Sambirani Kufuma mu Mazgu gha Ciuta
Kasi Ciuta Wazamukhazikiska Boma Limoza pa Caru Cose Capasi?
Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.
1. Cifukwa wuli ŵanthu ŵakukhumbikwira boma lakuti liwusenge caru cose?
Mazuŵa ghano masuzgo ghali pa caru cose capasi. Mu vyaru vinyake, ŵanthu ŵanandi mbakavu ndipo ŵakutambuzgika. Apo mu vyaru vinyake ŵanthu ŵanandi mbasambazi comene. Ntheura, boma ilo lingawusa pa caru cose, ndilo lekha lingagaŵa vinthu mwambura kutemwera.—Ŵazgani Mupharazgi 4:1; 8:9.
2. Kasi ninjani uyo ngwakwenelera kwendeska boma ili?
Fundo yakuti caru cose ciŵe mu mawoko gha munthu yumoza, ŵanthu ŵakukolerana nayo yayi cifukwa palije munthu uyo wangacita makora mulimo uwu. Palije munthu uyo ŵanthu wose ŵangakolerana nayo. Kweniso ninjani uyo wakuleka kupweteka ŵanyake para wali na mazaza? Usange uyo wakuwusa ngwankhaza, ŵanthu wose ŵakukhala mwawofi.—Ŵazgani Zintharika 29:2; Yeremiya 10:23.
Yehova Ciuta wasankha Mwana wake, Yesu kuti wawuse ŵanthu kwamuyirayira. (Luka 1:32, 33) Yesu wali kukhalapo pa caru capasi. Apo wakaŵa pa caru, wakacizganga ŵalwari, wakasambizganga ŵakuzika, kweniso wakacezganga na ŵana. (Mariko 1:40-42; 6:34; 10:13-16) Ipo Yesu ndiyo ngwakwenelera nadi kuŵa Themba.—Ŵazgani Yohane 1:14.
3. Kasi vingacitika nadi kuti caru cose ciŵe na boma limoza?
Ciuta wali kusora mwana wake kuti wazakawuse caru capasi uku wali kucanya. (Daniel 7:13, 14) Nga umo vikuŵira kuti munthu uyo wakuwusa wakukhumbikwira kukhala mu msumba uliwose yayi, Yesu nayo wakukhumbikwira kuŵa pa caru capasi yayi kuti wawuse ŵanthu.—Ŵazgani Mateyu 8:5-9, 13.
Kasi ni waliyose uyo wazamuzomera kuti Yesu waŵe Themba? Yayi. Ŵekha awo ŵakutemwa uwemi ndiwo ŵazamuzomera. Yehova wazamuwuskapo wose awo ŵakana Themba la citemwa na la urunji ilo wasankha.—Ŵazgani Mateyu 25:31-33, 46.
4. Kasi Themba ili lizamucita vici?
Nga umo muliska wakuwunjikira mberere zake, Yesu nayo wali kwambapo kale kuwunjika ŵanthu ŵamitima yiwemi ŵakufuma mu mitundu yose ndipo wakuŵasambizga citemwa ca Ciuta. (Yohane 10:16; 13:34) Ŵanthu aŵa ŵakulondezga Yesu na kukhozgera ufumu wake mwamwamphu. (Salmo 72:8; Mateyu 4:19, 20) Ŵanthu awo ŵakulondezga Yesu pa caru cose capasi, ŵakupharazga mwakukolerana kuti iyo ni Themba.—Ŵazgani Mateyu 24:14.
Sonosono apa, Yesu wacitengepo kanthu kuti wathaske ŵanthu ku boma lambura urunji. Wasora ŵanji mwa ŵalondezgi ŵake ŵakugomezgeka kuti ŵazakawusire lumoza kucanya nga ni mathemba. (Daniel 2:44; 7:27) Mu Ufumu wa Yesu, caru capasi cizamuzura na ŵanthu ŵakumumanya Yehova ndipo cizamuŵaso paradiso nga uyo wakatayika pakwamba.—Ŵazgani Yesaya 11:3, 9; Mateyu 19:28.