Kasi Ŵana Ŵakwenera Kusambira Vici?
“Malemba ghose ngakupelekeka na Ciuta mwa mzimu ndipo ngacandulo pa kusambizga, kucenya, kunyoloska vinthu, na kulanga mu urunji.”—2 TIMOTE 3:16.
ŴANA ŵakwenera kusambizgika kuti ŵamanye unenesko wakukhwaskana na Ciuta. Kasi ŵangasambira nkhu unenesko uwu? Ŵangasambira mu buku lakucindikika comene pa caru cose, ilo ni Baibolo.
Baibolo lili nga ni kalata yakufuma kwa Ciuta. Mu kalata iyi, Ciuta wakuvumbura wunthu wake ndiposo wakupeleka ulongozgi ku ŵana ŵake wose, ŵacoko na ŵalara wuwo. Wonani fundo zinyake izo Baibolo likusambizga ndiposo izo nanga ni ŵana ŵangasambirapo.
Kasi Ciuta wakukhumba kuti timanye vici vyakukhwaskana na iyo?
◼ Ivyo Baibolo likusambizga: “Mwaŵeneimwe zina linu ndi Yehova, ndimwe Wapacanyapose mu vyaru vyose.”—Salmo 83:18.
Sambiro: Ciuta ni nkhongono waka yayi, kweni ngwanadi ndipo wali na zina.
◼ Ivyo Baibolo likusambizga: “Ciuta wakupenjapenja mitima yose, ndipo wakumanyiska kaghanaghaniro kali kose. Usange ukumupenja Iye tiwasangike na iwe.”—1 Midauko 28:9.
Sambiro: Yehova Ciuta wakutipwelelera tose, kusazgapo na ŵana wuwo. (Salmo 10:14; 146:9) Wakukhumba kuti tisambire vya iyo.
◼ Ivyo Baibolo likusambizga: “Mungasuzganga . . . mwana mulanda. Usange tiuŵasuzge uli, ndipo ŵandililire Ine, nadi tindipulike kulira kwawo.”—Exodus 22:22-24.
Sambiro: Yehova wakupulika nanga ghangaŵa malurombo gha ŵana ŵacoko. Nyengo zose tingayowoya na Ciuta na kumuphalira maghanoghano ghithu ndiposo umo tikujipulikira.
◼ Ivyo Baibolo likusambizga: “Kaŵirikaŵiri ŵakamusosomora Ciuta, na kumutopokeska moyo Mutuŵa wa Israyeli.”—Salmo 78:41.
Sambiro: Ivyo tikucita na kuyowoya vikumukhwaska Yehova, ntheura, tikwenera kughanaghana dankha pambere tindayowoye panji kucita vinthu.
Kasi tikwenera kucita wuli na ŵanthu ŵa fuko lakupambana na lithu?
◼ Ivyo Baibolo likusambizga: “Ciuta wakutemwera cara, kweni mu mtundu uliwose munthu uyo wakumopa na kucita urunji ngwakuzomerezgeka kwa iyo.”—Milimo 10:34, 35.
Sambiro: Usange Ciuta wakupokelera ŵanthu ŵa mitundu yose, ipo tileke kutinkha ŵanthu ŵanyake cifukwa cakuti tikupambana kawonekero ka thupi panji cisko.
◼ Ivyo Baibolo likusambizga: “[Ŵani] ŵakunozgeka nyengo zose kujivikilira panthazi pa waliyose uyo wakukhumba kumanya cifukwa ca cigomezgo ico cili mwa imwe, kweni mucitenge ntheura pamoza na kuzika ndiposo nchindi zikuru.”—1 Petrosi 3:15.
Sambiro: Para tikudumbiskana vya cisopa tikwenera kuyowoya cigomezgo cithu mwankhongono, kweni tileke kuyowoya mwaganyavu. Tikweneraso kucindika awo vigomezgo vyawo vya cisopa vikupambana na vithu.
Kasi tikwenera kucita wuli na ŵa mu mbumba yithu?
◼ Ivyo Baibolo likusambizga: “Imwe mwaŵana, pulikirani ŵapapi ŵinu mu vyose, pakuti ici nchakukondweska mu Fumu.”—Ŵakolose 3:20.
Sambiro: Para ŵana ŵakupulikira, ŵakulongora kuti ŵakutemwa ŵapapi ŵawo ndiposo ŵakukhumba kukondweska Ciuta.
◼ Ivyo Baibolo likusambizga: “Lutilirani kuzizipizgirana yumoza na munyake na kugowokerana na mtima wose usange munthu wali na cifukwa cakudandawulira munyake. Nga ni umo Yehova wakagowokelera imwe na mtima wose, ndimo namweso mucitirenge.”—Ŵakolose 3:13.
Sambiro: Nyengo zinyake ŵanthu ŵanyake, kusazgapo na ŵa mu mbumba yithu ŵangatikhuŵazga. Kweni usange tikukhumba kuti Ciuta watigowokerenge, tikwenera kusambira kugowokera ŵanyithu.—Mateyu 6: 14, 15.
Cifukwa wuli tikwenera kuŵa ŵalusungu na kuyowoya unenesko?
◼ Ivyo Baibolo likusambizga: “[Wuskaniko] utesi, yowoyani unenesko waliyose wa imwe na mzengezgani wake.”—Ŵaefeso 4:25.
Sambiro: Para tikuyowoya unenesko tikumulondezga Ciuta ndiposo tikumukondweska. Usange tikutemwa kuyowoya utesi, tikukolerana na mulwani wa Ciuta, Dyabulosi, uyo ni “wiske wa utesi.”—Yohane 8:44; Tito 1:2.
◼ Ivyo Baibolo likusambizga: “Ivyo mukukhumba kuti ŵanthu ŵamucitirani, namwe mukwenera kucita mwakuyana waka kwa iwo.”—Mateyu 7:12.
Sambiro: Tikwenera kughanaghanira umo ŵanji ŵakujipulikira ndiposo ivyo ŵa mu mbumba yithu na ŵanthu ŵanyake mu cigaŵa cithu ŵakukhumbikwira. Para ‘tikulengera citima’ ŵanji, nase ŵazamuticitira lusungu.—1 Petrosi 3:8; Luka 6:38.
Fundo izi zikulongora kuti ivyo Baibolo likusambizga vingawovwira ŵana kuti para ŵazakakura ŵazakaŵe ŵanchindi, ŵalusungu, ndiposo ŵakuwonga. Kweni ninjani uyo wakwenera kusambizga ŵana fundo izi?