Sambirani Kufuma mu Mazgu gha Ciuta
Kasi Nyifwa ya Yesu Tingayikumbukira Wuli?
Mu nkhani iyi muli mafumbo agho panji muli kujifumbapo, ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.
1. Kasi tingacita wuli pakukumbukira nyifwa ya Yesu?
Yesu wakaphalira ŵalondezgi ŵake kuti pakukumbukira nyifwa yake ŵagwiliskirenge nchito cingwa na vinyo ivyo vikaŵa na ng’anamuro lapadera. Cingwa cikwimira thupi la Yesu ndipo vinyo likwimira ndopa zake.—Ŵazgani Luka 22:19,20.
Cingwa ico Yesu wakagwiliskira nchito cikaŵa cambura cilungo panji kuti yisiti. Mu Baibolo, kanandi yisiti wakwimira kwananga. Ntheura, cingwa cambura yisiti cikaŵa cakwenelera kwimira thupi lakufikapo la Yesu. Iyo wakapeleka thupi lake kuŵa sembe iyo yikamazga sembe za nyama izo Dango la Mozesi likalangura. (Ŵahebere 10:5, 9, 10) Vinyo likimiranga ndopa zakuzirwa za Yesu izo zikathiskika kuŵa sembe ya zakwananga zithu.—Ŵazgani 1 Petrosi 1:19; 2:24; 3:18.
2. Mphawuli apo tikwenera kukumbukira nyifwa ya Yesu?
Yesu wakafwa pa nyengo ya Paska pa Nisani 14. Mwakuyana na kalendara ya Ŵayuda, zuŵa likwamba para dazi lanjira. Pa usiku wakuti wafwenge, Yesu wakarya Paska na ŵapositole ŵake. Ndipo pamasinda wakambiska Cikumbusko ca nyifwa yake.—Ŵazgani Luka 22:14, 15.
Ŵanthu ŵa Ciuta mazuŵa ghano ŵakukumbukira ivyo Ciuta wali kupeleka kwizira mwa Yesu kuti caru cose cifwatuke kukwananga na nyifwa. (Exodus 12:5-7, 13, 17) Nga umo Paska likacitikiranga kamoza pera pa cilimika, Cikumbusko ca nyifwa ya Yesu naco cikucitika kamoza pa cilimika para dazi lanjira pa Nisani 14, mwakuyana na kalendara Yaciyuda.—Ŵazgani Yohane 1:29.
3. Kasi mbanjani ŵakwenera kurya cingwa na kumwa vinyo pa Cikumbusko?
Apo Yesu wakapelekanga vinyo ku ŵalondezgi ŵake wakati: “Nkhombo iyi yikwimira phangano liphya.” (1 Ŵakorinte 11:25) Phangano liphya likanjira mu malo mwa phangano la Dango la Mozesi, mu ilo Ciuta wakalayizga Ŵaisrayeli kuti usange ŵamupulikirenge fikepo, ŵaŵenge ŵanthu ŵake. (Exodus 19:5, 6) Kweni Ŵaisrayeli ŵakapulikira yayi. Ntheura, Yehova wakanozga phangano liphya.—Ŵazgani Yeremiya 31:31.
Kwizira mu phangano liphya, Yehova wakupeleka vitumbiko ku ŵanthu ŵanandi kwizira mu ŵanthu ŵacoko. Awo ŵali mu phangano liphya, mbanthu ŵacoko waka, ŵakukwana 144,000. Kwizira mu ŵanthu aŵa, ŵanthu mamiliyoni ghanandi ŵakufuma mu mitundu yose ŵazamusanga umoyo wamuyirayira mu paradiso pa caru capasi. Ŵanji awo ŵali mu phangano liphya ŵakuteŵetera Yehova pa caru capasi mazuŵa ghano. Aŵa ŵekha ndiwo ŵakurya cingwa na kumwa vinyo cifukwa nkhombo “yikwimira phangano liphya.”—Ŵazgani Luka 12:32; Uvumbuzi 14:1, 3.
4. Kasi tikusanga candulo wuli na Cikumbusko ca Nyifwa ya Yesu?
Cikumbusko ca nyifwa ya Yesu ico cikucitika cilimika cilicose, cikutovwira kuti citemwa cithu pa Yehova cikure. Wakatuma Mwana wake kuti wazakafwe cifukwa ca zakwananga zithu. Ntheura, para tili pa Cikumbusko, nchakuzirwa kughanaghanirapo umo nyifwa ya Yesu yikutovwilira. Tikwenera kughanaghanira ivyo tingacita kuti tilongore kuwonga ivyo Yehova na Yesu ŵali kuticitira.—Ŵazgani Yohane 3:16; 2 Ŵakorinte 5:14, 15.
Kuti mumanye vinandi wonani peji 206-208 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.