MAFUMBO GHAKUFUMIRA KU ŴAŴAZGI

Kasi cingaŵa cakwenelera kuti pa maungano gha mpingo mwana wakusezgeka wakhale pamoza na ŵapapi ŵake awo Mbakhristu?

Palije cifukwa cakufipira mtima na malo agho munthu wakusezgeka wangakhala mu Nyumba ya Ufumu. Nyengo zose magazini iyi yikuciska ŵapapi awo Mbakhristu kuti ŵapelekenge wovwiri wauzimu usange nchakwenelera ku mwana wawo wakusezgeka uyo wacali kukhala nawo pa nyumba. Nga umo Gongwe la Mulinda la Ciceŵa la Novembala 15, 1988, peji 19 na 20 likuyowoyera, ŵapapi ŵangasambira Baibolo na mwana wawo mucoko wakusezgeka uyo ŵakukhala nayo. Para vingaŵa nthena, tikugomezga kuti mwana wapokerenge cikhwimisko cakwenelera kuti wanozge nthowa zake.

Mu Nyumba ya Ufumu, cingaŵa cakwenelera usange mwana mucoko wakusezgeka wakukhala na ŵapapi ŵake kweni kwambura kutimbanizga ŵanji. Pakuti nchakukhumbikwa yayi kuti munthu wakusezgeka wakhalenge kumanyuma kwa Nyumba ya Ufumu, palije cakutondeska mwana wakusezgeka kuti wakhale pafupi na ŵapapi ŵake palipose apo iwo ŵakhala. Apo ŵapapi ŵakupwelelera mwana wawo mwauzimu, iwo ŵangatemwa comene kuti wapulikizgenge comene pa maungano. Pa nkhani iyi, para mwana wawo wangakhala pafupi na iwo cingaŵa cakovwira comene kuluska para wangakhala kwayekha.

Kweni wuli usange mwana wakusezgeka wakukhala pa nyumba ya ŵapapi ŵake yayi? Kasi para vyaŵa nthena wakwenera yayi kukhala pamoza na ŵapapi ŵake mu Nyumba ya Ufumu? Mabuku ghithu ghali kulongosorapo kale umo Mkhristu wakwenera kucitira pa nkhani ya kucezga na mubali wake wakusezgeka, uyo wakukhala kwayekha.a Kweni para munthu wakusezgeka wakhala cisisi pamoza na ŵabali ŵake pa nyengo ya maungano, vikupambana comene na para ŵabali ŵake ŵakucezga nayo kwambura vifukwa vyakwenelera. Usange ŵabali ŵake ŵakugomezgeka ŵakuwona vinthu mwakwenelera pa nkhani ya mubali wawo wakusezgeka ndiposo ŵakufwilirapo kucindika ulongozgi wa mu Malemba wakukhwaskana na kucezga na munthu wakusezgeka, pangaŵavya cifukwa cakufipira mtima.—1 Kor. 5:11, 13; 2 Yoh. 11.

Kwali munthu wakusezgeka wakhala pamoza na mubali wake panji pamoza na munthu waliyose mu mpingo, cikwenera kuŵa cakufipiska mtima cara, cikuru munthu wakusezgeka uyo, wakutimbanizga ŵanji yayi. Usange mungaŵika dango la apo munthu wakusezgeka wakwenera kukhala, pangaŵa masuzgo ghakupambanapambana, kuyana na umo vinthu vyaŵira. Usange wose, kusazgapo ŵabali ŵa munthu wakusezgeka, ŵakufwilirapo kucindika fundo za mu Baibolo zakukhwaskana na kusezga, ndiposo usange vikukhuŵazga ŵabali yayi, palije cifukwa cakufipira mtima na malo agho ŵanthu awo ŵiza pa maungano ŵakwenera kukhalapo.b