Kulondezga Khristu, Mulongozgi Muwemi
KANANDI awo ŵakulondezga ŵalongozgi ŵa caru ici ŵakukhuŵara. Kweni ndimo viliri yayi na awo ŵakujilambika ku udangiliri wa Khristu. Yesu wakati: “Zani kwa ine, mose imwe mukuphyoka na kunyekezgeka, ndipo nimusamphuskaninge. Jitolerani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamusamphuskika mu umoyo winu.” (Mat. 11:28, 29) Udangiliri wa Yesu ukusamphuska ndipo ngwakukhozga. Yesu wakunweka comene na ŵakuyuyuka na ŵakudonda mtima, ndipo wakuŵacema kuti ŵaŵe pasi pa joko lake lakupepuka. Kweni kasi kulondezga udangiliri wa Yesu kukusazgapo vici?
Mpositole Petrosi wakalemba kuti: “Khristu wakasuzgika cifukwa ca imwe, kumulekerani bambiro kuti mulondezgenge mendero ghake mwakugomezgeka.” (1 Pet. 2:21) Cifukwa wuli tikukhumbikwira kulondezga mendero gha Yesu? Tiyelezgere kuti muli pa gulu ndipo mukwenda mu malo agho muli kuwundilika mabomba, ndipo munthu yumoza pera pa gulu linu ndiyo wakumanya umo mungendera makora mu malo agha. Kasi mungalondezga yayi mendero ghake, kudyaka umo iyo wakudyaka? Mwakuyana waka, kuti nase tizakavikilirike tikukhumbikwira kulondezga Yesu. Ici cikusazgapo kutegherezga na kumupulikira ndiposo kukolerana na awo ŵakwimira iyo.
Tegherezgani na Kupulikira
Ca kuumaliro wa upharazgi wake wa pa lupiri, Yesu wakati: “Waliyose uyo wakupulika mazgu ghane agha na kughacita walinganenge na mwanalume wakucenjera, uyo wakazenga nyumba yake pa jalawe. Ndipo vula yikathika, maji ghakatutuka, mphepo yikaputa na kutimba nyumba yira, kweni yikawa cara, cifukwa yikazikika pa jalawe.”—Mat. 7:24, 25.
Yesu wakati munthu uyo wakutegherezga na kupulikira mazgu ghake ‘ngwakucenjera.’ Kasi tikupulikira na kuzirwiska na mtima wose ivyo Khristu wakacita, panji tikusorapo waka malango agho tikuwona kuti ngambura kusuzga kulondezga? Yesu wakati: “Nyengo zose nkhucita vinthu vyakukondweska” Ciuta. (Yoh. 8:29) Tiyeni tifwilirepo kucita nga ndiyo.
Ŵapositole nchakuwonerapo ciwemi pa nkhani ya kujilambika ku udangiliri wa Khristu. Pa nyengo yinyake Petrosi wakaphalira Yesu kuti: “Wonani! Ise tili kusida vinthu vyose ndipo tikumulondezgani.” (Mrk. 10:28) Ŵapositole ŵakazirwiskanga comene udangiliri wa Yesu mwakuti ŵakasida vinthu vinandi kuti ŵamulondezge.—Mat. 4:18-22.
Koleranani na Awo Ŵakwimira Khristu
Pakati pakhala nyengo yicoko waka kuti wakomeke, Yesu wakayowoya nthowa yinyake iyo tingalondezgera udangiliri wake. Wakati: “Uyo wakupokelera yunji uyo nkhumutuma wakupokeleraso ine.” (Yoh. 13:20) Apa Yesu wakayowoyanga za ŵakuphakazgika kuti ‘mbabali’ ŵake awo ŵakwimira iyo. (Mat. 25:40) Yesu wati wakwera kucanya, “ŵabali” ŵake ŵakimikika kuŵa “ŵimiliri mu malo gha Khristu,” ndipo ŵakamba kucema ŵanji kuti ŵaphemane na Yehova Ciuta. (2 Kor. 5:18-20) Kumanya udangiliri wa Khristu kukusazgapo kujilambika ku “ŵabali” ŵake.
Tingacita makora kusanda umo tikucitira na ulongozgi wa mu Malemba wapanyengo yake uwo ukuŵa mu mabuku ghithu ghakulongosora Baibolo. Para tikuŵazga Malemba ndiposo kuwungana na mpingo, tikukumbuskika mazgu gha Khristu. (2 Pet. 3:1, 2) Para nyengo zose tikurya cakurya cauzimu ico tikupokera, tikulongora kuti tikuwonga kufumira pasi pa mtima. Kasi tikwenera kucita wuli na ulongozgi uwo ukuwerezgeka kanandi waka? Mwaciyelezgero, Mazgu gha Ciuta ghakuciska Ŵakhristu kuti ŵatorenge panji kutengwa “mu Fumu pera.” (1 Kor. 7:39) Nkhani iyi yalongosoreka mu Gongwe la Mulinda kwa vilimika vyakujumpha 100. Ŵabali ŵa Khristu ŵakucita nthena cifukwa ca kufipira mtima umoyo withu wauzimu. Kughanaghanirapo pa fundo izi, ni nthowa yimoza iyo tikulongolera kuti tikulondezga udangiliri wa Yesu Khristu, mulongozgi withu muwemi.
Lemba la Zintharika 4:18, likuti: “Nthowa ya ŵarunji yikuŵa nga ndi kungweluka kwa matandakuca, uko kukuŵaliraŵalira mpaka muhanya pakati.” Udangiliri wa Yesu ukuŵaliraŵalira. Kuŵa na maghanoghano ghawemi para unenesko wa mu Malemba wangweluskika na “muzga wakugomezgeka na wakucenjera,” ni nthowa yinyake iyo tingalongolera kuti tikukolerana na “ŵabali” ŵa Khristu.—Mat. 24:45.
Tikulongoraso kuti tikujilambika ku “ŵabali” ŵa Khristu para tikukolerana na ŵalara mu mpingo. Paulosi wakati: “Pulikirani awo ŵakulongozga pakati pinu ndipo mujilambike, cifukwa ŵakulinda umoyo winu.” (Heb. 13:17) Mwaciyelezgero, mulara wangatikumbuska kuzirwa kwa kuŵa na Nyengo Yakusopera ya Mbumba nyengo zose panji kutipa masacizgo ghanyake gha umo tingacitira para tikupharazga. Mulaŵiliri wakwendakwenda wangatipa ulongozgi wa mu Malemba wakukhwaskana na umo tingacitira vinthu pakuŵa Ŵakhristu. Para tikulondezga ulongozgi wanthena ndikuti tikupulikira Yesu uyo ni Mulongozgi withu.
Cacitima nchakuti caru ici cilije mulongozgi muwemi. Kweni nchakukhozga comene kulondezga udangiliri wacitemwa wa Khristu. Mu vyose tiyeni tipulikire Mulongozgi withu ndipo tikolerane na awo wakugwiliskira nchito pakutilongozga.
[Vithuzithuzi pa peji 27]
Kasi mukupulikira ulongozgi wa mu Malemba wakuti mungakakinganga joko na ŵambura kupulikana?