Kasi Ŵanji Ŵakuti Haramagedoni ni Vici?

“Ndipo ghakaŵawunganyira wose pamoza ku malo agho mu Cihebere ghakucemeka Haramagedoni.”—UVUMBUZI 16:16.

Kasi para mwapulika lizgu lakuti “Haramagedoni” mukughanaghana za vici? Mukwenera kuti mukughanaghana za soka likuru comene. Nangauli lizgu ili likusangika pa malo ghamoza pera mu Baibolo lose, kweni likuyowoyeka mwakuwerezgawerezga na ŵalongozgi ŵa visopa, mu manyuzipepara, pa wayilesi, na pa TV.

Kasi ivyo ŵanandi ŵakuyowoya vyakukhwaskana na Haramagedoni vikuyana na ivyo Baibolo likusambizga? Zgoro la fumbo ili ndakuzirwa. Cifukwa wuli? Cifukwa para mwamanya unenesko wakukhwaskana na Haramagedoni mungafwatuka ku wofi wambura kwenelera, mungaleka kopa vya munthazi, kweniso mungamba kumutemwa comene Ciuta.

Wonani mafumbo ghatatu ghakulondezgapo agha, ndipo yaniskani ivyo ŵanthu ŵakuyowoya vyakukhwaskana na Haramagedoni na ivyo Baibolo likusambizga.

1. KASI HARAMAGEDONI NI SOKA LAKUPANGIKA NA ŴANTHU?

Ŵamutolamakani na ŵakusanda, kanandi ŵakuyowoya lizgu lakuti “Haramagedoni” kuti ŵalongosore masoka ghakofya ghakupangika na ŵanthu. Mwaciyelezgero, ŵakuti Nkhondo Yakwamba na Yaciŵiri ya Caru Cose zikaŵa Haramagedoni. Nkhondo izi zikati zajumphapo, ŵanthu ŵakaghanaghananga kuti caru ca United States na ca Soviet Union vitimbanenge mwakugwiliskira nchito mabomba gha nyukiliya. Mawayilesi, manyuzipepara, na ma TV ghakalongosoranga kuti nkhondo iyi yizamuŵa “Haramagedoni ya nyukiliya.” Mazuŵa ghano, ŵakusanda awo ŵakopa kuti caru cinangikenge comene cifukwa ca kunangika kwa mphepo na vinthu vinyake, ŵakucenjezga kuti kuŵenge “Haramagedoni ya kusintha kwa nyengo.”

Kasi ivyo ŵakuyowoya vingang’anamura vici? Ŵanthu ŵali na mazaza ghose pa caru capasi na pa vyamoyo vyose ivyo vilimo. Usange maboma ghakutondeka kucita vinthu mwavinjeru, caru capasi cinangikirengethu kwambura kunozgekaso.

Iyo Baibolo likusambizga: Ciuta wazomerezgenge cara kuti ŵanthu ŵanangirethu caru capasi. Baibolo likutisimikizgira kuti Yehovaa “wakacilenga waka cara” caru capasi. Kweni “wakaciwumba kuti ciŵenge cakukhalamo!” (Yesaya 45:18) M’malo mwa kuzomerezga kuti ŵanthu ŵanangirethu caru capasi, Ciuta ‘wazamuparanya awo ŵakunanga caru capasi.’—Uvumbuzi 11:18.

2. KASI HARAMAGEDONI NI SOKA LACILENGIWA?

Ŵamutolamakani nyengo zinyake ŵakuti masoka ghakuru ghacilengiwa ni “Haramagedoni.” Mwaciyelezgero, mu 2010, lipoti linyake likati “‘Haramagedoni’ ku Haiti.” Lipoti ili likalongosoranga za masuzgo, kwanangika kwa katundu, na kufwa kwa ŵanthu, ivyo vikacitika cifukwa ca cindindindi ico cikabwangasura vinthu mu caru ca Haiti. Ŵamutolamakani na ŵakupanga mafilimu ŵakuyowoya lizgu ili para ŵakulongosora vinthu ivyo vyacitika kale kweniso za vinthu vyakofya ivyo ŵakuti vicitikenge munthazi. Mwaciyelezgero, pakulongosora ivyo ŵakughanaghana vyakuti cinthu cinyake ciwenge kufuma kucanya na kutimba caru capasi, ŵakuti iyi nayo ni “Haramagedoni.”

Kasi ivyo ŵakuyowoya vingang’anamura vici? Vingang’anamura kuti Haramagedoni ni soka ilo likukoma ŵanthu wose, ŵaheni na ŵawemi wuwo. Palije ico mungacita kuti mujivikilire ku soka ili.

Ivyo Baibolo likusambizga: Haramagedoni ni soka ilo lizamukoma ŵanthu wose yayi. Kweni ŵaheni ŵekha ndiwo ŵazamukomeka pa Haramagedoni. Baibolo likulayizga kuti sonosono apa “muheni kuti tiwaŵepo cara; tiuŵanike malo ghake kweni iye ntha waŵengemo.”—Salmo 37:10.

3. KASI CIUTA WAZAMUPARANYA CARU CAPASI PA HARAMAGEDONI?

Ŵanthu ŵanandi ŵa visopa ŵakugomezga kuti pazamuŵa kulimbana kwaumaliro pakati pa uheni na uwemi, ivyo vizamupangiska kuti caru capasi ciparanyike na kumara. Wupu wa Princeton Survey Research Associates wa ku United States wati wasanda, ukasanga kuti ŵanthu ŵalaraŵalara 40 pa ŵanthu 100 ŵaliwose, ŵakugomezga kuti caru cimalenge pa “nkhondo ya Haramagedoni.”

Kasi ivyo ŵakusambizga vingang’anamura vici? Ivi vingang’anamura kuti ŵanthu ŵali kulengeka kuti ŵakhalenge pa caru capasi kwamuyirayira yayi, ndipo caru capasi naco cili kulekenge kuti cikhalenge kwamuyirayira yayi. Ciuta wali kulenga ŵanthu kuti panyengo yinyake wose ŵazakafwe.

Ivyo Baibolo likusambizga: Baibolo likuyowoya mwakupulikikwa makora kuti Ciuta wakaŵika “malufura gha caru mwakuti cileke kusunkhunika.” (Salmo 104:5) Pakuyowoya za ŵanthu, Baibolo likuti: “Ŵakunyoloka ŵamkuhara caru na kukhala mwenemumo kwandanda.”—Salmo 37:29.

Fundo izi zikulongolerathu kuti Baibolo likususka vinthu vinandi vyakukhwaskana na Haramagedoni ivyo ŵanthu ŵakuyowoya. Ipo kasi unenesko wakukhwaskana na Haramagedoni ngwakuti wuli?

[Mazgu ghamusi]