Mazgu Ghakukhozga Ghakufuma “mu Mulomo wa Ŵabonda”
Mu Disembala 2009, Khoti Likuru Comene ku Russia likakolerana na udumuliro wakuti Ŵakaboni ŵa Yehova ŵakanizgike kusopa mu Msumba wa Taganrog ku Russia. Ŵakaŵapoka Nyumba ya Ufumu, ndipo ŵakapharazga kuti mabuku ghithu 34 ngakutalulira. Nkhani iyi yikaŵikika pa Webusayiti ya Ŵakaboni ŵa Yehova lumoza na vithuzithuzi vya Ŵakaboni awo ŵakakhwaskika na nkhani iyi, kusazgapo ŵana.
Myezi yicoko waka yikati yajumphapo, Ofesi Yakulaŵilira Mipingo ya Ŵakaboni ŵa Yehova mu Russia yikapokera bokosi na kalata yakulondezgapo iyi kufumira ku mbumba ya Ŵakaboni, mu Queensland, Australia, iyo yikawona ivyo khoti likadumura. Kalata iyi yikuti: “Ŵabali Ŵakutemweka, Ŵana ŵithu, Cody na Larissa, ŵakakhwaskika comene na cipulikano ico ŵabwezi ŵithu ku Russia ŵakalongora apo ŵakaŵa mu viyezgo. Ŵalemba makadi na makalata, ndipo ise tanozga vyawanangwa vicoko waka ivyo tikukhumba kutumira ŵana ŵa mu Taganrog. Tikukhumba kuŵamanyiska kuti ku vigaŵa vinyake vyakutali kuli ŵana ŵanji awo ŵakuteŵetera Yehova mwakugomezgeka nga ndiwo ndipo ŵakuŵaghanaghanira. Ŵakuŵatawuzga comene ndipo ŵakuŵatemwa.”
Ŵana ŵa ku Taganrog ŵakati ŵapokera vyawanangwa ivi, ŵakalemba makalata ghakuwonga mbumba ya ku Australia iyi ndipo pa makalata ŵakajamburapo vithuzithuzi. Cifukwa ca kukhwaskika na mazgu ghakukhozga ghakufuma “mu mulomo wa Ŵabonda,” Kaboni munyake uyo wakuteŵetera pa ofesi ya munthavi ya ku Russia wakalembera Cody na Larissa kuti: “Ghanaghanirani waka umo cikuŵira cakuŵinya ku ŵana na ŵalara wuwo para ŵakulangika uku ŵandanange. Ŵabali na ŵadumbu ŵithu mu Taganrog ŵandanangepo kanthu, kweni ŵali kuŵapoka Nyumba ya Ufumu. Ici cikuŵacitiska citima comene. Ŵakhozgekenge comene para ŵamanya kuti ŵanthu ŵa mu vyaru vinyake ŵakuŵaghanaghanira. Yewo comene cifukwa ca mzimu winu wa citemwa na wa kupeleka.”—Sal. 8:2.
Tili nadi mu ubali wa pa caru cose, ndipo citemwa cithu cikutovwira kuti tizizipizgenge viyezgo na masuzgo. Apo makhoti ghakudumbiskana kuti ghawone usange mabuku gha Ŵakaboni ŵa Yehova ghakukhozgera thinkho, ŵana ŵithu ŵakulongora pakweru kuti ŵakughanaghanira umoyo wa ŵanyawo, vilije kanthu kuti ŵakupambana mitundu na mafuko. Ŵakulongora kuti mazgu gha Yesu ngaunenesko, ghakuti: “Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.”—Yoh. 13:35.
[Cithuzithuzi pa peji 32]
Ŵana ŵa ku Australia
[Cithuzithuzi pa peji 32]
Ŵana ŵa ku Russia awo ŵakapokera vyawanangwa kufumira ku ŵana ŵa ku Australia