Cifukwa Wuli Ŵanji Ŵakuti Ciuta Ngwankhaza?

KASI fumbo la pa cikopi ca magazini iyi likumuzizikani? Ŵanji ŵakuzizikika nalo, kweni ŵanandi ŵakumanya makora yayi, ndipo ŵakughanaghana kuti ngwankhaza. Cifukwa wuli?

Ŵanji awo ŵakupona masoka ghacilengiwa ŵakufumba kuti: “Cifukwa wuli Ciuta wakuzomerezga vinthu ivi kuti vicitikenge? Kasi vikumukhwaska yayi? Panji ngwankhaza?”

Ndipo ŵanji ŵakujifumba mafumbo ghakuyana waka para ŵakuŵazga Baibolo. Mwaciyelezgero, para ŵangaŵazga nkhani ya Ciwowota ca mu nyengo ya Nowa, ŵanji ŵangafumba kuti: ‘Cifukwa wuli Ciuta wacitemwa wakakoma ŵanthu wose ŵara? Kasi ni nkhaza yayi?’

Kasi namwe muli kujifumbapo mafumbo ghanthena? Panji kasi vikumusuzgani kuzgora ŵanthu awo ŵakuwona kuti Ciuta ngwankhaza? Mulimose umo vingaŵira, kweni wonani fumbo ilo lingatovwira.

CIFUKWA WULI TIKUTINKHA NKHAZA?

Tikutinkha nkhaza cifukwa cakuti tikupambaniska pakati pa ciwemi na ciheni. Tikupambana comene na vinyama pa nkhani iyi. Mlengi withu wali kutilenga “mu cikozgo cake.” (Genesis 1:27) Kasi ici cikung’anamuraci? Cikung’anamura kuti wali kutilenga kuti tilongorenge mikhaliro yake yiwemi, na kupambaniska ciwemi na ciheni. Ghanaghanirani fundo iyi: Usange Ciuta ndiyo wali kutipa mahara kupambaniska ciwemi na ciheni ndipo tikutinkha nkhaza, asi ndikuti nayo wakuzitinkha?

Baibolo likukhozgera fundo iyi, cifukwa likuti: ‘Nthowa zane ni zapacanya kuluska zinu na maghanoghano ghane kwakuluska ghinu.’ (Yesaya 55:9) Ntheura, usange tingati Ciuta ngwankhaza, asi ndikuti tikung’anamura kuti nthowa zithu ni zapacanya kuluska zake? Ipo nchamahara kuti pambere tindayowoye kuti Ciuta ngwankhaza, tikwenera kusanda fundo zose. M’malo mwa kukayikira usange Ciuta ngwankhaza, tikwenera kufumba cifukwa ico vyakucita vyake vinyake vingalongolera nga ngwankhaza. Kuti tipulikiske makora, tiyeni tiwone dankha ico lizgu lakuti “nkhaza” likung’anamura.

Para tikuti munthu uyu ngwankhaza, ndikuti wakuŵakhumbira viwemi yayi ŵanyake. Munthu wankhaza wakukondwa para ŵanyake ŵakusuzgika kweniso vikumukhwaska yayi. Ntheura, dada uyo vikumukondweska kulanga mwana wake na cilato cakuti wamukwiyiske waka ndikuti ngwankhaza. Kweni dada uyo wakulanga mwana wake na cilato cakuti wamusambizge panji kumuvikilira, ni muwemi. Pakuti kanandi nchakusuzga kumanya cilato ico munthu yunji wacitira cinthu, nchipusu kumweruzga mwambura kwenelera. Mungapulikiska fundo iyi usange vili kumucitikiranipo.

Tiyeni tiwone vifukwa viŵiri ivyo ŵanji ŵakughanaghanira kuti Ciuta ngwankhaza. Vifukwa ivi ni masoka ghacilengiwa agho ghakucitika mazuŵa ghano na nkhani za mu Baibolo izo zikulongosora umo Ciuta wakeruzgiranga ŵanthu. Kasi pali ukaboni wakulongora kuti Ciuta ngwankhaza?