Ivyo Zuŵa la Yehova Lizamuvumbura
“Zuŵa la Yehova lizenge nga ni munkhungu, . . . ndipo caru capasi na milimo iyo yilimo vizamuvumbukwa.”—2 PET. 3:10.
1, 2. (a) Kasi mgonezi uheni uwu uzamumara wuli? (b) Kasi tidumbiskanenge mafumbo wuli?
MGONEZI uheni uwu uliko cifukwa ca maghanoghano ghautesi ghakuti munthu wangawusa makora caru kwambura Yehova. (Sal. 2:2, 3) Kasi cinthu cilicose ico jando lake mbutesi cingalutilira? Cara. Kweni tileke kughanaghana kuti caru ca Satana cizamumara cekha. M’malo mwake, cizamuparanyika na Ciuta pa nyengo iyo mweneko wali kutema. Ivyo Ciuta wazamucita na caru ciheni ici vizamulongora makora urunji na citemwa cake.—Sal. 92:7; Zinth. 2:21, 22.
2 Mpositole Petrosi wakalemba kuti: “Zuŵa la Yehova lizenge nga ni munkhungu, mu leneilo macanya ghazamufumapo luŵiro na mphomo yikuru, kweni visinkho pakuŵa vyakocha comene vizamusongonoka, ndipo caru capasi na milimo iyo yilimo vizamuvumbukwa.” (2 Pet. 3:10) Kasi “macanya” na “caru capasi” ivyo vyazunulika apa ni vici? Kasi “visinkho” ivyo vizamusongonoka ni vici? Ndipo Petrosi wakang’anamurangaci apo wakati “caru capasi na milimo iyo yilimo vizamuvumbukwa”? Kusanga mazgoro gha mafumbo agha kutovwirenge kuti tinozgekere vinthu vyakofya ivyo vikwiza munthazi.
Macanya na Caru Capasi Ivyo Vizamufumapo
3. Kasi macanya agho ghakuzunulika pa 2 Petrosi 3:10 ni vici, ndipo ghazamufumapo wuli?
3 Lizgu lakuti “macanya,” nyengo zinandi mu Baibolo likwimira ŵawusi, cifukwa ŵakuŵa pacanya pa awo ŵakuŵawusa. (Yes. 14: 13, 14; Uvu. 21:1, 2) “Macanya [agho] ghazamufumapo” ghakwimira maboma agho ghalipo sono agho ghakuwusa ŵanthu ŵambura kopa Ciuta. Mazgu ghakuti macanya agha ghazamufumapo na “mphomo yikuru” panji kuti kubangura kwankhongono, ghakung’anamura kuti ghazamuparanyika mwaluŵiro comene.
4. Kasi “caru capasi” ni vici, ndipo cizamuparanyika wuli?
4 “Caru capasi” cikwimira ŵanthu awo ŵali kutali na Ciuta. Ŵanthu ŵanthena ŵakaŵako mu nyengo ya Nowa, ndipo Ciuta wakati waŵaparanyenge na Ciwowota, nakuti wakaŵaparanya nadi. Baibolo likuti: “Na mazgu gheneagha pera, macanya na caru capasi ivyo viliko sono, vyaŵikikira moto, ndipo vikusungikira zuŵa la ceruzgo na la pharanyiko la ŵanthu ŵambura kopa Ciuta.” (2 Pet. 3:7) Ciwowota ca mu nyengo ya Nowa cikaparanya ŵanthu wose pa nyengo yimoza, kweni pharanyiko la mu nyengo ya “suzgo yikuru” lizamucitika mu vigaŵavigaŵa. (Uvu. 7:14) Mu cigaŵa cakwamba, Ciuta wazamukhuŵilizga ŵandyali kuti ŵaparanye “Babuloni Mukuru,” kulongora kuti wakuseluka na cisopa cautesi ico cili nga ni mwanakazi muzaghali. (Uvu. 17:5, 16; 18:8) Pa nyengo ya Haramagedoni, ico nchigaŵa caumaliro ca suzgo yikuru, Yehova wazamuphyera cilicose ico cili ku cigaŵa ca caru ca Satana.—Uvu. 16:14, 16; 19:19-21.
“Visinkho . . . Vizamusongonoka”
5. Kasi “visinkho” vikusazgapo vici?
5 Kasi “visinkho” ivyo “vizamusongonoka” ni vici? “Visinkho” ivyo Petrosi wakayowoyanga apa, ni vinthu ivyo vikucitiska ŵanthu kuŵa na mikhaliro yakususkana na Ciuta. “Visinkho” ivi vikusazgapo “mzimu wa caru” uwo “ukugwira nchito mu ŵana ŵambura kupulikira.” (1 Kor. 2:12; ŵazgani Ŵaefeso 2:1-3.) Mzimu uwu panji kuti “mphepo,” wazura mu caru cose ca Satana. Ukucitiska ŵanthu kuti ŵaghanaghanenge, kuyowoya, ndiposo kucita nga ni Satana uyo ni “muwusi wa mazaza gha mphepo.”
6. Kasi ŵanthu ŵakulongora wuli mzimu wa caru?
6 Ntheura, kwali ŵakumanya panji yayi, awo ŵakulongozgeka na mzimu wa caru ŵakuzomerezga mtima wawo kuwumbika na Satana, ndipo cilato cake nchakuti ŵalongorenge maghanoghano na nkharo yake. Lekani ŵakucita cilicose ico ŵakukhumba, mwambura kughanaghanirako za khumbo la Ciuta. Ŵakucita vinthu mwakujikuzga panji mwauryezi, ŵakugalukira ŵamazaza, ndiposo ŵakujikora yayi ku “makhumbiro gha thupi, [na] makhumbiro gha maso.”—Ŵazgani 1 Yohane 2:15-17.a
7. Cifukwa wuli tikwenera ‘kuvikilira mtima withu’?
7 Ipo nchakuzirwa kuti ‘tivikilire mtima withu’ mwa kucita vinthu mwakuyana na fundo za mu Malemba pa nkhani ya kusankha ŵabwezi, ivyo tikuŵazga, vyakusanguluska, ndiposo vinthu ivyo tikuwona pa Intaneti. (Zinth. 4:23) Mpositole Paulosi wakalemba kuti: “Cenjerani kuti paŵavye munthu wamukorani nga ni nyama, kwizira mu vinjeru vya caru na upusikizgi wawaka, kwakuyana na maluso gha ŵanthu, kwakuyana na vinthu vyakwambilira vya caru, kuti kwakuyana na Khristu cara.” (Kol. 2:8) Cenjezgo ili ndakukhumbikwa comene sono apo zuŵa la Yehova likuneng’enera, cifukwa cithukivu cake cizamusongonora “visinkho” vyose vya mgonezi wa Satana, na kuvilongora pakweru kuti vingimako yayi ku cithukivu ici. Fundo iyi yikutikumbuska ivyo lemba la Malaki 4:1 likuyowoya, kuti: “Zuŵa likwiza, lakocha nga ndi ng’anjo, ndipo wose ŵakujikuzga na wose ŵakucita uheni tiŵaŵe viswatu; zuŵa ilo likwiza lamkuwocha.”
“Caru Capasi na Milimo Iyo Yilimo Vizamuvumbukwa”
8. Kasi caru capasi na milimo iyo yilimo “vizamuvumbukwa” wuli?
8 Kasi Petrosi wakang’anamurangaci pakulembeka kuti “caru capasi na milimo iyo yilimo vizamuvumbukwa”? Lizgu lakuti “vizamuvumbukwa” lingang’anamuraso ‘kusangika’ panji ‘kuŵikika pa mutandasanya.’ Petrosi wakang’anamuranga kuti mu nyengo ya suzgo yikuru, Yehova wazamuŵika pa mutandasanya caru ca Satana, kucivumbura kuti cikwimikana na iyo ndiposo Ufumu wake, nakuti nchakwenelera kuciparanya. Pakuyowoya ivyo vizamucitika mu nyengo iyi, lemba la Yesaya 26:21 likuti: “Yehova wakufuma mu malo ghake kulanga ŵamucaru cifukwa ca ubendezi wawo, ndipo caru camkuvumbura ndopa izo zikathikapo, ntha camkubenekelera na kubisa ŵakukomeka ŵake.”
9. (a) Kasi tikwenera kukana vici, ndipo cifukwa wuli? (b) Kasi tikwenera kuŵa na vipambi wuli, ndipo cifukwa wuli?
9 Pa zuŵa la Yehova, awo ŵakuwumbika na mzimu wa caru ŵazamulongora wunthu wawo, nakuti ŵazamukomana ŵekhaŵekha. Ndipo vyakusanguluska ivyo vyazara mazuŵa ghano vikuwumba maghanoghano gha ŵanandi, pakuti ndivyo ŵazamucita apo woko la yumoza lizatumphuskika “kwimikana na woko la munyake.” (Zek. 14:13) Ipo nchakuzirwa comene kuti tikane mafilimu, mabuku, na vinyake ivyo vingapangiska kuti tiŵe na mikhaliro iyo Ciuta wakuti mbunyankhasi, nga nkhujikuzga na kutemwa nkhaza. (2 Sam. 22:28; Sal. 11:5) M’malo mwake, tiyeni tiŵe na vipambi vya mzimu utuŵa wa Ciuta, cifukwa vipambi ivi vizamusongonoka yayi pa zuŵa likuru la Yehova.—Gal. 5:22, 23.
“Macanya Ghaphya na Caru Capasi Ciphya”
10, 11. Kasi “macanya ghaphya” na “caru capasi ciphya” ni vici?
10 Ŵazgani 2 Petrosi 3:13. “Macanya ghaphya” ni Ufumu wa Ciuta, uwo uli kukhazikiskika mu cilimika ca 1914, apo “nyengo zakutemeka za mitundu” zikamalira. (Luka 21:24) Boma ili lizamuwusika na Khristu Yesu ndiposo ŵanyake ŵakukwana 144,000, ndipo ŵanandi ŵa iwo ŵali kupokera kale njombe yawo ya kucanya. Mu buku la Uvumbuzi, ŵanthu aŵa ŵakucemeka kuti “msumba utuŵa, Yerusalemu Muphya, wakukhira kufuma kucanya kwa Ciuta ndipo wakanozgeka nga ni mwali wakutozgekera mfumu wake.” (Uvu. 21:1, 2, 22-24) Nga umo msumba wa Yerusalemu ukaŵira cinyina ca boma la Israyeli, Yerusalemu Muphya uyu na mfumu wake ndiwo ni boma la caru ciphya. Msumba uwu uzamukhira nadi kufuma kucanya yayi, kweni uzamuwusa caru capasi kufuma kucanya.
11 “Caru capasi ciphya” mbanthu awo ŵazamulongora kuti mbakukhumbisiska kujilambika ku Ufumu wa Ciuta. Paradiso wauzimu uyo ŵanthu ŵa Ciuta ŵakusangwa nayo sono, ŵazamusangwa nayo mwakufikapo mu “caru ico cikwiza.” (Heb. 2:5) Kasi tingacitaci kuti nase tizakanjire mu caru ciphya?
Nozgekerani Zuŵa Likuru la Yehova
12. Cifukwa wuli caru cizamuzukuma comene na zuŵa la Yehova?
12 Paulosi na Petrosi, wose ŵakayowoya kuti zuŵa la Yehova lizenge “nga ni munkhungu” panji kuti mwamabuci. (Ŵazgani 1 Ŵatesalonika 5:1, 2.) Nanga Mbakhristu ŵaunenesko awo ŵakulindilira zuŵa ili, nawo ŵazamuzukuma nalo. (Mat. 24:44) Kweni caru, ndico cizamuzukuma comene. Paulosi wakalemba kuti: “Pa nyengo iyo [awo ŵali kutali na Yehova] ŵakuti: ‘Bata na mtende!’ penepapo ndipo pharanyiko lamabuci lizamuŵawira mwaluŵiro nga ni vyakuŵinya vya kubaba pa mwanakazi wanthumbo; ndipo ŵazamupona cara napacoko.”—1 Tes. 5:3.
13. Kasi tingacita wuli kuti tileke kupuluskika na nchemerezgo yakuti “Bata na mtende!”?
13 Nchemerezgo yakuti “Bata na mtende!” uzamuŵa utesi unyake wakufuma ku viŵanda, kweni ŵateŵeti ŵa Yehova ŵazamupuluskika yayi. Paulosi wakalemba kuti: “Imwe ŵabali, kuti muli mu cisi cara, muli nga mbankhungu cara awo zuŵa lira lizamuŵabucizga, cifukwa mose muli ŵana ŵa ungweru na ŵana ŵa muhanya.” (1 Tes. 5:4, 5) Ntheura, tiyeni tikhalilire mu ungweru, ndipo ticimbire cisi ico cili mu caru ca Satana. Petrosi wakalemba kuti: “Ŵakutemweka, pakumanyirathu ivi, cenjerani kuti muleke kupuluskika pamoza nawo [ŵasambizgi ŵatesi mu mpingo Wacikhristu] mu mphuvya za ŵanthu ŵakuswa malango ndiposo kuti muleke kuwa pa kuchintha kwinu.”—2 Pet. 3:17.
14, 15. (a) Kasi Yehova waticindika wuli? (b) Kasi ni mazgu wuli agho tikwenera kughanaghanirapo comene?
14 Wonani kuti Yehova wakutiphalira waka kuti ‘ticenjere’ yayi. M’malo mwake, waticindika mwa ‘kutimanyiskirathu’ ivyo vicitikenge munthazi.
15 Kweni cacitima nchakuti ŵanji ŵaleka kuŵikako mahara ku fundo yakuti tiŵe maso, ndipo ŵakususka na kususka wuwo. Iwo ŵangati, ‘Tikamba ni kale kupulika ivi.’ Ndipouli, ŵanthu ŵanthena ŵakwenera kumanya kuti ŵakukayikira muzga pera yayi, kweniso Yehova na Mwana wake. Yehova wakati: “Lindilira.” (Hab. 2:3) Kweniso Yesu wakati: “Muŵenge maso cifukwa mukumanya cara zuŵa ilo Fumu yinu yikwizira.” (Mat. 24:42) Petrosi nayo wakalemba kuti: “Mughanaghanire mtundu wa ŵanthu uwo mukwenera kuŵa. Muŵe ŵanthu ŵa makhaliro ghatuŵa na kucita milimo ya kusopa Ciuta mwakujipeleka, uku mukulindilira na kukumbuka nyengo zose kuŵapo kwa zuŵa la Yehova.” (2 Pet. 3:11, 12) Muzga wakugomezgeka na Wupu Wakulongozga ŵakulutilira kuwona mazgu agha kuŵa ghakuzirwa comene.
16. Kasi tikwenera kukana maghanoghano wuli, ndipo cifukwa wuli?
16 Manyani kuti “muzga muheni” ndiyo wakuwona kuti Fumu yikucedwa. (Mat. 24:48) Muzga muheni uyu njumoza wa awo ŵakuyowoyeka pa 2 Petrosi 3:3, 4. Petrosi wakati: “Mu mazuŵa gha umaliro kwizenge ŵakugoska” awo “ŵakulondezga makhumbiro ghawo na ghawo,” ndipo ŵakugoska awo ŵakulindilira zuŵa la Yehova mwakugomezgeka. M’malo mwa kuŵika mtima pa vinthu vya Ufumu, ŵagoski aŵa ŵakujighanaghanira comene ŵekha. Tiyeni tikanirethu maghanoghano ghaheni agha. Kweni tiyeni tiwone “kuzika mtima kwa Fumu yithu kuŵa ciponosko” apo tikutokatoka na mulimo wa kupharazga Ufumu na kuzgora ŵanthu kuŵa ŵasambiri. Kweniso tileke kwenjerwa comene na nyengo iyo zuŵa ili lizamwizira cifukwa Yehova Ciuta ndiyo wakumanya.—2 Pet. 3:15; ŵazgani Milimo 1:6, 7.
Gomezgani Ciuta wa Ciponosko
17. Kasi Ŵakhristu ŵakugomezgeka ŵakacita wuli na cenjezgo la Yesu lakuti ŵawukemo mu msumba, ndipo cifukwa wuli?
17 Mu 66 C.E. ŵasilikari Ŵaroma ŵakati ŵazingilizga Yudeya, Ŵakhristu ŵakugomezgeka ŵakapulikira cenjezgo la Yesu lakuti para Yerusalemu wazingilizgika waka na ŵankhondo ŵafumemo mu msumba. (Luka 21:20-23) Cifukwa wuli ŵakawukamo luŵiro? Ŵakwenera kuti ŵakakumbukanga cenjezgo la Yesu. Nchakuwonekerathu kuti ŵakamanyanga kuti para ŵacimbira ŵasuzgikenge nga umo Khristu wakaŵacenjezgera. Ndipouli, ŵakamanyangaso kuti Yehova wazamutayapo yayi ŵanthu ŵake ŵakugomezgeka.—Sal. 55:22.
18. Kasi mazgu gha Yesu gha pa Luka 21:25-28 ghakumupangiskani kuti imwe muwonenge wuli suzgo yikuru iyo yikwiza?
18 Nase tikwenera kugomezga comene Yehova, cifukwa ndiyo pera wazamutiponoska pa nyengo ya suzgo yikuru iyo yizamuwira mgonezi uwu. Pa nyengo yinyake, para suzgo yikuru yamba, kweni pambere Yehova wandaparanyirethu caru, ŵanthu “ŵazamupuzuka [kuzemphuka] cifukwa ca wofi na kulindilira vinthu ivyo vikwiza pa caru.” Ndipouli, apo ŵalwani ŵa Ciuta ŵazamutenthema na vinthu ivi, ŵateŵeti ŵakugomezgeka ŵa Yehova ŵazamuŵavya wofi. Iwo ŵazamukondwa cifukwa ca kumanya kuti ŵali pafupi kuponoskeka.—Ŵazgani Luka 21:25-28.
19. Kasi mu nkhani yakulondezgapo tizamusambira vici?
19 Awo ŵakulutilira kutalikirana na caru pamoza na “visinkho” vyake, ŵakulindilira vinthu viwemi munthazi. Nga umo nkhani yakulondezgapo yizamulongosolera, usange tikukhumba kusanga umoyo, tikwenera kucita vinandi padera pa kuŵambara viheni. Tikukhumbikwira kuŵa na mikhaliro iyo yikukondweska Yehova ndiposo kucita milimo iyo wakukhumba.—2 Pet. 3:11.
[Mazgu ghamusi]
a Kuti mumanye vinandi ivyo mzimu wa caru ukucita, wonani buku la Kukambitsirana, pa peji 323-327.
Kasi Mungalongosora?
• Kasi mazgu agha ghakwimiraci?
‘macanya na caru capasi’ ivyo vilipo sono
“visinkho”
‘macanya ghaphya na caru capasi ciphya’
• Cifukwa wuli tikugomezga comene Ciuta?
[Cithuzithuzi pa peji 5]
Kasi mungacita wuli kuti ‘muvikilire mtima winu’ na kulutilira kutalikirana na caru?
[Cithuzithuzi pa peji 6]
Kasi tikulongora wuli kuti tikuwona “kuzika mtima kwa Fumu yithu kuŵa ciponosko”?