Yehova Wakupulika Kulira kwa Wakusokwa
NGA umo Solomoni themba lavinjeru likawonera, “nyengo na mwaŵi” panji kuti vinthu vyamabuci vikuwira tose. (Muph. 9:11) Ngozi panji viyezgo vingatimbanizga comene umoyo withu. Mwaciyelezgero, para mbali withu wafwa, tingasuzgika comene maghanoghano kwa masabata ndiposo myezi yinandi. Munthu wangatimbanizgika maghanoghano, mwakuti wangamba kuwona nga ngwambura kwenelera kulomba kwa Yehova.
Munthu wanthena wakukhumbikwira kumukhozga, kumughanaghanira, na kumutemwa. Davide wakimba kuti: “Yehova wakufighilira wose awo ŵakukhuŵara, na kuwuska awo ŵasindama.” (Sal. 145:14) Baibolo likutiphalira kuti: “Maso gha Yehova ghakulaŵiska uku na uko mu caru cose ca pasi, kujiwonya nkhongono kovwira awo mitima yawo njakufikapo pamaso pake.” (2 Mid. 16:9) Yehova wakuŵa ‘na uyo ngwa mzimu wakuphyoka na wakujiyuyura, mwakuti wawuskeso mzimu wa wakujiyuyura na kupaso umoyo ku mtima wa wakuphyoka.’ (Yes. 57:15) Kasi Yehova wakovwira wuli uyo wali na mzimu wakuphyoka na wakujiyuyura?
“Lizgu pa Nyengo Yakwenelera”
Nthowa yimoza iyo Yehova wakupelekera wovwiri pa nyengo yakwenelera nkhwizira mu Ŵakhristu ŵanyithu. Ŵakhristu ŵakuciskika kuti ‘ŵayowoyenge mwakupembuzga kwa awo ŵakusuzgika maghanoghano.’ (1 Tes. 5:14) Mazgu ghakuyowoyeka mwalusungu ndiposo mwacitemwa agho Mkhristu wangayowoya kwa munyake, ghangawovwira comene pa nyengo ya suzgo. Pakupembuzga munthu pakukhumba kuyowoya mazgu ghanandi yayi, nanga ghangaŵa ghacoko waka ghangakhozga uyo wasokwa. Mazgu ghakupembuzga ghangayowoyeka na munthu uyo suzgo lakuyana waka likamuwirapo. Panji wangaŵa mubwezi uyo wali kuwonapo ivyo vikacitikira ŵanthu ŵanyake. Iyi njimoza mwa nthowa izo Yehova wakovwilira uyo wali na mzimu wakuphyoka.
Wonani ivyo vikacitikira Mkhristu munyake zina lake Alex, uyo wakaŵa kuti watora waka ndipo muwoli wake wakafwa mwamabuci. Mulaŵiliri munyake wakwendakwenda wakayowoya nayo mazgu ghakupembuzga. Nayo muwoli wake wali kutayika, kweni wali kutoraso. Mulaŵiliri wakwendakwenda uyu wakalongosora umo nayo wakasuzgikira maghanoghano. Wakapembuzgikanga para wali na ŵabali mu uteŵeti ndiposo pa maungano gha mpingo. Kweni para wanjira mu nyumba yake na kujara cijaro wakaŵanga na phukwa comene. Alex wakati: “Nkhapembuzgika kumanya kuti waliyose para wasokwa wakusuzgika maghanoghano.” Nchakuwonekerathu kuti “lizgu pa nyengo yakwenelera” lingapembuzga uyo wasokwa.—Zinth. 15:23.
Mulara munyake, uyo wakumanya makora suzgo ilo likuŵa na ŵanthu awo ŵanyawo ŵa mu nthengwa ŵali kutayika, nayo wakamupembuzgapo Alex. Na mtima walusungu wakati Yehova wakumanya umo tikujipulikira ndiposo ico tikukhumbikwira. Mbali uyu wakati: “Para myezi ndiposo vilimika vyajumphapo, ndipo mukuwona kuti mukukhumbikwira munyinu, pasono Yehova wapeleka mwaŵi wa kutoraso panji kutengwaso.” Kweni ni wose yayi awo ŵanyawo ŵa mu nthengwa ŵali kutayika awo ŵangatoraso panji kutengwaso. Wakati waghanaghanirapo pa mazgu gha mbali uyu, Alex wakati: “Kukumbuskika kuti kutoraso panji kutengwaso nchawanangwa cakufuma kwa Yehova, kukovwira kuti uleke kughanaghana kuti uŵenge wambura kugomezgeka kwa munyako panji ku malango gha Yehova ghakukhwaskana na nthengwa para ungatoraso panji kutengwaso.”—1 Kor. 7:8, 9, 39.
Davide uyo nayo wakakumanapo na viyezgo vinandi kweniso masuzgo, wakamanyanga kuti: “Maso gha Yehova ghakulaŵiska ŵarunji, makutu ghake ghakupulika nkhuto yawo.” (Sal. 34:15) Tikukayika yayi kuti Yehova wangazgora nkhuto ya ŵasokwano pa nyengo yakwenelera, kwizira mu mazgu ghavinjeru ghakufuma ku Ŵakhristu ŵanyithu. Wovwiri uwu ngwakuzirwa kweniso ngwacandulo.
Wovwiri Kwizira mu Maungano
Kanandi munthu wa mtima wakudonda wakuŵa na maghanoghano ghambura kwenelera agho ghakucitiska kuti wajipaturenge ku ŵanyake. Kweni lemba la Zintharika 18:1 likucenjezga kuti: “Uyo wakujipatura wakupenja khumbo la yekha, ndipo wakugalukira vinjeru vyose.” Alex wakati: “Para munyako wa mu nthengwa wapotera, mu mutu mukuzura waka maghanoghano ghaheni.” Iyo wakukumbuka kuti nyengo zinyake wakajifumbanga kuti: “‘Kasi nili kubudiska cinthu cinyake? Panji nkheneranga kuŵa walusungu na kumupulikiska comene muwoli wane?’ Nkhakhumbanga yayi kuti nikhalenge nekha. Nkhakhumbanga yayi kukhala kwambura muwoli. Nchipusu yayi kuwuskamo maghanoghano agha mu mutu, cifukwa zuŵa lililose ukukumbuka kuti wuli wekha.”
Para munthu wasokwa, wakukhumbikwira comene ŵanthu ŵakucezga nawo. Ŵanthu aŵa ŵakusangika pa maungano gha mpingo. Pa maungano tikovwirika kuti mu mtima withu munjire maghanoghano gha Ciuta agho ngawemi ndiposo ghakukhozga.
Maungano ghakutovwira kuti tiwonenge suzgo lithu mwakwenelera. Para tikutegherezga na kughanaghanirapo nkhani za mu Baibolo, m’malo mwa kughanaghanira waka suzgo lithu, tikuŵika maghanoghano ghithu pa vinthu viŵiri vyakuzirwa comene, kuthuwuskika kwa muwuso wa Yehova na kutuŵiskika kwa zina lake. Nakuti pa nyengo iyi, tikukhozgeka cifukwa ca kumanya kuti Yehova wakumanya masuzgo ghithu nangauli ŵanji ŵangaghamanya yayi panji kupulikiska umo tikujipulikira. Wakumanya kuti “mzimu ukuphyoka na citima.” (Zinth. 15:13) Ciuta waunenesko wakukhumba kutovwira, ndipo fundo iyi yikutikhozga kuti tilutilire kumuteŵetera.—Sal. 27:14.
Themba Davide likati lazingiziwa, likalira kwa Ciuta kuti: “Mzimu wane wathika lusoko mukati mwane; mtima wane mukati mwane wofyeka comene.” (Sal. 143:4) Kanandi masuzgo ghakucitiska munthu kuthika lusoko, ndipo mtima nawo ukuŵa na wofi. Masuzgo ghangiza mu nthowa zakupambanapambana, nyengo zinyake tingalwara kwa nyengo yitali. Kweni tingaŵa na cigomezgo cose kuti Yehova watovwirenge kuzizipizga. (Sal. 41:1-3) Nangauli mazuŵa ghano Ciuta wakucizga mwamunthondwe yayi, kweni wakupeleka vinjeru kwa uyo wakusuzgika na kumukhozga kuti wazizipizge suzgo lake. Kumbukani kuti para Davide wayezgeka comene wakalombanga wovwiri kwa Yehova. Wakimba kuti: “Nkhukumbuka mazuŵa gha mwaka; nkhulanguruka na ivyo vyose mwavicita na vyose ivyo mawoko ghinu ghawumba.”—Sal. 143:5.
Mazgu agha pakulembeka mu Baibolo ghakulongora kuti Yehova wakupulikiska umo tikusuzgikira. Mbukaboni wakuti wakupulika maŵeyelero ghithu. Para tingazomera wovwiri wake, ‘watifighilirenge.’—Sal. 55:22.
“Lombani Kwambura Kuleka”
Lemba la Yakobe 4:8 likuti: “Sendelerani kwa Ciuta, ndipo iyo wasendelerenge kwa imwe.” Lurombo ni nthowa yimoza iyo tikusendelelera kwa Ciuta. Paulosi wakuciska kuti: “Lombani kwambura kuleka.” (1 Tes. 5:17) Nanga ni para tikusoŵa cakuyowoya, “mzimu iwowene ukuŵeyelera m’malo mwa ise na mitampho yambura kuyowoyeka.” (Rom. 8:26, 27) Tikukayika yayi kuti Yehova wakumanya umo tikujipulikira.
Monika, uyo wali paubwezi na Yehova wakati: “Cifukwa ca lurombo, kuŵazga Baibolo, ndiposo kusambira panekha, vyanovwira kuwona kuti Yehova ni mubwezi wane wa pamtima. Ngwanadi kwa ine mwakuti wanovwira comene. Nkhupembuzgika kumanya kuti nanga ningatondeka kulongosora umo nkhujipulikira kweni wakunipulikiska. Nkhumanya kuti lusungu lwake ndiposo vitumbiko vyake ni vyamuyirayira.”
Ntheura, tiyeni tizomere kupembuzgika na Ŵakhristu ŵanyithu, kulondezga ulongozgi uwemi uwo tikupulika pa maungano Ghacikhristu, ndiposo kupungulira Yehova vyose ivyo vili mu mutima withu. Izi ni nthowa zinyake izo zikulongora kuti Yehova wakutipwelelera. Pakuyowoya za ivyo vikamucitikira, Alex wakati: “Usange tikupokelera wovwiri uwo Yehova Ciuta wakupeleka, tiŵenge na ‘nkhongono zakuluska zakawiro’ izo zitovwirenge kuzizipizga viyezgo ivyo tingakumana navyo.”—2 Kor. 4:7.
[Bokosi/Cithuzithuzi pa peji 18]
Cipembuzgo ku Wakusokwa
Buku la Masalmo lili na mazgu ghanandi agho ghakutisimikizgira mwakuwerezgawerezga kuti Yehova wakupulika kulira kwa musokwano uyo wafyenyeka maghanoghano. Wonani mavesi agha:
“Mu kufinyirizgika kwane nkhacema kwa Yehova; nkhalilira kwa Ciuta wane. Wakapulika mazgu ghane mu tempele lake, ndipo nkhuto yane yikafika mu makutu ghake.”—Sal. 18:6.
“Yehova wali pafupi na awo mbakuphyoka mu mtima, ndipo wakuponoska awo mbamzimu wakupera.”—Sal. 34:18.
“[Yehova] wakucizga ŵakusweka mu mtima, na kukaka makora mabamba ghawo.”—Sal. 147:3.
[Cithuzithuzi pa peji 17]
“Lizgu pa nyengo yakwenelera” likupembuzga nadi pa zuŵa la suzgo