Kasi Mukuwona Yehova Kuŵa Ŵadada Ŵinu?

“FUMU, mutisambizge kulomba.” Yumoza wa ŵasambiri ŵake wati wayowoya mazgu agha, Yesu wakazgora kuti: “Para mukulomba, mutenge, ‘Ŵadada, zina linu lituŵiskike.’” (Luka 11:1, 2) Yesu mphanyi wakazunura Yehova na vithokozo nga ni “Wankhongonozose,” “Msambizgi,” “Mlengi,” “Mulara wa Mwaka,” na “Themba lamuyirayira.” (Gen. 49:25; Yes. 30:20; 40:28; Dan. 7:9; 1 Tim. 1:17) Kweni wakasankha lizgu lakuti “Ŵadada.” Cifukwa wuli? Panyake nchifukwa cakuti wakukhumba kuti tifikenge kwa Yehova nga umo mwana wakujiyuyura wakufikira ku ŵawiske ŵacitemwa.

Kweni ŵanji cikuŵaŵira cinonono kuwona Ciuta kuŵa Ŵadada ŵawo. Atsukoa wakuzomerezga kuti, “Kwa vilimika vinandi nati nabapatizika, cikaniŵira cinonono kusendelera kwa Yehova na kulomba kwa iyo nga ni Dada.” Pakuyowoya cifukwa ico wakacitiranga nthena, iyo wakuti: “Nkhukumbuka cara apo ŵadada ŵakaniphalirapo kuti ŵakunitemwa.”

Mu mazuŵa ghaumaliro na ghanonono agha, “citemwa cakawiro” ico munthu wakukhazga ku ŵawiske cikusoŵa comene. (2 Tim. 3:1, 3) Ntheura, nchacilendo yayi kuwona kuti ŵanthu ŵanandi ŵali na maghanoghano nga gha Atsuko. Ndipouli, nchakukhozga kumanya kuti pali vifukwa viwemi vyakuwonera Yehova kuŵa Ŵadada ŵithu ŵacitemwa.

Yehova Wakupeleka Vinthu Mwacitemwa

Usange tikukhumba kuwona Yehova kuŵa Ŵadada ŵithu, tikwenera kumumanya makora. Yesu wakati: “Palije uyo wakumumanya makora Mwana, kweni Ŵadada, nesi uyo wakuŵamanya makora Ŵadada, kweni Mwana na waliyose uyo Mwana wakukhumba kuŵavumbura kwa iyo.” (Mat. 11:27) Nthowa yiwemi comene yakumanyira umo Yehova waliri pakuŵa Dada, nkhughanaghanira vinthu vyakukhwaskana na iyo ivyo Yesu wakavumbura. Ntheura, kasi Yesu wakavumburaci za Ŵawiske?

Pakuzomerezga kuti Yehova ndiyo Cisimi ca umoyo wake, Yesu wakati: “Nili wamoyo cifukwa ca Ŵadada.” (Yoh. 6:57) Nase tiliko cifukwa ca Ŵadada. (Sal. 36:9; Mil. 17:28) Nchivici cikatuma Yehova kulenga ŵanthu? Asi cikaŵa citemwa? Nadi, nase tikwenera kutemwa Ŵadada ŵithu ŵakucanya cifukwa ca cawanangwa ca umoyo.

Ciuta wakalongora kuti wakutemwa comene ŵanthu apo wakapeleka Yesu kuŵa sembe yakuwombora. Sembe iyi yikupeleka mwaŵi ku ŵanthu ŵakwananga wakuti ŵaŵe paubwezi na Yehova kwizira mwa Mwana wake wakutemweka. (Rom. 5:12; 1 Yoh. 4:9, 10) Ndipo cifukwa cakuti Ŵadada ŵithu ŵakucanya ŵakufiska ivyo ŵalayizga, tili na cigomezgo cose kuti wose awo ŵakuŵatemwa na kuŵapulikira, ŵazamusangwa na “wanangwa waucindami wa ŵana ŵa Ciuta.”—Rom. 8:21.

Kweniso, Ŵadada ŵithu ŵakucanya “ŵakukwezgera dazi lawo” pa ise zuŵa na zuŵa. (Mat. 5:45) Tikuwona kuti nchambura kwenelera kulomba kuti dazi lifume. Ndipouli, tikusangwa comene na cithukivu cake. Kweniso, Ŵadada ŵithu ŵakupeleka vinthu kuluska waliyose, ndipo ŵakumanya ivyo tikusoŵerwa pambere tindaŵalombe. Ntheura, asi tikwenera kupatura nyengo yakuti tiwonenge na kulangurukapo pa umo Ŵadada ŵithu ŵakucanya ŵakupwelelelera cilengiwa cawo?—Mat. 6:8, 26.

Ŵadada Ŵithu Ni ‘Muvikiliri’

Ŵanthu ŵa Ciuta ŵakakhozgeka na ucimi wa Yesaya wakuti: ‘Mapiri ghawukengeko na tumapiri tusezgekenge, kweni kutemwa kwane kwakukhwima kuwukengeko kwa iwe cara, phangano lane la cimango lisezgekenge cara, wakuti Yehova, muvikiliri wako.’ (Yes. 54:10, The Bible in Living English) Pakukhozgera fundo iyi, ivyo Yesu wakayowoya mu lurombo pa usiku waumaliro wa umoyo wake pa caru capasi, vikulongora kuti Yehova ni ‘muvikiliri’ nadi. Wakalombera ŵasambiri ŵake kuti: “Iwo ŵali mu caru ndipo ine nkhwiza kwa imwe. Ŵadada Ŵatuŵa, ŵavikilirani cifukwa ca zina linu.” (Yoh. 17:11, 14) Yehova wakalaŵilira na kuvikilira ŵalondezgi ŵa Yesu.

Nthowa yimoza iyo Ciuta wakutivikililira ku vipingo vya Satana lero, nkhutipa cakurya cauzimu pa nyengo yakwenelera kwizira mwa “muzga wakugomezgeka na wakucenjera.” (Mat. 24:45) Nchakuzirwa comene kurya cakurya cakupa nkhongono ici, usange tikukhumba ‘kuvwara vyankhondo vyose vyakufuma kwa Ciuta.’ Mwaciyelezgero, ghanaghanirani za “ciskango cikuru ca cipulikano,” ico tingamanya “kuzimyira mivwi yose yakugolera ya muheni.” (Efe. 6:11, 16) Cipulikano ico tili naco cikutivikilira ku vinthu ivyo vingatinanga mwauzimu kweniso nchilongolero cakuti tikumanya kuti Ŵadada ŵithu ŵali na nkhongono.

Tingamanya vinandi vyakukhwaskana na uwemi wa Ŵadada ŵithu ŵakucanya para tikughanaghanira comene umo Yesu wakacitiranga apo wakaŵa pa caru capasi. Wonani nkhani iyo yili kulembeka pa Mariko 10:13-16. Pa lemba ili Yesu wakaphalira ŵasambiri ŵake kuti: “Lekani ŵana ŵacoko ŵize kwa ine.” Ŵana aŵa ŵati ŵiza kwa iyo, wakaŵapokelera na kuŵatumbika. Ŵana aŵa ŵakwenera kuti ŵakakondwa comene. Pakuti Yesu wakati: “Uyo wawona ine wawona na Ŵadada wuwo,” tikumanya kuti Ciuta waunenesko wakukhumba kuti nase tisendelere kwa iyo.—Yoh. 14:9.

Yehova Ciuta nchitemwa. Ndiyo wakutipa vinthu na kutivikilira kuluska waliyose, ndipo wakukhumba kuti tisendelere kwa iyo. (Yak. 4:8) Ntheura, Iyo ni Dada muwemi comene kuluska waliyose.

Umo Tikusangira Candulo

Tikusanga candulo cikuru comene para tikugomezga mwa Yehova pakuŵa Ŵadada ŵithu ŵacitemwa. (Zinth. 3:5, 6) Yesu wakasanga candulo cifukwa ca kugomezga comene Ŵawiske. Wakaphalira ŵasambiri ŵake kuti: “Nili nekha cara, kweni Ŵadada awo ŵali kunituma ŵali nane.” (Yoh. 8:16) Nyengo zose Yesu wakagomezganga kuti Yehova wamovwirenge. Mwaciyelezgero, apo wakabapatizikanga, wakapulika mazgu ghakukhozga kufuma kwa Ŵawiske, ghakuti: “Uyu ni Mwana wane, wakutemweka, mweneuyo nkhukondwa nayo.” (Mat. 3:15-17) Apo wakaŵa pafupi kufwa, Yesu wakacemerezga kuti: “Ŵadada, nkhuŵikizga mzimu wane mu mawoko ghinu.” (Luka 23:46) Yesu wakalutilira kugomezga Ŵawiske.

Ndimo vingaŵiraso na ise. Para Yehova wali pafupi nase, kasi topenge vici? (Sal. 118:6) Atsuko, uyo wazunulika kukwambilira, wakatemwanga kugomezga nkhongono zake para wasuzgika. Nchivici cikacitika wati wamba kusambira za umoyo na uteŵeti wa Yesu, comenecomene nkhani zakukhwaskana na ubwezi uwo ulipo pakati pa Yesu na Ŵawiske ŵakucanya? Iyo wakuti: “Nkhamanya uwemi wa kuŵa na Dada ndiposo kumugomezga.” Wakusazgirapo kuti: “Nkhasanga mtende weneco na cimwemwe. Nadi, palije cifukwa ca kufipira mtima.”

Kasi tingasangaso candulo wuli cifukwa ca kuwona Yehova kuŵa Ŵadada ŵithu? Kanandi ŵana ŵakutemwa ŵapapi ŵawo ndipo ŵakukhumba kuŵakondweska. Cifukwa ca citemwa, Mwana wa Ciuta ‘nyengo zose wakacitanga vinthu vyakukondweska Ŵawiske.’ (Yoh. 8:29) Mwakuyana waka, nase para tikutemwa Ŵadada ŵithu ŵakucanya, ticitenge vinthu mwavinjeru na ‘kuŵalumba pakweru.’—Mat. 11:25; Yoh. 5:19.

Ŵadada Ŵithu ‘Ŵakutikora pa Woko Lamalyero’

Ŵadada ŵithu ŵakucanya ŵatipaso mzimu wawo utuŵa kuti utovwirenge. Yesu wakati: “Uzamumulongozgerani ku unenesko wose.” (Yoh. 14:15-17; 16:12, 13) Mzimu utuŵa ungatilongozga kuti tipulikiske za Ŵadada ŵithu. Ungatovwira kugadabura “vinthu vyakukhomelera,” ndiko kuti, fundo na maghanoghano ghakubudika agho ŵanthu ŵali nagho, na ‘kutolera ku umikoli ghanoghano lililose kulizgora kuŵa lakupulikira Khristu.’ (2 Kor. 10:4, 5) Ntheura, tiyeni tilombe Yehova kuti watipe mzimu utuŵa uwo ukalayizgika, uku tili na cigomezgo cakuti “Ŵadada ŵakucanya ŵapelekenge mzimu uwu ku awo ŵakuŵalomba.” (Luka 11:13) Kweniso nchakwenelera kulomba mzimu utuŵa kuti utovwire kusendelera comene kwa Yehova.

Para mwana mucoko wakwenda na ŵawiske, wakuwona kuti ngwakuvikilirika, wakufwasa, ndipo wakopa cara. Usange mukuwona Yehova kuŵa Ŵadada ŵinu nadi, mukhozgekenge na mazgu agha: “Ine Yehova Ciuta wako, ndakukora ku woko lako la malyero; ndine nkhuti kwa iwe, ‘Ungopanga, ndine tindikovwire.’” (Yes. 41:13) Mungaŵa na mwaŵi wapadera wa “kwenda” na Ciuta muyirayira. (Mika 6:8) Lutilirani kucita khumbo lake ndipo muwonenge kuti Yehova wakumutemwani, kumuvikilirani, ndipo muŵenge ŵacimwemwe cifukwa ca kumuwona kuŵa Ŵadada ŵinu.

[Mazgu ghamusi]