Wovwirani Ŵana Kumanya Mpingo wa Yehova
ŴANA ŵakukhumba kumanya. Ghanaghanirani mafumbo agho ŵana ŵa Ŵaisrayeli ŵakwenera kuti ŵakafumbanga pa usiku uwo Paska lakwamba likacitikira: ‘Cifukwa wuli kanamberere kakomeka?’ ‘Cifukwa wuli adada ŵakuphaka ndopa pa muryango?’ ‘Kasi tikuluta nkhu?’ Ivyo Yehova wakaphalira mitu ya mbumba za Ŵaisrayeli vikulongora kuti wakawona mafumbo agha kuŵa ghakwenelera. Pakuyowoya za Paska uyo wakeneranga kucitika munthazi, Yehova wakati: “Apo ŵana ŵinu tiŵate kwa imwe, Kasi mukung’anamuraci na uteŵeti uwu? Imwe mwamkuti, Ndi sembe ya Paska la Yehova, cifukwa wakajumphilira nyumba za ŵana ŵa Israel mu Egypt, penepapo wakakoma ŵaEgypt kweni wakaponoska nyumba zithu.” (Ex. 12:24-27) Pamasinda Yehova wakakumbuska ŵapapi kuti ŵakwenera kuzgora para ŵana ŵawo ŵafumba vyakukhwaskana na “vilayizgo, na maweruzgo” ivyo Yehova wakalangura.—Dute. 6:20-25.
Nchakuwonekerathu kuti Yehova wakakhumbanga kuti ŵana ŵasange mazgoro ghakukhorweska ghakukhwaskana na kusopa kwaunenesko, agho ghangaŵakhuŵilizga kuti ŵamutemwenge nga ni Ciuta wawo na Mponoski wawo. Mazuŵa ghano ndivyoso Yehova wakukhumba. Nthowa yimoza iyo ŵapapi ŵangasambizgira ŵana ŵawo kuti ŵatemwenge Ciuta na mtima wose nkhuŵawovwira kumanya makora mpingo wa Yehova ndiposo kupulikiska vyandulo ivyo ŵangasanga. Tiyeni tiwone vinthu vinyake ivyo vingawovwira ŵana kumanya makora mpingo wa Ciuta.
Mpingo Uwo Mukuwunganako
Ŵana ŵakwenera kumanya makora mpingo uwo mbumba yinu yikuwunganako. Kuti ivi vicitike, mwaŵapapi mukwenera kuluta na ŵana ŵinu ku maungano ghose. Para mukucita nthena ndikuti mukulondezga ivyo Yehova wakaphalira Ŵaisrayeli, kuti: “Wunjikani ŵanthu, ŵanalume na ŵanakazi, na ŵana, . . . kuti ŵapulike na kusambira kuopa Yehova Ciuta winu, na kupwelera kucita mazgu ghose gha dango ili, na kuti ŵana ŵawo awo ŵalije kulimanya, ŵapulike, na kusambira kumuopa Yehova Ciuta winu.”—Dute. 31:12, 13.
Ŵana ŵangamba kusambira Mazgu gha Yehova kufuma waka pa ubonda. Pakuyowoya za Timote, mpositole Paulosi wakati: “Kufuma pa ubonda, wamanya malemba ghatuŵa.” (2 Tim. 3:15) Pa maungano, nanga mbana ŵacokoŵacoko comene ŵakwamba kumanya ivyo tikusambira ndiposo kuzgoŵera sumu za Ufumu. Ŵakusambira kujura na kupwelelera Baibolo ndiposo mabuku ghakulongosora Baibolo. Kweniso, pa maungano ŵakuwona citemwa canadi, mukhaliro uwo Ŵakhristu ŵaunenesko ŵakumanyikwa nawo. Yesu wakati: “Nkhumupani dango liphya, lakuti mutemwanenge yumoza na munyake; umo ine namutemwerani, kuti namweso mutemwanenge yumoza na munyake. Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.” (Yoh. 13:34, 35) Para ŵana ŵakuwona citemwa na civikiliro ivyo vikuŵa ku Nyumba ya Ufumu, ŵakukondwa comene ndipo ŵakunweka kuti ŵawunganenge nyengo zose.
Para muli na cizgoŵi ca kuluta mwakutendekera ku Nyumba ya Ufumu ndiposo kukhalira pacoko waka para maungano ghamara, mbwenu ŵana ŵinu ŵaŵenge na mwaŵi wa kusanga ŵabwezi. M’malo mwa kuŵaleka kuti ŵacezgenge na ŵana ŵanyawo pera, mwalekeraci kuŵawovwira kuti ŵamanyane na ŵabali ndiposo ŵadumbu ŵa misinkhu yose? Para ŵana ŵinu ŵamanyana na ŵalara, ŵazamumanya vinandi ndipo ŵazamusanga vinjeru. Nga umo Zekariya wakasambizgira Themba Uziya kopa Ciuta waunenesko, ŵanthu awo ŵateŵetera Yehova mwakugomezgeka kwa vilimika vinandi nawo ŵangawovwira ŵana. (2 Mid. 26:1, 4, 5) Para muli pa Nyumba ya Ufumu, mungaŵalongosolera ŵana ŵinu nchito ya layibulare, bolodi la cimanyisko, na vinthu vinyake.
Mpingo wa pa Caru Cose
Ŵana ŵakwenera kumanya kuti mpingo uwo mukuwunganako ngumoza mwa mipingo yakujumpha 100,000 ya pa caru cose. Ŵalongosolerani vinthu vinyake vyakukhwaskana na mpingo uwu, umo ukucitira nchito zake, ndiposo ivyo ŵana ŵangacita kuti wovwirepo. Ŵaphalirani cifukwa ico mukuŵira ŵakunweka na maungano gha dera, gha cigaŵa, ndiposo kucezgeska kwa mulaŵiliri wa dera.—Wonani bokosi lakuti, “Nkhani Izo Mungadumbiskana pa Nyengo Yakusopera ya Mbumba,” pa peji 28.
Para mpata ungasangika, cemerani ku nyumba kwinu ŵalaŵiliri ŵakwendakwenda, ŵamishonale, awo ŵakuteŵetera pa Beteli, na ŵateŵeti ŵanyake ŵanyengozose kuti mukacezge nawo. Lekani kughanaghana kuti ŵalije nyengo yakucezgera na ŵana. Ŵateŵeti ŵanyengozose aŵa ŵakuyezgayezga kucita nga ni Yesu, uyo nyengo zose wakapokeleranga ŵana na kuyowoya nawo. (Mrk. 10:13-16) Para ŵana ŵinu ŵakutegherezga apo ŵateŵeti ŵanyengozose aŵa ŵakulongosora cimwemwe ico ŵasanga pakuteŵetera, nawo ŵazamunweka kucita uteŵeti wanyengozose.
Kasi imwe mungacitaci kuti movwire ŵana ŵinu kumanya makora mpingo wa Yehova? Wonani masacizgo agha: Nga ni mbumba, sambirani burosha lakuti Ŵakaboni ŵa Yehova—Kasi Iwo Mbanjani? Longosorani kujipeleka, kujicefya, na kugomezgeka uko ŵateŵeti ŵa Yehova ŵalongora. Ŵaphalirani umo Yehova waŵagwiliskilira nchito pakuthandazga makani ghawemi pa caru cose. Ŵalongorani mavidiyo ghakupangika na gulu la Yehova mwakuti muŵasambizge vinthu vyakuzirwa vyakale na vyasono wuwo. Para mungafiska, lutani kukawona ofesi ya munthavi ya mu caru cinu panji mu caru cinyake. Ŵana ŵinu ŵazamovwirika kumanya umo cigaŵa ca pa caru capasi ca gulu la Yehova cikwendeskera vinthu kuti muzga wakugomezgeka wapeleke cakurya cauzimu ku ŵabali pa caru cose capasi nga umo vikaŵira mu nyengo ya Ŵakhristu ŵakwambilira.—Mat. 24:45-47; Mil. 15:22-31.
Kusambizga Kuyana na Mwana Waliyose
Para mukusambizga ŵana ŵinu kumbukani umo Yesu wakasambizgiranga ŵapositole ŵake. Nyengo yinyake wakaŵaphalira kuti: “Nicali na vinthu vinandi kuti niyowoye kwa imwe, kweni mungamanya kuvipulikiska sono cara.” (Yoh. 16:12) Yesu wakaŵakhapizganga yayi pakuŵasambizga. M’malo mwake wakaŵasambizganga pacokopacoko, mwakuti ŵapulikiske makora. Namwe pakusambizga lekani kuŵakhapizga. Para mukuŵalyeska vicoko waka kweni mwakukhazikika, ŵanwekenge kusambira vinthu vyakukhwaskana na mpingo wa Yehova. Para ŵana ŵinu ŵangakhumbikwira kumanya vyakusazgikira, mungawerezga ivyo mukaŵasambizga kale na kusazgirapo ivyo vikukhumbikwa.
Mpingo ukutikhozga mwauzimu, ndipo ŵawukirano awo ŵakutokatoka mu mpingo ŵakumanya umo ŵangakanira kuwumbika na caru ca Satana. (Rom. 12:2) Tili na cigomezgo kuti movwirenge ŵana ŵinu kuti ŵaumanye makora mpingo wa Yehova. Mphanyi ŵalutilira kujibatika ku mpingo uwu ndiposo kwa Ciuta wacitemwa uyo tikumuteŵetera.
[Bokosi/Cithuzithuzi pa peji 28]
Nkhani Izo Mungadumbiskana pa Nyengo Yakusopera ya Mbumba
Izi ni nkhani zinyake zakukhwaskana na mpingo izo mungadumbiskana pa Nyengo Yakusopera ya Mbumba.
▪ Dumbiskanani za mdauko wa mpingo uwo mukuwunganako. Ukamba pawuli, ndipo ukamba wuli? Kasi pakwamba ukawungananga nkhu? Pa cidumbirano ici, mwalekeraci kucemerapo munthu uyo wakaŵapo apo mpingo uwu ukambanga kuti wazakazgore mafumbo gha ŵana ŵinu?
▪ Longosorani cilato ca maungano gha mpingo, gha dera na gha cigaŵa, ndiposo umo ŵana ŵangandulira nagho.
▪ Dumbiskanani cilato ca sukulu zakupambanapambana izo gulu la Yehova lili kwambiska. Longosorani vyandulo vya sukulu izi.
▪ Wovwirani ŵana kuti ŵamanye kuzirwa kwa kupharazga makani ghawemi nyengo zose. Ŵalongosolerani umo ŵangacitira kuti lipoti lawo liŵengepo pa lipoti la pa caru cose ilo likuŵa mu Uteŵeti Withu wa Ufumu.
▪ Dumbiskanani mauteŵeti ghakupambanapambana agho ŵana ŵangacita mu mpingo wa Yehova. Mu cipaturo 10 ca buku la Ŵakunozgeka Kucita Khumbo la Yehova muli fundo ziwemi.
▪ Wovwirani ŵana kupulikiska cifukwa ico mpingo ukulondezgera nthowa zinyake pakucita vinthu. Longosorani cifukwa ico ŵakwenera cara kuŵa kamphanda paŵekha nanga mpha tunthu uto tungawoneka nga nthucoko. Ŵaphalirani umo ŵangawovwilirapo kuti mpingo ulutilire kwenda makora mwakulondezga ulongozgi wa ŵalara.
[Cithuzithuzi]
Ŵana ŵinu ŵandulenge para ŵakutemwana na awo ŵateŵetera nyengo yitali
[Vithuzithuzi pa peji 26]
Nga umo vikaŵira na Ŵaisrayeli, ŵapapi ŵakuyezgayezga kuzgora mwakukhorweska para ŵafumbika vya mpingo wa Yehova