Sambizgani Ŵana Ŵinu

Yesu Wakasambira Kupulikira

KASI nyengo zinyake vikukusuzga kupulikira?—a Usange ndimo viliri nchakuzizika yayi. Waliyose nyengo zinyake vikumusuzga kupulikira. Kasi ukumanya kuti Yesu nayo wakacita kusambira kupulikira?—

Kasi ukuŵamanya awo ŵana wose ŵakwenera kuŵapulikira?— Enya, awiskewo na anyinawo. Baibolo likuti: “Pulikirani ŵapapi ŵinu mu Fumu.” (Ŵaefeso 6:1) Kasi adada ŵa Yesu mbanjani?— Yehova Ciuta, ndipo nase ni Dada withu. (Mateyu 6:9, 10) Kweni para ungati awiske ŵakaŵa Yosefe ndipo anyina ŵakaŵa Mariya, napo waneneska. Kasi ukumanya ivyo vikacitika kuti aŵa ŵaŵe ŵapapi ŵa Yesu?—

Mungelo Gabriyeli wakaphalira Mariya umo wazamubabira mwana nangauli wakaŵa kuti wandagonanepo na mwanalume. Yehova wakacita munthondwe ukuru kuti Mariya waŵe na nthumbo. Gabriyeli wakalongosolera Mariya kuti: “Nkhongono ya Wapacanya Nkhanira yikubenekelerenge. Kweniso pa cifukwa ici, uyo wababikenge wazamucemeka mutuŵa, Mwana wa Ciuta.”—Luka 1:30-35.

Ciuta wakatora umoyo wa Mwana wake kucanya na kuwuŵika mu nthumbo ya Mariya. Ntheura mwana yura wakakuranga mu nthumbo ya Mariya nga umo ŵana wose ŵakukulira mu nthumbo za ŵanyinawo. Myezi yinkhondi na yinayi yikati yakwana, Yesu wakababika. Pa nyengo iyi, Yosefe na Mariya ŵakaŵa ŵakutorana, ndipo ŵanthu ŵanandi ŵakatenge Yosefe ndiyo wiske mweneco wa Yesu. Kweni Yosefe wakaŵa wiske wakumulera. Ntheura tingati Yesu wakaŵa na ŵawiske ŵaŵiri.

Apo Yesu wakaŵa na vilimika 12, wakacita cinthu cinyake ico cikalongora umo wakatemweranga comene Awiske ŵakucanya, Yehova. Pa nyengo yira, nga nkhaluso kawo, mbumba ya Yesu yikenda ulendo utali kuya ku Yerusalemu kukacita Paska. Pamanyuma, apo ŵakaweleranga ku Nazarete, Yosefe na Mariya ŵakamanya kuti Yesu palije. Kasi ukuzizwa kuti ŵakamuluwa wuli?—

Pa nyengo yira, Yosefe na Mariya ŵakaŵa na ŵana ŵanyake. (Mateyu 13:55, 56) Kweniso ŵakwenera kuti ŵakaŵa na ŵabali awo ŵakenderanga lumoza, nga mbina Yakobe na Yohane pamoza na wiskewo, Zebediya, na nyinawo Salome, uyo wakwenera kuti wakaŵa munung’una wa Mariya. Ntheura Mariya wakwenera kuti wakaghanaghananga kuti Yesu wali mu wumba pamoza na ŵabali ŵake ŵanyake.—Mateyu 27:56; Mariko 15:40; Yohane 19:25.

Yosefe na Mariya ŵakati ŵamanya kuti Yesu palije, ŵakawelera ku Yerusalemu. Ŵakafufulika comene kupenja mwana wawo. Pa zuŵa lacitatu ŵakamusanga mu tempele. Mariya wakati kwa iyo: “Wamwana, wacitiraci nase nthena? Wona, ŵawuso na ine pakusuzgika maghanoghano takupenjanga.” Kweni Yesu wakazgora kuti: “Cifukwa wuli mwanipenjanga? Kasi mwamanyanga cara kuti nkhwenera kuŵa mu nyumba ya Ŵadada?”—Luka 2:45-50.

Kasi ukughanaghana kuti Yesu wakaŵazgora uheni anyina?— Ŵapapi ŵake ŵakamanyanga kuti Yesu wakatemwanga kusopa pa nyumba ya Ciuta. (Salmo 122:1) Ntheura kasi Yesu wakabudiska nthena kughanaghana kuti malo ghakwamba agho ŵakenera kumupenja kukaŵa ku tempele la Ciuta?— Mariya wakalutilira kughanaghanira ivyo Yesu wakayowoya.

Kasi Yesu wakaŵawonanga wuli Yosefe na Mariya?— Baibolo likuti: “[Yesu] wakakhira pamoza nawo na kwiza ku Nazarete, ndipo wakalutilira kujilambika kwa iwo.” (Luka 2:51, 52) Kasi tikusambiraci kwa Yesu?— Enya, nase tikwenera kupulikira ŵapapi ŵithu.

Ndipouli, nyengo zose cikaŵa cipusu cara kwa Yesu kupulikira, nanga kungaŵa kwa Awiske ŵakucanya.

Mu usiku wakuti macero wafwenge, Yesu wakalomba Yehova kuti usange vingacitika, wasinthe maghanoghano ghake pa ivyo wakakhumbanga kuti iyo wacite. (Luka 22:42) Kweni Yesu wakapulikira Ciuta nangauli cikaŵa cipusu yayi. Baibolo likuti “wakasambira kupulikira mu vinthu ivyo wakasuzgika.” (Ŵahebere 5:8) Kasi ukughanaghana kuti nase tingasambira sambiro ili?—

[Mazgu ghamusi]

MAFUMBO:

▪ Kasi vikenda wuli kuti Mariya waŵe nyina wa Yesu, ndipo vikacitika wuli kuti Yesu waŵe na awiske ŵaŵiri?

▪ Kasi ŵapapi ŵa Yesu ŵakatondeka wuli kumanya kuti ŵamuleka kumasinda?

▪ Kasi Yesu wakakhazganga kuti ŵapapi ŵake ŵamumupenja nkhu?

▪ Kasi ungasambira vici kwa Yesu?

[Cithuzithuzi pa peji 31]

Cifukwa wuli ukughanaghana kuti Yosefe na Mariya mphanyi ŵakadankha kupenja Yesu mu tempele?