Mozesi Wakaŵa Munthu Wakujiyuyura

KASI KUJIYUYURA NI VICI?

Kujiyuyura nkhuleka kujikuzga. Munthu wakujiyuyura wakuwona ŵanyake kuŵa ŵapasi yayi. Munthu uyo ngwakujiyuyura wakumanya kuti ngwambura kufikapo ndiposo kuti wakutondeka vinthu vinyake.

KASI MOZESI WAKALONGORA WULI KUJIYUYURA?

Mozesi wakajikuzga yayi apo wakapika mazaza. Kanandi para munthu wapika tumazaza wakucedwa yayi kumanyikwa usange ngwakujiyuyura panji yayi. Robert G. Ingersoll mulembi wa mu vyaka vya m’ma 1800 C.E. wakati: “Ŵanthu ŵanandi ŵangazizipizga masuzgo. Kweni para ukukhumba kumanya usange munthu ngwakujiyuyura panji yayi, umupe mazaza. Ntheura, Mozesi nchakuwonerapo ciwemi comene pa nkhani ya kujiyuyura. Mwawuli?

Mozesi wakapika mazaza ghakuru comene, cifukwa Yehova wakamutuma kuti walongozge Ŵaisrayeli. Ndipouli, Mozesi wakajikuzga yayi cifukwa ca mazaza agha. Mwaciyelezgero, wonani umo wakacitira na fumbo lakusuzga lakukhwaskana na wanangwa wakupoka ciharo. (Maŵazgo 27:1-11) Fumbo ili likaŵa lakuzirwa comene cifukwa zgoro lake likakhwaskanga miwiro yinandi kunthazi.

Kasi Mozesi wakacita wuli? Kasi wakawona kuti wangamarana nayo yekha nkhani iyi pakuti wakaŵa mulongozgi wa Israyeli? Kasi wakatenge wathembenge mahara ghake, utali wa nyengo iyo wakateŵetera, panji ivyo wakamanyanga pa umo Yehova wakendeskeranga vinthu?

Mutepanji Mozesi waŵenge munthu wakujikuzga mphanyi ndimo wakacitira. Kweni ndimo wakacitira yayi. Baibolo likutiphalira kuti: “Mozesi wakiza na mulandu [uwu] pamaso pa Yehova.” (Maŵazgo 27:5) Ghanaghanirani waka. Nanga ni apo pakajumpha vyaka 40 wakulongozga mtundu wa Israyeli, Mozesi wakajigomezganga yekha yayi kweni Yehova. Ici cikulongora kuti Mozesi wakaŵa wakujiyuyura comene.

Mozesi wakaŵa na sanji yayi kuti panji ŵanyake ŵangamupoka mazaza ghake. Wakakondwa apo Yehova wakazomerezga Ŵaisrayeli ŵanyake kuti ŵaŵe nchimi nga ndiyo. (Maŵazgo 11:24-29) Apo a wiskevyara ŵakamupempha kuti wasore ŵanalume ŵakuti ŵamovwire kuti mulimo uwo wakacitanga upepukeko, mwakujicefya Mozesi wakapulikira. (Exodus 18:13-24) Nakuti apo wakaŵa pafupi kufwa, Mozesi wakalomba Yehova kuti wasore munthu wakuti wazakalongozge Ŵaisrayeli, nangauli wakaŵa kuti wacali na nkhongono. Yehova wakati wasora Joshua, Mozesi wakamovwira kufumira pasi pa mtima. Ndipo wakaciskanga ŵanthu kuti ŵalondezge Joshua pakuluta ku Caru ca Layizgano. (Maŵazgo 27:15-18; Duteronome 31:3-6; 34:7) Mozesi wakawonanga kuti ni mwaŵi ukuru kudangilira Ŵaisrayeli pakusopa. Kweni wakazomerezganga yayi kuti mazaza ghamutimbanizge.

KASI TIKUSAMBIRAPO VICI?

Tikwenera yayi kujikuzga cifukwa ca mazaza agho tapika panji cifukwa ca mahara ghithu. Kumbukani fundo iyi: Kuti ticite makora mulimo wa Yehova, kujiyuyura ndiko nkhwakuzirwa comene kuluska maluso ghithu. (1 Samuel 15:17) Para ndise ŵakujiyuyura tifwilirengepo kulondezga ulongozgi wa mu Baibolo uwu, uwo ukuti: “Tamira mwa Yehova na mtima wako wose, ungeghamanga ku umanyi wako wekha.”—Zintharika 3:5, 6.

Kwa Mozesi tikusambirakoso kuti tileke kuwona mazaza kuti ndigho ngakuzirwa comene.

Kasi tikusanga candulo cifukwa ca kuŵa ŵakujiyuyura nga ni Mozesi? Nkhanira kwali! Para tikujiyuyura tikovwira kuti ŵanji ŵaŵe ŵakufwatuka kweniso tikulongora kuti tikuŵatemwa. Kweni cakuzirwa comene nchakuti tikuŵa paubwezi na Yehova Ciuta uyo nayo wali na ukhaliro wakukondweska uwu. (Salmo 18:35) Baibolo likuti: “Ciuta wakwimikana na ŵakujikuzga, kweni wakupeleka lusungu lukuru ku ŵakujiyuyura.” (1 Petrosi 5:5) Tili na cifukwa ciwemi comene cakuŵira ŵakujiyuyura nga ni Mozesi.