“Tamusanga Mesiya”!

Pati pajumpha vilimika 400 kufuma apo buku la Malaki likalembekera, ucimi wa Mika wakuyowoya za Mesiya ukafiskika. Yesu wakababikira nadi mu Betelehemu. Vyaka pafupifupi 30 vikati vyajumphapo, mu 29 C.E., cigaŵa cakwamba ca ucimi wa Daniyeli wakuyowoya za kwiza kwa Mesiya cikafiskika. Yesu wakabapatizika ndipo Ciuta wakamuphakazga na mzimu utuŵa. Mesiya [Mphapu] wakawoneka nadi pa nyengo yake ndendende, nangauli ŵanthu ŵakamulindilira kwa nyengo yitali.

Mwaluŵiro, Yesu wakamba “kupharazga na kuthuwuska makani ghawemi gha ufumu wa Ciuta.” (Luka 8:1) Nga umo ucimi ukayowoyera, Yesu wakaŵa walusungu, wakuzika ndiposo wakafipiranga mtima ŵanji. Wakasambizganga vinthu vyakovwira, kweniso wakasambizganga mwacitemwa. Wakacizganga “mtundu uliwose wa vyakuŵinya” kulongora kuti Ciuta wakaŵa nayo. (Mateyu 4:23) Ŵanthu ŵa misinkhu yose ŵakathilimukiranga kwa Yesu na kuyowoya nga umo wakayowoyera yumoza wa ŵasambiri ŵake kuti: “Tamusanga Mesiya”!—Yohane 1:41.

Yesu wakayowoyerathu ivyo vizamucitika pambere wandambe kuwusa caru capasi. Wakati pa caru pazamuŵa zinkhondo, vindindindi, na masuzgo ghanyake ghanandi. Ntheura, wakaciska ŵalondezgi ŵake wose kuti ‘ŵaŵenge maso.’—Mariko 13:37.

Yesu wakaŵa wakufikapo ndipo wakalutilira kuŵa wakugomezgeka kwa Ciuta. Kweni wakaŵa na ŵalwani awo pamasinda ŵakamukoma. Pakuti Yesu wakaŵa wakufikapo, nyifwa yake yikaŵa yakwenelera kuti tisange umoyo wamuyirayira uwo Adamu na Eva ŵakataya.

Yesu wakati wafwa ucimi ukafiskika. Ndipo ucimi unyake ukafiskika pa zuŵa lacitatu apo Ciuta wakamuwuska kuŵa cilengiwa cauzimu. Pamasinda, Yesu wakawonekera ku ŵasambiri ŵake ŵakujumpha 500. Pambere wandalute kucanya, Yesu wakatuma ŵalondezgi ŵake kuti ŵapharazge makani ghawemi gha Ufumu ku “ŵanthu ŵa mitundu yose.” (Mateyu 28:19) Kasi ŵakacita wuli kuti ŵafiske mulimo uwu?

—Yafuma pa Mateyu, Mariko, Luka, Yohane, na 1 Ŵakorinte.