhani iyi? Ŵakwenera kulimbikira kuti ŵafiske ivyo vikukhumbikwa kuti munthu waŵe muteŵeti wakovwira ndiposo mulara wa mpingo, ivyo vili mu Malemba. (1 Tim. 3:1-10, 12, 13; Tito 1:5-9) Kasi mbali wakwenera kucita wuli kuti wafiske ivyo Malemba ghakuyowoya kuti munthu waŵe mulara panji muteŵeti wakovwira? Wakwenera kulimbikira uteŵeti wa m’munda, kucita makora milimo iyo wapika mu mpingo, kulimbikira kuti mazgoro ghake pa maungano ghaŵenge ghakukhozga, ndiposo kutemwa Ŵakhristu ŵanyake. Para wakucita nthena wakulongora kuti wakuzirwiska mulimo uwo wali nawo mu mpingo.
12. Kasi ŵawukirano ŵangalongora wuli kuti mbamwamphu pakuteŵetera Yehova?
12 Kasi ŵabali awo mbawukirano, comenecomene awo ŵali na vilimika vyapakati pa 13 na 19, ŵangacita wuli kuti ŵakure mwauzimu? Ŵangalimbikira kuti ŵakure mu ‘vinjeru na kupulikiska mwa mzimu’ mwa kusambira Malemba. (Kol. 1:9) Kweniso ŵangakura mwauzimu usange ŵakulimbikira kusambira Mazgu gha Ciuta na kuyowoyapo pa maungano gha mpingo. Awo ŵali na nkhongono ŵangalimbikira kuti ŵaŵe ŵakwenelera kunjira pa “mulyango ukuru wakulongozgera ku mulimo” mu vigaŵa vyakupambanapambana vya uteŵeti wanyengozose. (1 Kor. 16:9) Para munthu wakucita vinandi pakuteŵetera Yehova wakukhorwa nadi na umoyo ndipo wakutumbikika comene.—Ŵazgani Mupharazgi 12:1.
13, 14. Kasi ŵadumbu ŵangalongora wuli kuti ŵakuzirwiska mulimo uwo ŵali nawo mu mpingo?
13 Ŵadumbu nawo ŵangalongora kuti ŵakuzirwiska mwaŵi uwo ŵali nawo mwa kufiska ivyo vikuyowoyeka pa Salmo 68:11. Pa lemba ili tikuŵazga kuti: “Yehova wakulangura dango; wumba wa [ŵanakazi] awo ŵakuthuwuska makani ngukuru.” Nthowa yimoza iyo ŵadumbu ŵangalongolera kuti ŵakuwonga mulimo uwo ŵali nawo mu mpingo nkhucita mulimo wa kuzgora ŵanthu kuŵa ŵasambiri. (Mat. 28:19, 20) Ntheura, para ŵadumbu ŵakutangwanika comene na mulimo wa kuzgora ŵanthu kuŵa ŵasambiri ndiposo kujipata kuti ŵacite mulimo uwu, ŵakulongora kuti ŵakuzirwiska mulimo wawo mu mpingo.
14 Mu kalata iyo Paulosi wakalembera Tito, wakayowoya kuti: “Ŵanakazi ŵalara nawo ŵaŵenge na nkharo yakwenelera ŵanthu ŵakusopa, . . . ŵasambizgi ŵa ivyo ni viwemi; mwakuti ŵakumbuskenge nchembere kutemwa ŵafumu ŵawo, kutemwa ŵana ŵawo, kuŵa ŵamahara, ŵatuŵa mu makhaliro, ŵacitenge milimo pa nyumba, ŵawemi, ŵakujilambika ku ŵafumu ŵawo na ŵawo, mwakuti mazgu gha Ciuta ghangayowoyerekanga uheni cara.” (Tito 2:3-5) Ŵadumbu ŵakukhwima ŵangawovwira comene mu mpingo. Para ŵakucindika ŵabali awo ŵakulongozga, kucita vinthu mwamahara pa nkhani ya kavwaliro na kujitozga ndiposo vyakusanguluska, ŵakuŵa bambiro liwemi ku ŵanji ndipo ŵakulongora kuti ŵakucindika mulimo uwo ŵali nawo mu mpingo.
15. Kasi mudumbu wambura kutengwa wangacita wuli kuti waleke kucita phukwa?
15 Nyengo zinyake cingaŵa cakusuzga ku ŵadumbu ŵambura kutengwa kukondwa na ivyo ŵakucita mu mpingo. Mudumbu munyake uyo ivi vikamucitikirapo, wakayowoya kuti: “Nyengo zinyake nkhucita phukwa cifukwa cakuti nili nekha.” Wakati wafumbika ico cikumovwira kuti wazizipizgenge, iyo wakati: “Kulomba na kusambira mazgu gha Ciuta vikunovwira kumazga phukwa. Nkhusambira umo Yehova wakuniwonera. Ndipo nkhuyezga kovwira ŵanji mu mpingo. Ici cikunovwira kuti nileke kujighanaghanira comene.” Mwakuyana na Salmo 32:8, Yehova wakaphalira Davide kuti: “Tindikulongozge na jiso lane.” Enya, maso gha Yehova ghali pa muteŵeti wake waliyose, na ŵadumbu ŵambura kutengwa wuwo, ndipo wawovwirenge wose kuti ŵakondwenge na mulimo wawo mu mpingo.
Khalilirani mu Mpingo
16, 17. (a) Cifukwa wuli nchamahara kuti tili kuzomera nchemo ya Yehova yakuti tiŵe mu gulu lake? (b) Kasi tingacitaci kuti tikhalilire mu gulu la Yehova?
16 Yehova waguza muteŵeti wake waliyose kuti waŵe nayo paubwezi. Yesu wakati: “Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.” (Yoh. 6:44) Pa ŵanthu mabiliyoni ghanandi pa caru capasi, Yehova wali kuticema ise kuti tiŵe mu mpingo wake. Tili kucita cinthu camahara comene kuzomera nchemo iyi. Sono tikumanya ivyo ni vyakuzirwa mu umoyo withu. Ndipo tili ŵacimwemwe ndiposo ŵakukhorwa cifukwa cakuti tili na vyakucita mu mpingo.
17 Wamasalmo munyake wakati: “A Yehova, nkhutemwa kakhaliro ka nyumba yinu.” Wakimbaso kuti: “Lundi lane likwimilira pa cidika; mu ungano ine tinditumbike Yehova.” (Sal. 26:8, 12) Ciuta waunenesko wamupa waliyose wa ise cakucita mu gulu lake. Para tikulondezga ndondomeko iyo Ciuta wanozga na kutangwanika kumuteŵetera, tikhalilirenge mu gulu lake.
Kasi Mukukumbuka?
• Cifukwa wuli nchamahara kuyowoya kuti Mkhristu waliyose wali na mulimo wakuzirwa mu mpingo?
• Kasi tikulongora wuli kuti tikuzirwiska ivyo tikucita mu gulu la Ciuta?
• Kasi ni vinthu wuli ivyo vingakhwaska ivyo tikucita mu mpingo?
• Kasi ŵawukirano na ŵalara ŵangalongora wuli kuti ŵakuzirwiska mulimo wawo mu gulu la Ciuta?
[Vithuzithuzi pa peji 16]
Kasi ŵabali ŵangacita wuli kuti ŵaŵe ŵakwenelera milimo yakusazgikira mu mpingo?
[Cithuzithuzi pa peji 17]
Kasi ŵadumbu ŵangalongora wuli kuti ŵakuzirwiska mulimo wawo mu mpingo?